ZUMNAK HRAMPI

“Asinain nannih ka duhdawtmi pawl cu a thianghlimmi nan zumnak parah (hrambun in) ṭhangso vivo uh. Thlarau Thianghlim cahnak thawn thlacam uh,” (Juda 1:20).

Siarbet ding - Matthai 7:24-27.

Minung cun kan umnak ding inn pawl kan sak ṭheu. Cutin inn kan sak tikah innhram hi a thupi zet. Ziangvek innhram parah kan sak timi zohin kan inn sakmi a khohzia kan thei thei. Cumi thu thawn pehpar aw in Jesuh Khrih ih simmi thuṭhimnak hi a fiangzetmi a si. Innsak tikah innhram hi a thupi zet vekin zumtu pawl hrangah zumnak hrampi hi a thupi ngaingai. Kan nunnak hrampi hi ziangmi parah kan din timi cu nitin kan cangvai daan in a fiang thei a si. Minung tampi cun zamrang ih ṭheh theimi a lenglam mawinak kha thupi ah kan ret. Sikhalsehla Bawi Jesuh in hngetkhoh ding hi a duh deuh a si. Himi Baibal caang kan siar tikah kan nunnak hram dinnak innhram pahnih thu simfiangmi kan hmu thei. Lungpi parah dinmi innhram le vunnel parah dinmi innhram tla an si. Phundang in kan sim a sile Mifim le Mi-aa innsak daan tiah kan ti thei.

1. Vunnel parih sakmi inn hrampi.

Vunnel parih sakmi innhram cu phundang deuhin kan sim a sile mi-aa insak daan kan ti thei. Vunnel parah sakmi inn cu ziangtin khal a hnget khoh lo ding ti cu kan thei ciomi a si ko. Kannih zumtu pawl khal thinlung sung ihsin si loin a lenglam lawngin zumtu kan si pang ahcun ralrin ding tampi a um. Cubang minung kan si ahcun Pathian ṭongkam cu kan thei ko ding nain tuahsuak dingah a tlolhmi pawl kan si ding. Pathian in minung pawl kha nitin a phunphun hmangin thu in sim ṭheu. Cumi cu mi tampi in hna kan nei ko nain kan thei lo, kan thei duh lo. Kan thei khal le zianghman kan siar duh lo, kan thinlung sung a lut duh lo ruangah kan Khristian nun khal a kel a awh ringring. Noah san lai khalah atu vekin a rak cang dah ti cu Baibal in kan thei thei. Minung pawl cu Noah hmangin Pathian ṭongkam kum tampi sung an thei rero nain zianghman ah an siar duh lo. A simtu hman hnihsuah capoh ah an tuah bet lai. Netabik ti a lik taktak tikah cun a tlai tuk zo. Minung hmuahhmuah an thi thluh. Thei cingih ngai duh lo ruangah rahsuahmi a si. Tuini hi ni netabik caan kan thleng rero zo. Cuih netabik caan khal hi Noah san lai vekin a cang rero ti cu kan theifiang a ṭul. A lenglam nun lawng cun a hngetkhohmi hram kan sak thei dah lo ding timi cu thuruat thiam ding kan ṭul thlang.

2. Lungpi parih sakmi inn hrampi.

Himi hi phundang in kan sim a sile mifim innsak daan a si. Lungpi parah sakmi inn cu a hnget khoh. Thlisia, tilet a phunphun a tuar thei. A inn hrampi a hngetkhoh ruangah zianghman harsatnak a tong lo. Cuvek thotho a si. Pathian ṭongkam a thei ih a thluntu pawl cu lungpi parah a nunnak hram a buntu thawn an bang aw a si. Ziangtluk hniksak, harsatnak hmanin a siatsuah thei lo vekin a tluk thei fawn lo. Josef ih nun hi zoh hnik uhsi. A nunnak hi Pathian ṭongkam par lawngah khoh zetin a ret tiah kan hmu thei. Curuangah ziangvek thlemnak le harsatnak hmanin sualnak khurthuk sungah a dirthlak thei lo. A netnak ah Pathian duhnak vekin hmuitinnak hmun ah a thleng thei. Daniel le a rualpi pawlih nunnak kan zoh tik khalah Pathian ih ṭongkam parah qhumin a nungtu an sizia kan hmu thei. Mai’ ram le miphun pawl umnak hmun lawngah Pathian thu an ngai a si lo. Kaih an tuarnak Babylon ram khalah Pathian ṭongkam vekin an nung. Ziangvek dinhmun an thleng hmanah an zumnak cu a fek ngaingai. Curuangah thihnak ding tiang an tong ko nain thlacamnak thawn an do neh thei. Midang ih an tuah thei lomi khal an tuahsuak thei. Zumtu unau, nitin kan nunnak hi ziangmi parah hram kan bun timi hi a thupi ngaingai a si.

Thunetnak.

Judah in, “Asinain nannih ka duhdawtmi pawl cu a thianghlimmi nan zumnak parah (hrambun in) ṭhangso vivo uh. Thlarau Thianghlim cahnak thawn thlacam uh,” (Juda 1:20) tiah a sim. Kan nitin nunnak ah Pathian cu thupibik hmun ah ret in kan zumnak hngetkhoh ding h a thupi zet. Bawi Jesuh ih simmi vekin kan zumnak hrampi hi lungpi parah sakmi inn vekin a hnget khoh ding hi a thupi ngaingai. Zumnak hrampi a hngetkhoh tik lawngah kan nunnak ih kan tonmi harsatnak a zatein kan lansuak thei ding a si. Bawi Jesuh ih simmi vekin mifim lungpi parah inn saktu si cio ding hi a thupi ngaingai.

Duhdawtnak le duhsaknak thawn,

CJ Hrang Hmung, PhD.

Camkhat Yangon, Myanmar.

Feb. 27, 2016|Saturday|11:00pm.