IN THEIH RINGRINGNAK DINGAH

Baibal Caanghril:
“Bawipa Jesuh in Amah an zuar zanah sanghlom pakhat a lak ih, Pathian hnenih lungawi thu a sim hnuah a phel ih, ‘Himi hi nan hrangih ka pekmi ka taksa a si. In theih ringringnak dingah ei uh,’ tiah a ti. Cubangtuk ṭhiamṭhiam in, zanriah an ei ṭheh hnuah khuat khal a lak ih, ‘Hi hai cu ka thiisen ih nemhngetmi Pathian ih thukam thar a si. Nan in tinte keimah in theih ringringnak ah tuah uh,’ tiah a ti” (1 Kor. 11:24).

Tuini hi leitlun huap Bawipa Zanriah Ni (World Communion Day) a si. A tlangpi thu in October thla zarh hmaisabik ah hman a si ṭheu. Himi World Communion Day ah Pathian zumtu pawl hmankhawmmi Bawipa Zanriah cabuai pawl zate’n pehzom komkhawm thluh bang sehla peng 25000 tluk a sau ko ding. Zumtu Khristian zate’n Bawipa Zanriah hman cio dingah khawm cio hai thluh bang sehla mipum million 2000 tlun kan kim ko ding. Thungaithlak in kan sim a sile Bawipa Zanriah a hmangtu ding zumtu mipi pawl hi midum, misen, mirang ti thleidan um loin hmangkhawm thluh dingmi a si.

A thupimi pakhat cu cuih Bawipa Zanriah cabuai ih a teltu pawl hrangah Bawi Khrih ah pawlkomnak tumpi a si. Paul in, “Cuti a si ruangah, Zentail mi le Judah mi tiin siseh, serhtan le tan lo tiin siseh, mi aa phun ti le ziangthu hman thei lo ramsa phun, sal pawl ti le miluat pawl tiih thleidan awknak a um nawn lo. Khrih lawng hi ziangzongza a siih ziang hmuahhmuah sungah a um a si” tiah a sim (Kol. 3:11). Bawipa Zanriah cabuai khalah thleidannak zianghman a um lo. Thinglamtah hram ah hmunkhatte komkhawm aw thluhmi kan si.

1. Bawipa Zanriah a hmangtu pawl cu “thuthangṭha” a congahtu pawl kan si.
Zumtu pawl cu misual kan si cing ko na’n sualthlahnak a cotu pawl kan si. Cuih thuthangṭha cu “lungawiza thuthangṭha” a si. Bawi Jesuh cu cuih thuthangṭha a si. Cuih thuthangṭha cu Jesuh Khrih ah hram a bun awmi a si. Kanmahte’n kan tuah thei lomi rundamnak cu Pathian in Jesuh Khrih hmangin in tuahsak famkim thluh zo. Cumi cu misual kan sinak hmuahhmuah in khuhsak thluh ih Pathian thawn pawlkom theisalnak a si. Minung pawl sualthlahnak kan ngah ruangah Pathian a lungawi. Pathian zaangfahnak le duhdatnak a co tlakmi mifamkim, mi ding zohman kan um lona’n Pathian in famkimte’n in co ter thluh a si. Cuih duhdawtnak, zaangfahnak le rundamnak thuthangṭha cu mi hmuahhmuah ih nunah neih ter dingah Pathian in a duh bikmi a si.

2. Bawipa Zanriah a hmangtu pawl cu Jesuh Khrih zumtu pawl kan si.
Paul le Silas te pahnih cu Filipi thawng sungah an um laiah Pathian thangṭhatnak hla an sak. Cutikah hmakhatte ah ling a hnin ih thawnginn sangka pawl a ong thluh. Thawnginn kiltu cu a ṭih tuk ruangah, “Rundamnak ngah dingah ziang ka tuah ding?” tiah Paul le Silan hnenah a sut tikah “Jesuh Khrih zum aw” tiah an sim (Tirh. 16:25-34). Cubangtukin tuini Bawipa Zanriah a ei le in khawmtu pawl khal Jesuh Khrih a zumtu pawl kan si. Rundam ciami pawl kan si. Jesuh Khrih a zumtu pawl cu Jesuh Khrih ih zirhmi thu pawl cohlang in nunpitu pawl kan si (Kan nunpi ngaingai maw??? timi cu mah le mak cekfel awk ding). Mai’ duhnak hnakin Pathian ih duhnak thupi sawn ah rettu pawl kan si a ṭul. Zumnak timi cu kan thluak sungih sia-ṭha theihtheinak lawng si loin kan thinlung sungih tontehnak (feeling) thawn komkhawmmi a si. Cuih zumnak cu zumtu ih kan nunnak hrangah a hrampi a si ringring a ṭul.

