Baibal
caanghril: “I
sunloihtu sawn kha ka sunloih ve pei ih i hmuhsuamtu cu ka hmuhsuam ve ding” (1 Samuel
2:30c).
Minung kan zate’n sunloih a duh lotu
zohman kan um lo. Sunloihnak co ding kan duh cio. Kan ṭawnṭaihnak in soisel tikah
a duhtu zohman kan um ding ka zum lo. Sunloih pek awk lawng hi kan duh thluh
cio a si. Kan thinlung um daan hi kan zoh tikah kan zate’n khaisanmi si hi a
duh lotu zohman kan um lo ding. Thil fatete pakhat khat kan tuah sunmi a um
tikah cuih kan tuarmi parah midang in in theihpi lawng si loin in porh, in lawm
tikah kan lung a awi zet. Tulai Facebook kan zoh tikah zuk kan post mi si maw,
ca kan nganmi si maw, midang pawlin in lawm, in porh tikah kan lung a kim zet.
Kan zuk a mawi lo zet khal, na mawizet tiah comment in pek cun kan lungawi
lawlaw. Comment ṭha in pek tinte’n a dik thluh lo ti cu kanmahte’n kan
theihthiam a ṭul. Thilṭha tampi kan tuah rero khalle sunloihtu le lawmtu a um
lo ahcun kan thinlung thupte’n kan duh tuk lem lo ding ka zum. Kan langter lo
men a si ko ding.
Cuvekin kanmah in sersiamtu Pathian khal
Amah sunloih le thangṭhat ding hi a duhzet a si. Sersiammi minung hmanin
sunloih kan duh a si ahcun sersiamtu Pathian cun a duh sinsin.Ziangahtile
sunloihnak hmuahhmuah cu Pathian ta a si. Kan Pathian hi sunloih duh Pathian a
si. Amah sunloihtu ding hrimhrim ah a tuahmi kan si (Isai. 43:7). Curuangah,
“I sunloihtu sawn kha ka sunloih ve pei ih i hmuhsuamtu cu ka hmuhsuam ve ding”
a ti (1 Sam. 2:30c). A sile ziangtin Pathian kan sunloih ding? Himi thu thawn
peh aw in Baibal sungih Pathian sunloihtu le an sunloih daan tampi a ummi
sungin mallai kan zoh tlang hnik pei.
1. Pathian
sunloihnak a petu pawl:
a. Josef
Kan thei cio vekin Josef cu a pu Potifar
ih nupi in sual tuahpi dingah a thlem rero nan a duh lo. Minung tisa cak
laifang a siih ol te’n tansan ding cu a ol lo nasa ko ding. Josef in camkhat
sung tisa duhnak dung thlun in cuih thlemnak tlansan lo seh la sualnak tumpi a
tuah ko ding. Sikhalsehla a tlansan ruangah hi Pathian sunloih petu ah a cang
(Seem. 39:7-14). Pathian sunloihnak a pe ruangah mai’ sual lomi sual puhnak
tongin thawng thlaknak tiang a tuar. Nitin kan nunnak sungah sualnak tampi tuah
ding le tuah theimi remcang tampi a ummi pawl cu tansan tahratin Pathian
sunloihtu dingmi kan si. Camkhatte nomnak le duhnak dung kan thlun tikah
Pathian hmin siattertu kan si ṭheu. Pathian sunloihnak petu kan si cio dinghi a
thupi ngaingai.
b. Daniel le
rualpi pawl
Daniel ih nun kan zoh tikah nun
thianghlimnak thawn Pathian hnenah sunloihnak a pek. Daniel ih thuanthu cu kan
theih cio mi a si ko. Siangpahrang ih pekmi rawl ṭha le rawl thawthaw pawl cu a
ei duh hrimrhim lo. Ziangahtile a thianghlim lomi rawl a si ruangah a ei duh lo
tiah Baibal sungah kan hmu (Dan. 1:8). Siangpahrang ih pekmi rawl pawl cu a
thaw zetmi a si ko ding. Sikhalsehla Daniel le a rualpi pawl cun an ei duh
hrimhrim lo. Zumtu pawl in Daniel bangin nun thianghlim nei in Pathian hi
sunloih cio ding hi a thupi zetmi a si.
