THLAICI LE LEILUNG A PHUNPHUN

“Sikhalsehla thlaici ṭhenkhat cu leilung ṭhatnak ah an tla ih ṭhenkhat cu a let zakhat, ṭhenkhat cu a let sawmruk, ṭhenkhat cu a let sawmthum in rawl a suak,” (Matthai 13:8).

Siarbet dingmi: Mat. 3:2-8; 18-23.

A tlunih kan tarlangmi Baibal caang hi Bawi Jesuh ih simmi thuṭhimnak tampi sungin pakhat a si. Himi thuṭhimnak hi thei a olzet ih mitinkim ih nunnak khal a khihhmuh thei thluh. Himi thu hi mitinkim in olzet le fiangzet in thei theimi thuṭhimnak a si. Himi zawn ih simmi leilung cu kan thinlung a siih thlaici cu vancung Uknak thu, phundang in kan sim a sile rundamnak thuthangṭha a si. Himi thuṭhimnak hi minung pawl ih zirhmi a si lo. Bawi Jesuh amah rori ih simmi le zirhmi a si. Simphuanmi thuthangṭha cu a bang aw ko, sikhalsehla a cohlangtu parah ṭhum in a man a bang aw lo. Leilung ṭha parah a tlami cu a karhzai ih rah tampi a rah thei. Rundamnak thuthangṭha kan ngai tikah a cohlangtu ih thinlung vekin kan sinak khal a bang aw lo. Kan thinlung hi ziangvek a si timi kan theifiang theinak dingah khihhmuhtu thuṭhimnak duhnungzet a si.

1. Lamzin parih tlami thlaici.

A hmaisabik leilungphun a simi lamzin cu hak dingin lamzin rialnak cet thawn rial ciamco.  Cuhnu ah leilung a khoh tukih a sungah zianghman a lut thei nawn lomi leilung hak a si. Cuih lamzin parih a fehtu minung, mawṭaw a tamzet zo ruangah a rei deuhdeuh, a hak deuhdeuh. Veikhat veihnih ah kan nunnak ih hmuntonmi a tamtuk ih thinnat ding a tamzet tikah zianghman thupi ah kan ruat duh nawn lo. Kan lung a hak thluh ih zianghman sim-aw theih ci a si nawn lo. Cuvek laifangah Pathian thu kan theihmi cu thinlung sungah a lut thei nawn lo ruangah Satan in oltein in bum mai. Satan bumnak oltein kan ngai mai. Kan nunnak ah khawvel thil tampi thawn kan tontehmi a tam tuk ruangah kan thinlung a hak tuk ih Pathian thu ziangvek khal kan ngai paih lo, kan thinlung sung khalah kan thunlut thei lo. Cuticun kan theihmi Pathian thu hi Satan in a lakhlo ih a lakah a cang men ta. Cubang thinlungput a neitu ih nunnak ah thuthangṭha timi thlaici cu kho man loin a hloral sal ṭheu.

2. Lungsedaap lakih tlakmi thlaici.

A pahnihnak leilungphun cu a tlunah leilung mallai a um ko nain a puantuk ih a sunglam ah lungto thawn a khat. Curuangah thlaici ṭhannak ding hrangah a harsa ih a hram a thlak thei lo. A lenglam zoh men cun a ṭha ko. Cun thlaici khal a kho lohli ko. Sikhalsehla hram a thlak ngah lo. Cuvek in Pathian thu cu a thinlung sungah a lut ko nain a hram a hnget thei lo. Pathian thu timi cu a lenglam lawngih cohlang theih a si lo, thinlung muril sungah hnget ding a ṭul. A hram a hnget sinsin le a kung a tum deuhdeuh ding. Cutik lawngah rah a rah thei ding. A lenglam zohnak ah ziangtluk in tum miangmo hman sehla a sungah hram hnget a bun lo ahcun caan in thu a sim cing leh mai ding. Mi hrekkhat cu lenglam zohin ṭhangsozet tiah kan uar ṭheu nain an hram a hnget lo ahcun a rei hlanah an tluk sal mai ding a si.

3. Hlingbur lakih a tlami thlaici.

Himi leilung ahcun lungsedeep a um lo. Sikhalsehla a lengah amah thawn a ṭhanglianmi thingkung zate zikzik cu hlingbur hlir an si. Curuangah an ṭhang ṭha thei lo. Kan kiangkap ah zovek mi pawl an um ih ziangvek pawl thawn kan pawlkom timi kan theifiang a ṭul. Ziangvek minung pawl thawn pawlkomnak kan nei timi in kan nun ṭhansonnak hrangah a thupi zet. Pathian a duhtu, mi ṭha pawl thawn kan kom ahcun rah tampi kan rah thei ve ding. Sikhalsehla thinlung a ṭha lomi, khawvel nun ih a nungmi pawl thawn kan kom ahcun ṭhathnemnak a um lo ding. Hi hlingbur timi cu donharnak le sumsaw duhnak ih tuammi pawl an si. Sim duhmi cu kannih khal hi leitlun le a thilri pawl kan duh ih, cumi pawl thawn kom-aw in kan thinlung sungah Pathian thutak a um lo ahcun zianghman san a tlai lo. Kan nunnak ah hlingbur lakih ṭhang vekin ṭhanglian ko nain rah a rah thei lo ahcun san a tlai lo. Bawi Jesuh ih duhmi cu a rah a si, a hnah a si lo (Luk 13:6-9).

4. Leilung ṭha ih a tlami thlaici.

Leilung ṭhatnak parih a tlami thlaici cu a ṭhanglian vivo ih a let sawmthum, a let sawmruk, a let zakhat tiang a rah thei a si. Pathian thu sungah pitling in minung tinkim hrangah an ṭhathnem thei. A ṭhami leilung par ih tlak ciocio hman in rahsuahmi a bang hrih lo. A let ngahmi a phunphun in a um hrih. Himi a let ngahmi pawl hi Pathian thu ziangtluk kan thlun ih kan nunpi timi parah an dang aw hrih a si. Curuangah kan nunnak ah thinlung ṭha nei lawng tawk loin hihnak ṭha sawn, a let tampi a rahmi nunnak kan si a ṭul. A let zakhat rahmi nun kan nei a ṭul. Leilung ṭha timi thinlung ṭha le lungput ṭha kan nei a ṭul. Kan lungput in kan nunnak ah ziangtluk tiang a rah thei ding timi lai a rel leh ding. Cumi cu fiangtein thei cio in a ṭhabik si dingah Pathian thawn nungtlang ringring ding kan ṭul.

Thunetnak.

Pathian in siter in duhmi a rundamnak muril cu minung hmuahhmuah thinlung sungah cohlang in rah cio ding kha a si. Paul in, “Cutiin nan tuah le a ṭha cule mi hmuahhmuah thutak thei haisehla, rundammi si hai seh ti a duhtu, in Rundamtu Pathian a lung a awi ding,” tiah a sim (1 Tim. 2:3-4). Cutik lawngah kan nunnak a ṭhangphawk dingih zumtu sinak rah tampi thawn kan hninghno thei ding a si. A ṭhami thlaici karhzai nak dingah a ṭhami leilung hi a thupi ngaingai a si.

Duhdawtnak le duhsaknak thawn,

Rev. Hrang Hmung, PhD.

Camkhat Laurel, Maryland, USA.

Feb. 20, 2016|Saturday|3:00pm.

68^th Chin National Day