Baibal Canghril:
Thinlung thar le nunnak thar ka lo pe ding. Lungto
bangih a hakmi nan thinlung cu ka la dingih thinlung neemte ka lo pe ding.
(Ezekiel 36:26).
Thinlung timi hi minung kan nun ah a
thupi zetmi pakhat a si. Thinlung ṭha zet a um
ih, thinlung siava zet khal a um. Thinlung timi hi minung nunnak hrangah nasa
zet ih hna a ṭuantu khal a si. Thinlung a ṭha lo ih hna a ṭuan thei
lo ahcun minung si man zianghman a santlai nawn lo ding. Cun thinlung ṭha a neitu cun midang tampi, a minungpi pawl hrangah ṭhatnak tampi a suahpi thei. Amah hrang khalah ṭhatnak tampi a suahpi ih a hlawhtling nasa. Sikhalsehla kan
sungih a ummi kan thinlung hi a siava tuk ahcun kan minungpi zovek thawn hman
kan pawlkom thei lo ding. Kan remaw thei lo ding. Cutikah mah lawng a paakih
ummi kan si ding phan a um. Cuih kan thinlung cu a siava lawng si loin a hak
tuk pang le ṭih a nung sinsin. A hak daan hi
lungto bangih a hakmi thinlung (stone heart) ah a cang pang ahcun hna a ṭuan nawn lo ding. Cutikah thih ding lawng a bak thlang ding
a si. Curuangah Pathian in cuih lungto bangih a hakmi thinlung ai-ah thinlung
neemte ka lo pe ding, a ti a si.
Thinlung neem a ngahtu cu nunnak thar, damnak a thar a ngahtu a si.
Leitlun ah minung thinlung sia mi hlon
sakin midang thinlung thawn airawl ih bun sak saltu siibawi thiam hminthang cu
Dr. Christian Barnard timi pa a si. Dr. C. Barnard ih thinlung a thar a bunsak
salmi mina pa cu Luis Warrensky a si.
Cupa cu kum 57 mi a siih nasa zet ih thinlung natnak (heart attack)
vei hnih a tuar zo. Tu lo vei khat a ngah bet ahcun nung dingah ruahsannak a um
nawn lo. A thi tengteng thlang ding zum a um. Himi pa hrangah a thupi mi cu a ṭha mi thinlung khui in so kan ngah thei dingih zo in so a
pe ding? timi hi a si. Awloksongza ngaingai dinhmun ah a um laifang a si.
Nikhat cu fala mawizet Dennish timi
kum 24 nu te cu mawṭaw zinpi a tanlai ah mawqaw pakhat in a pah ngah ih a lu ah
a rial per thluh. A nung sal ding tiin ruahsan ding zianghman a um nawn lo.
Cutikah a duhdawtzetmi a pa in a fanu ih thinlung cu hna ṭha zetin a ṭuan thei hrih
ruangah siizung ah hlu dingin thu a ṭhencat.
Siizung hnaṭuantu pawl khal mangbangzet in Dr.
C. Barnard hnenah thu an than. Dr. C. Barnard in cuih thu a theih tikah a
mangbangzet fawn, khat lam ah a mina tuamhlawm rero mi pa hrangah a ruah ah a
lungawi fawn. Operation tuah dingmi thu a ruah ah palh theih lo dinhmun
a sizia khal a thei fawn. A thinphannak do-awk phah in a inn ihsin siizung lam
ah zamrangzet in a pan. Lamtluan ih a thlacammi cu, “Mawi ka Pathian, atu ka
tuah dingmi operation ah i ṭanpi hram
aw…” ti a si.
Dr. C. Barnard in thinlung operation
tuahnak ding hrangah timtuah cianak vei tampi a rak nei dah zo. Uico kha operation
a tuah ih a dang uico ih thinlung thawn a thleng sak dah. A hlawh tling thei
ko. Asinain tuiṭum ih operation a tuah dingmi cu ramsa a si nawn lo,
minung parah tuah ding a si thlang. Minung sungih thinlung lam thawn thlengsak
ih a dang thinlung bun sal hi atu ah a hmaisa biknak a si thlang ding.
