ZUMNAK VEKIN

“Cule Jesuh in ralbawipa hnenah, ‘Inn ah va tlung awla na zumnak vekin tuahsak na si ding,’ tiah a ti” (Mat. 8:13).

Mi tampi in thu an sut ṭheumi pakhat a um. Cumi cu ziangruangah Pathian pekmi thluasuah kan co mi a bang aw lo? Kawhhran bang-aw, ṭhenhra ṭhenkhat pek khal bang-aw, ahlu pek khal bang-aw, biakkhawm khal bang-aw, Baibal kaihmi khal bang-aw ko nain midang pawl cu thluasuah tampi an dong. Kannih hmuah midang tlukin thluasuah kan dong lo. Zum lotu pawl hman kanmah hnakin thluasuah an dong. Cumi cu ziangruangah a si pei? timi hi a si. Ziangruangah timi a cekci kan theifiang lo nain Baibal cun “zumnak vekin” thluasuah in dong ter (Mat. 8:13). Kan zum ngam zat thluasuah in pek. Curuangah kan nunnak ah Pathian thluasuah co sinsin ding kan duh ahcun kan zumnak a fek a ṭul. Zumnak a fek tikah kan comi ziangkim le thluasuah pawl khal an pungzai vivo ding a si.

1. Thupek in dam ding tiah zumnak.

Kapernaum khua ah Rom ralbawipa pakhat cu Jesuh Khrih hnenah ra in a hnen-umpa besia zetin a na mi kha damter dingah a dil. Bawi Jesuh in amah ra in damter ding a ti tikah cuih ralbawipa in a inn tiang ratter dingah a tlak lozia thu a sim. Amah cu ralbawi a si vekmi a kut hnuai pawl kha thupek theinak a nei. A kut hnuai pawl kha thupek in a duhmi a fial thei. Cuvek ṭhiamṭhiam in Bawi Jesuh in thu a pek ahcun a kut hnuai hnen-umpa cu a dam ko ding tiah a zum. A zumnak vekin Bawi Jesuh in thu a pekmi a dam taktak. Himi ralbawipa ih zumnak bangtuk Israel mi lak hmanah ka hmu hrih lo, tiah Bawi Jesuh in a ti (Mat. 8:5-13). Ralbawipa ih ‘zumnak vekin’ Pathian in a tuahsak a si.

2. Kutsuang in dam ding tiah zumnak.

Jairas timi Sinakok uktu pakhat cu a fanu a dam lo ruangah Bawi Jesuh hnenah a ra. A fanu a besia tuk ruangah a inn ah Bawi Jesuh amah rori ra in a parah a kut a suang ahcun a fanu a dam ding tiah zumnak a nei. Curuangah Bawi Jesuh hnenah ra in a dilnak a si (Mar. 5:21-24; 35-43). Jairas ih ‘zumnak vekin’ Bawi Jesuh cu a inn tiang a thlun ve. Cuhnu ah a fanu parah kutsuang in damnak a pek. Jairas in a zumnak cu a hmurka in a phuang. A zumnak vekin Pathian in a tuahsak. A dang zianghman a tuahbet lo. Jairas ih zumnak a fanu parah Jesuh Khrih kut a suang ahcun a dam ding tiah a ‘zumnak vekin’ Pathian in a tuahsak thluh. Pathian in kan parah kutsuang in thluasuah in pe thei.

3. Puan tham ahcun dam ding tiah zumnak.

Bawi Jesuh le mi tampi cu Sinakok uktu Jairas ih inn lam panin an feh lai ah kum hleihnih sung thidok in a na mi nunau pakhat a um ve. Anih in Bawi Jesuh ratnak thu a thei tikah to men ih thih ding hngah hnakin Bawi Jesuh ih puan ka tham ngah ahcun ka dam ko ding tiah zumfeknak a nei. A zummi cu a phuansuah ih miburpi lakah Bawi Jesuh hnenah panin a feh. Zumfektu pawl cu an umnak hmunah an ding men dah lo. An phuan vekin an ṭuan ṭheu. A netnak ah nunau nu cun a zumnak vekin Bawi Jesuh thei lo dingin a puan cu a tham tikah Pathian in thidok natnak ihsin a dam (Mar. 5:25-34). Cu nu cun Bawi Jesuh kha a inn ah rat ding khalah a ko lo, kutsuang ding khal a dil lo. A ‘zumnak vekin’ Bawi Jesuh thei loin a puan tham ding kha a si. A netnak ah a ‘zumnak vekin’ Pathian in damnak a pek a si.

Thunetnak.

Rom ralbawipa ih zumnak vekin Pathian in a tuahsak. Sinakok uktu Jairas ih zumnak vekin Pathian in a tuahsak vekin thidok nat a tuartu nunau nu khal a zumnak vekin a tuahsak. Zumnak cu Pathian hnaṭuantu kan si le si lo parah hram a bun lo. A thupek vekin a dam ding tiah a zumtu cu a thupek vekin a dam taktak. Kutsuang in a dam ding tiah a zumtu khal kutsuang in damnak a pek. Kum hleihnih sung thidok ruangih biakkhawm hmun a feh thei lotu nunau nu khal a ‘zumnak vekin’ Pathian in a dam ter. Thluasuah kan don daan a bang aw cio lo. Curuangah kan nunnak ah Pathian kan ‘zumnak vekin’ a thluasuah co dingah in siang a si timi hi cing ringring uhsi. Kan ‘zumnak vekin’ Pathian thluasuah relcawk lo kan dong cio ding a si.

Duhdawtnak le duhsaknak thawn,

Rev. Hrang Hmung, PhD.

Toungphila, Kalaymyo, Myanmar.

March 5, 2016|Saturday|10:26pm.