CAKZET LE RALTTHAZET IN

Baibal Caanghril:
“Cakzet le ral ṭhazet in um aw tiih thu ka lo pekmi cu ziangtik hman ah hngilh hlah. Ṭih hlah, na thin nau hlah; ziangahtile Bawipa na Pathian keimah in na fehnak kipah ka lo umpi ding a si” tiah Bawipa in a ti (Joshua 1:9).

Minung timi cu harsatnak le vansannak a phunphun karlak ah tlanglengmi kan si. Cuih harsatnak pawl cu zumtu siseh, zum lotu siseh, minung kan zate ih kan ton cio mi a siih hrial theihmi a si fawn lo. Kan tuarmi harsatnak pawl ih a tum ih a tam vivo tikah tlang tumpi vekin kan ruat ṭheu ih ṭihphannak a suahpi ṭheu. Cuvek caan ahhin Joshua ih thuanthu hmangin thazaang lak thiam ding hi a ṭulmi pakhat a si.

1. Ṭihphannak in kan nunnak in nehkhuh ṭheu.
Moses a thih hnu ah Joshua ih phur dingmi ṭuanvo pawl hi ziangtin a phur dingih ziangtin Israel mipi a hruai ding timi thu a ruah tikah Joshua hrangah thil ol a si hrimhrim lo. Ṭihphahza ngaingai a si ticu kan ruat thei cio ko ding. Joshua in Israel miphun pawl kha tiamkammi ram a simi Kanaan ram tiang hruai vivo ding ṭuanvo tumpi a nei. Rinsantlak zet le hruaitu ṭha zet ih tantami ṭuanvo lak ding kan si tikah cuih ṭuanvo hi ziangtin ka ṭuansuak pehzom thei pei timi thu kan ruat tikah kan pehzom thei lo pang pei ti ṭihphannak a suak ṭheu. A hmaisa ih in hruaitu ih ṭuanmi vekin ka ṭuan pehzom thei ngaingai pei maw? tiah awloksong in kan um ko ding. Joshua ih dinhmun kan zoh a sile khuaruahharza ngaingai a si. Hruaitu ṭha le felzet a simi Moses in a thihsan zo. Isreal miphun timi cu miphun tampi rawimi a siih tluangte’n hruaisuak vivo thei ding timi hi a ol lo zet, timi thu Joshua in a ruat tikah a thinphang zetin a um ko ding. Ṭihphannak in a nunnak a nehkhuh caan a um ko ding.

Kan nunnak khalah cubangtuk in thil a cang ṭheu ko ding. “Hitluk harsatnak hi ka lansuak thei ngaingai pei maw? Ka ṭuanvo a va tum lawmmam so? Huiha… ka tuahsuak thei lo men ding a…” tiah kan ruah caan tampi a um ko ding. Van kan zoh tikah a sang ih lei kan zoh tikah a pit fawn. Tingaihnak zianghman a um lo caan tampi a um ṭheu ko ding. A hleice in hnaṭuan thar, ṭuanvo thar kan lak ding tikah siseh, dam lonak ruangah le harsatnak ruangah a hlan vekin kan ṭuan thei nawn lo tikah siseh, kanmah le kanmah rin-awknak a ṭumsuk vivo thei. Cuticun ṭihphannak in kan nunnak ah in nehkhuh vivo thei a si. Cumi cu minung tampi ih kan ton theimi a si.