Daniel ih rualpi pawl Shadrak, Meshak le
Abednego cun an biakmi Pathian an sunloih sawn ruangah siangpahrang
Nabuchadnezzar thupekmi kha an el. Siangpahrang thupek vekin sui milem hmai ah
kun loin Bawipa sunloihnak pe in meisa sungih thlak ding an hril sawn (Dan.
3:16-18). An kaa lawng si loin an nunnak rori in Bawipa an sunloih. Meisa
sungah an paih taktak tikah Pathian in amah sunloihtu Shadrak tei pathum cu a
tansan ve hrimrhim lo. Meisa alh sungih Pathian kutcak a langmi cu
Nabuchannezzar in a hmuh tikah a mang a bang (Dan. 3:24). Meipi sung ihsin ra suak
dingin a ko sal (Dan. 3:25). Cule Nabuchannezzar in ‘Shadrak, Meshak le
Abednego ih Pathian cu thangṭhat si ko seh!’ a ti (Dan. 3:28-29). Pathian in
amah dodaltu kha a lam ṭangah a tuah sal. Anmah
biak lotu kha amah sunloihtu ah a cang ter a si.
c. Paul le Silas
Paul le Silas te khalin an tuahṭuannak
thawn Pathian an sunloih. Pathian thuthangṭha phuan ih an feh vivo nak ah Asia
ram ah phuang dingin tumtahnak an nei. Sikhalsehla anmai’ tumtah le ruahmi
hnakin Pathian ih remruatmi Masidonia lamah thuthangṭha phuan dingin an timtuah
(Tirh. 16:6-10). Anmah tumtahmi vekin fehin thuthangṭha va phuang hngai sehla
harsatnak le buainak an tong lo ding. Sikhalsehla Pathian ih duhnak vekin an
feh tikah buainak le harsatnak tampi an tong. Thawngthlaknak tiang an tuar.
Cutiin Pathian an sunloih a si. Kannih khal kanmai’ duhnak le ruahnak vekin
Pathian hna ṭuan loin Pathian ih duhnak thlunin a hmin sunloih ding hi a thupi
ngaingai.
2. Pathian
sunloihnak a pe lotu pawl:
a. Samson
Samson ih thuhla kan zoh tikah Filistine
kut sung ihsin Israel mipi runsuaktu dingah Pathian ih hrilmi a sizia kan hmu
thei (Thuṭhentu 13:2-5). A thuanthu kan theih thluh cio bangin Pathian in
Samson hnenah cahnak huham thawn lam a hruai. Sikhalsehla Samson in Pathian
duhmi thei cingin thlun duh loin Pathian ih duh lomi tinkim a tuah. Pathian
thupek vekih nungin Pathian sunloihtu ding a si ko na’n Pathian duhnak zin
ihsin a pial. Curuangah a netnak ah amai’ nunnak tiang cemin thuanthu ah hmin
mawi lozet in a tangta a si.
b. Puithiam Eli
le Saul.
Puithiam Eli ih thuhla kan zoh tikah
Pathian hnakin a fapa pawl duhnak a thlun. A fapa pawlin Pathian duh lomi
duhtawk tuah in an um tikah a zoh men. Curuangah Puithiam Eli parah Pathian a
lungawi lo (1 Sam. 2:29). Pathian hnakin a sunloih sawnmi a fapa pawl cu ral
kutah a thither (1 Sam. 4:17). Amah rori khal a tokham ihsin dunglam ah a rilih
a hngawng kiak in a thi (1 Sam. 4:18). Pathian hnakin a dang sunloih sawnmi
thil dang kan neih tikah cuih kan sunloih sawnmi pawl hi Pathian in mitṭhep
karkhat ah in lak sak thluh thei a si. Pathian hnakin sunloih sawnmi kan neih
ahcun mualphonak le hloralnak hrampi a si. Pathian fapa neihsun Jesuh Khrih
pekih in tuahsakmi rundamnak cu a hlo lo ding. Sikhalsehla Pathian sunlawinak cu
kan hnen ihsin in tlansan thei a si.
Siangpahrang Saul ih nunnak khalah amai’
ruahnak in thilