FACEBOOK RAMMI

America timi ram ihsin "Zuckerberg" timi hmin kawh a har nawnmi mino pakhat le a rualpi pawlih zuamnak thawn an suahpimi Facebook hi atu ahcun leitlun khuaza ramkip ah a thleng zo. “Internet connection” a ttha lo tuk tiih hmin thang ve mi Kawlram ah khal Facebook in kan thei cingin siseh, kan thei lo laiah siseh, nasazet in hmunhma a lak ngah zo. Mi tampi kan nun a luah ngah zo. Tulaiah Facebook hi mi tampi in mah le phone in siseh, internet dawr ah siseh kan hman tlangpi mi a si zo. Ram thuhla, nitin kan nuntu khawsaknak khalah ram a lak ngah nasa zo, ticu el theih lomi a si.

Tuini ah “Social Networking Website” timi rualpi pakhat le pakhat pawlkomnak a cat lonak dingah siseh, mitheih rualpi thar karhzainak hrangah siseh, kan ruahban lo in a laar nasa. Leitlun hmuntin ah hman theih dingin tawlrel vivo a si. A hleice in mi tambikih hmanmi cu “Facebook”, “Twitter” ti pawl tla an si. Kawlram ahcun “Twitter” an hmang tam lem lo a bang. Facebook cu Kawlram hmun tinkim ah an hmang tambikmi pehtlaih awknak (social network) pakhat ah a cang. A hleice in mino pawlin an hmang tambik a bang. Upa le mifim cathiam deuh, theikauhnak nei deuh pawl, santhar thil a thei deuh pawl in an hmang tam nasa.

Leitlun huap in rel sehla 2012 kum October thlathok hrawngah Facebook hmangtu mipi million 1000 a kim zo, tiin Facebook parah ka siar ngah dah a si. Sim duhmi cu leitlun um minung mi pasarih ah mi pakhat in Facebook an hmang tinak a si. Facebook hi ram pakhat tiah tibang sehla China le India ram dungah leitlun rampi minung tamnak ah a pathumnak a si. Cuih “Facebook Ram” sung ahcun ram tinkim ihsin mipi million 1000 lenglo a um tinak a si. 

Tulai san ahcun Facebook kan hmang lo a sile san a man lomi pakhat vekah kan cang mai. Ziangahtile G-mail le a dang pawl hi hman tlangpi a si ttheu nain Facebook hi hman a ttangkai sawn ruangah a si. Mi tamsawn in Facebook kan hmang thluh thlang tinak a si cu. 

Facebook ih a hnattuan thupibik cu Facebook rualpi pawl pakhat le pakhat karlakah kan tuahmi, kan theihmi le kan thinlung ih a ummi le zuk a phunphun pawl hlawm-aw theinak ding hrangah tuahmi a si. Facebook parah kanmah rori in pakhat khat tuah kherkher a ttul lo. Facebook rualpi pawl a si lole Facebook “account” neitu pawlih an tarlangmi zuk, thuhla pawl hmangin Facebook rualpi pawl karlak ah amahte’n a karhzai vivo. Internet san ih thazaang a cahnakbik cu pakhat le pakhat “hlawm-awnak nunphung” (Sharing Culture) kha a ol ter ngaingai. Thuhla a phunphun kha harsazet in nganbet sal rero ttul loin midang ih an ngancia mi kha hlawm (share) aw vivo a theih. Fim san timi atu kan san ah theihnak lam hlawm-aw a theih ruangah thutheihnak lam a karhzai ter ngaingai. Thuthang le thilcangmi a phunphun khal hmakhatte ah hlawm-awk lohli a theih. A zamrang nasa.

Facebook um daan cu kanmai’ “Facebook account” hmangin rualpi kan hawl thei (Friend request of add). Cutin kan rualpi ih a rualpi pawl khal kan rualpi ah a cang thei. Cutin Facebook rualpi tampi neih theih a si, timi cu Facebook a hmangtu pawlin kan theih cio mi a si. 

Facebook hman ruangah rualpi pawlih thuhla tampi a pehpeh in kan thei ngah thei. Kum reipi tong aw nawn lomi rualpi pawl thawn ton-awk sal a thei. Kanmai’ suahni kan thei lo hmanah Facebook rualpi pawlin suahni cibai in buk, kanmah khalin rualpi pawl ih suahni ah cibai kan buk thei ve. Khua hla, ram hla ih a ummi rualpi, sungkhat tthit-umnak a um ah siseh, thil pakhat khat hlawhtlinnak an ngah ah siseh lungawipinak “Congratulation” kan tuah thei. Thu thar, hla thar a phunphun kan thei thei ih, kanmah khalin thu thar, hla thar kan theimi pawl kan tarlang thei ve. 

Kan hmang vivo tikah thei-aw dah lomi pawl thawn khal Facebook sung ahcun rualpi ttha ah kan cang thei. An hnattuanmi pawl, an sinak pawl ziangtinkim kan theisak aw thei. Facebook hmang in fala, tlangval an hawlih an nei thei. A hrek khat cu innsang pakhat ih kom-aw thei ding tiangin remrel tawlrelnak a um thei. Theih ttulmi thuhla zongza kan thei ngah thei. Curuangah Facebook hi hmanthiamtu hrangah a thupi ih a tthathnemzetmi a si. 