2. Cuih ṭihphannak kha kan do a ṭul.
Joshua in a ṭihphan zetmi pawl cu ral ṭhazet in a do. Cuvekin kannih zumtu pawl khal do ve ding kan ṭul a si. Hotu bik Moses a thih tikah Joshua in buainak tampi tawlrel ding a nei vivo. Moses a nun laiah Kanaan ram thlingthla dingah mi 12 a thlah (Mipum 13:4-15). Cumi pawl cun sabit kung le rah pawl, Taleti le Thei rah pawl an phurkir tikah Kanaan ram ih leiram a ṭhatzia an thei ngah. Culawng si loin cuih ram ih a umtu pawl cu mitum le misang zetzet an siih Israel mi pawl cu an hnenah kharbok tluk fang an si, tiah an ti (Mipum 13:33). Cuih thu an thei tikah Israel mipi cu Moses parah an thin a heng ngaingai. Sikhalsehla Caleb le Joshua lawngin ṭih lo dingin le cuih ral pawl cu do in thukammi ram ah pan dingah ruahnak an pek. Asinain a dang 10 pawl cun an thusimmi vekin an ngai duh lo ih kum 40 sung hramlak ah an vakvai a si. Joshua le Caleb cun do dingah an tiar cia ko nain a dang pawlin an do ngam lo tiah kan hmu thei.

Kan nunnak khalah cuih mi tam sawn pawl vekin kan si ṭheu. Mitum, misang, ṭuanvo thar, hnaṭuan thar, harsatnak, buainak pawl kha kan ṭih ṭheu. Cuih hnaṭuan tumpi pawl hmaiah mah le mah kharbok vek ih a hmu awtu tampi kan um ṭheu. Cutin ṭihphannak thawn kan khat tikah kan thin a nuam lo deuhdeuh ih hramlak ah vakvai rero tu pawl vek ah kan cang. Mi zovek khalin buainak le harsatnak cu kan tong tengteng ko ding. Hrial theitu zohman kan um lo. Caan tampi ahcun harsatnak tumpi tiah kan ruat ṭheu na’n vei tampi ah kan ruahvek a si lozia kan hmu ṭheu ko ding. A caancaan ahcun kan ruah vekin buaithlakzet khal a si ṭheu. Ziang a si khalle cuvek caan ah ziangkim tithei kan biakmi Pathian rinsan in cuih ṭihphannak kha kan do ding a ṭul a si. Um men, to men cu a rem thiam lo ding.

Thunetnak.
Kan nunnak sungah ṭihphannak le buainak ziangtluk a tum khalle a liamcia caan ih Pathian zaangfahnak parah lungawi thusim phah in le hmailam hrangah Amai’ kut sungah ap ding kan ṭul. Joshua khal cubangtuk in a tuah a si. Pathian in Moses lam a hruai vivo vekin atu amah (Joshua) khal Pathian in a hruai vivo ding tiah zumnak a nei. Curuangah Pathian in, “Cakzet le ral ṭhazet in um aw tiih thu ka lo pekmi cu ziangtik hman ah hngilh hlah. Ṭih hlah, na thin nau hlah; ziangahtile Bawipa na Pathian keimah in na fehnak kipah ka lo umpi ding a si” tiah thazaang a pek hngai a si (Joshua 1:9).

Nitin kan nunnak sung khalah harsatnak le ṭihphan ding thu pawl kan tong a sile a liamcia caan dunglam ih Pathian lamhruainak pawl zohkir sal kan ṭul. Cakzet le ral ṭhazet in kan um a ṭul. Hlaphuahtu in, “Hmuifu pakhat hnu pakhat ciar aw, Bawipai’ pekmi in a lo mangbang ter ding” a ti bangin kan nunnak sungah Pathian kutcak mangbangza tampi kan hmu thei ding. Buaizet le harsa zetih kan ṭihphan lai caan ah Pathian ih umpinak a thar in kan hmufiang thei sal ding. Kan ṭihphan dingmi hi ziangtluk a tum khalle cuih kan ṭihphanmi hnakin kan Pathian a tum sawn. “God is greater than all problems I have” timi catar kan hmu ṭheu vekin Pathian cu ziangkim hnakin a cak ih a tum sawn a si. Curuangah Piter in, “Nan donharnak hmuahhmuah cu Amah ih hnenah ṭhum uh, ziangahtile Amah cu nan zawn a lo ruattu a si” a ti (1 Pit. 5:7).

Duhdawtnak le duhsaknak thawn,

Rev. CJ Hrang Hmung, Ph.D.,
Toungphila, Kalaymyo.
October 4, 2014|Saturday|10:40 pm.