Curuangah ziangtluk a va thiam hman ah tuiṭum
operation a tuah dingmi hi a thupi tuk lawmmam ruangah Pathian hnen ah ap-awk
lo cun a cang thei hrimhrim lo mi a si.
Cuihni cu sii lam thawn pehpar aw in
san thuanthu thar a ong thok ni a si. Operation tuah dingin a timtuah aw
thlang. Fala nu te Dennish cu a thi zo. A thinlung cu ralring zetin an rai ih
an lak. Cuihhnu ah mina Warrensky ih awm kha an rai thok. An hmu mi cu
Warrensky ih thinlung cu a tha a mal zet. Cuih thinlung tha mal zet cu at in
Dennish ih a tha cakmi thinlung kha an bun ih an pehsak. Thiihri pawl an tan ih
Dennish ih thiihripi thawn an peh sal. Cuih operation tuah hi cu a harsa
ngaingai. Nazi 5 tluk a rei tikah Warrensky ih thinlung thar an bunsakmi cu a
remcang thlang. Thii pawl ṭhate’n feh thei dingah an
phitsakmi thiihri pawl an ong tikah Dr. C. Barnard le a dang siibawi pawl,
sayama pawl cu thaw hman an thawt ngam cuca lo. Cuihsin rei lote ah an
operation tuahmi ih a phi a lang. Thiisen pawl ṭhate’n
a thleng ih thinlung thar an bunmi sungah a lut tikah cuih thinlung thar cu ṭhate’n hna a quan. Operation an tuahmi an hlawhtling
tariai. Siibawi pawl an zate’n an lungawi daan cu kaa ih sim le rel cawk rual a
si lo. Dr. C. Barnard khal cu Pathian thangṭhat
loin a um thei hrimhrim lo ih diriam zet in Pathian hnenah lungawi thu a sim.
Praise the LORD!
Cuihsin rei lo te ah thinlung thar
thawn Warrensky cu siizung ihsin a suak ih inn a tlung thei. A harhdam ngah ta
riai. Thinlung thar a neihmi cu a hrangah thazaang thar a si. Harhdamnak thar a
si. Kan Baibal ca sungah Ezekiel in, “Thinlung thar le nunnak thar ka lo pe
ding. Lungto bangih a hakmi nan thinlung cu ka la dingih thinlung neemte ka lo
pe ding,” a ti (Ezek. 36:26).
Thungaite’n kan ruat asile minung
thinlung hi a siava zet ih a hak zet. Cuih a hakzetmi thinlung cu lungto
thinlung (Stone Heart) a cang tikah hna a quan thei nawn lo, thih ding lawng a
hmabak a si. Curuangah kan Pathian in lungto bangih a hakmi nan thinlung ai ah
thinlung neemte ka lo pe ding a tinak cu a si. Thinlung neem a neitu in nun
thar, damnak thar a ngah thei a si.
Tuihsun ah zumtu pawlin kanmah le
thinlung ciar hi zohsal hnik uhsi. Warrensky bangin thinlung natnak vei khat lo
le vei hnih a ngahmi tampi kan um ko ding. Vei thumnak ngah cun thih ding a si
thlang. Cuvekin thlarau lam thawn a pehparmi thinlung khal ṭhate’n hna a ṭuan thei
nawn lo ahcun a poizet ding. Midang hrangah ṭhathnemnak
zianghman kan nei nawn lo ding. Thinlung neem hnakin thinlung hak a nei mi kan
karhzai vivo thlang a bang. Mah le mah cekfel awk a ṭul nasa, tiah ka ruat.