A caan caan le Facebook ah thupi lem lomi thuhla tampi a ra ttheu. Cubang tikah zo hrang khalah tthathnemnak a um lomi ah “comment” kan pe aw rero ruangah thil thupi pawl kha hawl ding a harsa ngaingai. “Comment box” sungah tarlangmi thuhla thawn pehpar-aw lomi biaksawn awknak tampi a um tikah ca thupi, thil thupi siar duhmi pawl hawlsal ding hi a harsa ngaingai. Mi zapi hrang a si lem lomi pakhat le pakhat kan biaksawn aw-mi thu cu “comment box” sungah ngan rero loin mah le “inbox” lam ihsin biaksawn aw thei sehla duh a um zet. 

Vei tampi cu thil thupi tiah kan ruahmi thuhla a um tikah rualpi pawl ih “wall” par khalah kan va “tag” ttheu. Asinain a hrek khat hrang ahcun a thupi ve lo ruangah mi tihnaihnoktu ah a cang ttheu. Mi hrekkhat cu anmai’ pumpak “wall” parah anmai’ tarlang duhmi lawng ret an duh. Curuangah fimkhur zetin mi dang “wall” parah “tag” thiam a ttha. Cubang men ti siang loin ralrin thiam vivo dingah zir phah vivo a ttul. Facebook rualpi 5000 tiang neih theih a si ruangah thu hla theih nuammi le tthathnempi dingmi thuhla pawl kan hlawm (share) awk ahcun a tthahnem ngaingai ko. Sikhalsehla thil thupi lomi kan hlawm-awk ciamco tikah cuih ttangkai lem lomi rualpi cazin cu rualpi lo (unfriend) ah tuah saltu khal tampi a um ko ding. Curuangahah rualpi cazin kan neihmi pawl hi fimkhur zetin cohlang thiam a ttul ngaingai.

Facebook a hmangtu pawl lakah Fabebook rualpi ziangtin kan nei ding timi hi a thupi ve mi a si. Facebook hmangtu lakah rualpi tampi neih a duhtu le a duh lem lotu tiah phun hnih in a um thei men. Mi hrekkhat cun rualpi tampi nei thei dingin an zuam ih a tambik rualpi 5000 tiang an nei. A hrek cun mai’ theihmi lawng tthate’n an cekfel hnu ah rualpi ah an cohlang. Cutin cekfel dingah cun Facebook ih kan hmanmi hmin le kan tarlangmi zuk hi a felfai a ttul. Mi hrek cu hmin lem an hmang tikah kan theihmi a si hmanah kan rualpi ah a cang thei lo. A hrek cu mai’ zuk tarlang loin mi dang zuk tla an ret ruangah rualpi a si lomi tampi kan nei. Ziang a si khalle Facebook rualpi cohlan daan thu cu mai’ remcang daan in a si mai ko.

Facebook parih kan sinak le a langlam ih kan sinak taktak hi a bang aw thei, a bang aw lo khal a si thei. Cutin a bang aw lomi kan si ahcun mi pakhat thinlung phunhnih nei (split personality) tla kan si thei men. A lenglam ah ttihnungza a simi cu Facebook parah duhnungza zet a si thei. A lenglam ahcun biak aw ngam dah lem lo na’n Facebook parah cun rualpi tthazet, thunuam relpi theizet a si thei. A hrek cun in zohman nih in theifiang lem lo pam tiin Facebook par ihsin duh tawkin mi tthuat hmang le hrotu khal an um. 

Facebook hi “hlawm” (share) awknak olbik a si vekin si lonak hmun ah kan hman pang ahcun ttihnungzet pakhat a si. Mai’ tohmun te’n thuhla pakhat kha a sia zawngin kan meisa nawk vekin kan nawk kang thei. Cuticun hmakhat te sungah thuphan thu le thuhla siava a phunphun cu kan hlawm aw vivo tikah hmakhat te sungah mi thawng tampi hnenah cuih thu siava a va thleng. Cuticun zum olzetmi pawl hnenah Facebook ihsin thuhla siava le thu ttha lo tlangzarh ding hi peisa cem lo, caan cem loin a zai thluh mai. A siartu mi zo poh an thin a heng cio tikah a hrek cun cahnah ah an suah ih a lenglam ah an zem sawng vivo. Curuangah Facebook ih mi tisiat theimi hi ttih a nung ngaingai. Zalenzet ih sim le rel, cangan theimi hi siatnak karhzai tertu hmanrua ah kan hmang pang ding hi a thupi zetmi a si. 

Ziangziang khal sisehla Facebook cu Kawl rammi le Facebook rammi sinak a neitu Laimi tampi hmangin nitin kan pawlkomnak, pursum leilawnnak le nuntu khawsaknak parah thu a nei theizetmi hriamhreitt hazet pakhat a si. A hmang thiamtu hrangah tthathnemnak tumpi a suahpi vekin a hmang thiam lotu hrangah siatsuahnak tampi a thleng phah theimi a si. Curuangah fimkhurzet in hmang thiam cio ding hi a thupi ngaingai a si.

Duhdawtnak le duhsaknak thawn,

Dr. CJ Hrang Hmung, Ph.D.,
July 1, 2014 (Tuesday), 10:23 am.
Toungphila, Kalaymyo.