3. Bawipa Zanriah a hmangtu pawl cu Pathian hmaiah pumkhat kan si.
Minung timi cu mahte lawng um a theih lo. Pakhat le pakhat lungrual pehzomnak neiin um dingmi kan si. Pawlkomnak timi cu pakhat le pakhat pehtlaih awknak a si. Kawhhran sung thuhla pawlah thinlung hmunkhat le bangrante’n lungrualzetin ṭuantlang dingmi kan si. Leitlun hmun tinkim ah kan um ih kan umnak a dang cio khalle Kawhhran zate hrangah thinlung hmunkhat neiin thlangcam sak dingmi kan si. A ṭulnak vekin bawm-awton dingmi khal kan si. Thlacamnak, bawm-awknak, a hnaṭuan ṭuan tlangnak in Pathian hmaiah pumkhat kan sinak langter ringring dingmi kan si.

4. Bawipa Zanriah cu Bawipa Jesuh hngilh lonak ding hrangah a si.
Jesuh Khrih thawngin Pathian ih duhdawtnak a phuanlangmi pawl hngilh lote’n thei ringring ding kan ṭul. Bawipa Zanriah cu Pathian ih duhdawtnak kha a tharin langternak a siih Bawi Jesuh in amah hngilh lonak ding hrangah in timtuahsakmi a si. Kan hngilh lo ding ih a thupizetmi cu “Kanmah misual pawl hrangah Bawi Jesuh in thinglamtah parah a nunnak liamin in runnak thu” hi a si. Kawhhran timi cu “Jesuh Khrih a hngilh thei dah lotu zumtu pawl hmunkhat ah komkhawmnak hmun” a si. Himi caan ah Jesuh Khrih lawng si loin sankhat hnu sankhat Jesuh Khrih hrangah nun a liamtu zumtu hmaisa pawl khal hngilh lo ding a ṭha. Thukam thar ih tarlangmi Khrih ih Kawhhran timi cu “thinlung hmunkhat neiih thlacam ringringtu mibur” sinak kha a si. Hmun dangdang ah um cio khal sehla pakhat le pakhat mang aw cio in hngilh aw siang lote’n thlacam sak awk ringringmi kawhhran kan si a ṭul.

5. Bawipa Zanriah cu Zarhpi zingah hman a si ṭheu.
Zarhkhat sungah Zarhpi ni hi Bawipa thawhsalnak ni sunglawi pakhat a si. Cuih ni ah kan hmankhawmmi Bawipa Zanriah hi Jesuh Khrih thihnak le thawhsalnak ruangih in pekmi rundamnak cotu pawl kan si. Jesuh Khrih in kan sualnak le kan borhhlawhnak zate’n in nehsak thluh zo timi cu kan mangsal ding a thupi zet.

Thunetnak.
Bawipa Zanriah kan hman tikah a tanglam thu 4 pawl hi kan cinken ding a ṭul.
1. Dunglam zohkir salnak: Bawipa Zanriah kan hman tikah zumnak ih hrampi a siih a thuanthu zate’n mangsal kan ṭul. Jesuh Khrih ih tuarnak, thihnak pawl hi kannih zumtu pawl hrangah a si (1 Kor. 11:24).
2. A lenglam thlirnak: Bawipa Zanriah cabuai kan pan tikah Jeuh Khrih cu midang hrangah a nunak a liam bang tukin kannih khal kan kiang ih ummi nautabik pawl hrangah ṭuan ding kan ṭulzia mangsal a ṭul. Nautabik pawl hrangah duhdawtnak le duhsaknak thawn kan tuahmi pawl hi Jesuh Khrih parih kan tuahmi a sit i kha mang cio uhsi (Mat. 25:40).
3. Tlunlam zohnak: Bawipa Zanriah ruangah Pathian thawn pehzomnak kan ngahsal a si timi kha cing ringring kan ṭul.
4. Hmailam thlirnak: Kan nunnak ah sawmngiarnak pawl le thil a phunphun kan tong vivo lai ding. Jesuh Khrih ih duhnak kha thei ringring in hmailam ah nor vivo ding kan ṭul.

Duhdawtnak le duhsaknak thawn,

Rev. CJ Hrang Hmung, Ph.D.,
Toungphila, Kalaymyo.
October 5, 2014|Sunday|8:00am.