Tuihni ah Biakinn ah ra in a khawm
thei lo tampi kan um vivo thlang. Company hnaṭuan,
cetzung hnaṭuan, zung hnaṭuan le mai’ pumpak hnaṭuan
a phunphun pawl ah kan buai tam thlang. Biakinn ah feh in va khawm rero hnak in
mai’ pumcawmnak a thupi sawn a si tiah hnaṭuan
kha thupi sawn ah a rettu mi tampi kan um vivo thlang. Kan hnaṭuanmi le Pathian thu kan khaikhawm tikah hnaṭuan hi a thupi sawn ah kan ret. San a harsa ruangah ngah
thei ding a um cun Pathian hnakin hnaṭuan hi
thupi sawn kan ti vivo thlang. Cuticun biakinn kan thleng lo a rei deuhdeuh
tikah a poi lo tiah kan thinlung in kan ruat. Kan thinlung a hak vivo. A
thokpek ahcun a poi lo vek a bang nan a rei tikah Zarhpi ni tla kan thei nawn
lo tiangin kan thinlung a hak vivo ṭheu.
Mi hrekkhat pawlin biakinn cu kan ra
thleng ko. Asinain kan thinlung cu biakkhawmnak sungah um loin hmun zakip ah
kan feh ter. Thangṭhat hla sakmi, thuthangṭha
kan ngaimi, thlacammi pawl cu kan thazaang laknak ah kan hmang thei nawn lo.
Thinlung sungah phuurnak a um nawn lo. Pathian biak khal a hmin men in kan
biak. Kan thinlung takin kan biak lo. Kan thinlung cu Pathian thawn a hlat aw
vivo. Cutiin kan thinlung a hak vivo ṭheu. Kan
lung a hak hnuhnu cu minung cun zianghman kan remsak awk thei lo, Pathian hnen
ap in Pathian ih remsak ding lawng a tang.
Mi hrekkhat lala cu biaknak lamah kan
lungtho nasa. Biakinn sungah zumtu dang pawl thawn pawlkomnak kan neiih
thazaang kan cakzet tiah kan ruat. Asinain a thaizing tlawngkai nikhat thleng
cun leitlun daan in kan nung. Midang hrangah zohṭhimtlak
nun, Khristian kan sinak nun kan langter thei nawn lo. Zum lotu pawl thawn kan
dang cuang lo. San a thleng rero vekin san thawn milin nun a ṭul tiah phuahlam a phunphun in kan pek. Baibal thawn kan
cek awk sal ahcun cubang thinlung pawl hi a him thluh kan ti thei lo ding.
Sammi a nei rero ve. Thinlung hak ding lamzin ah a pan ve. Bawipa ni lawngah
zumtu diktak kan si ṭheu ih culo nidang ahcun
zum lotu pawl thawn kan dang nawn lo. Kan thinlung a hak vivo.
Cuvek thinlung pawl cu a hak tuk
hlanah hlon in thinlung thar, thinlung neem thawn kan ai-rawl ngah lo cun
thihnak ah in thlenpi ding a si. Thih kan duh hrih lo cun a hakmi thinlung kha
hlon in thinlung thar, theinlung neem thawn thleng a ṭul. Cutin kan tuah thei asile kan nung dam rei thei ding.
Thinlung hak, thinlung ṭha nawn lomi thinlung
cun zianghman ṭhathnemnak in pe thei nawn lo.
Curuangah Pathian hnenah ap awk ringring kan ṭul.
Lunghak in Pathiang kha ziangah siar lomi kan si lonak ding a thupi. Thinlung
thar, thinlung neem thawn tangdor nun nei in nung kan cu thlang a si. Kan
thinlung hakmi cu Pathian hnenah in remsak thei dingin kan ap aw cio hram pei.
A
siartu nan zate’n Pathian in thluasuah tampi’n lo pe cio hramseh. Amen.
Duhdawtnak
le duhsaknak thawn,
PCU, Manila
No comments:
Post a Comment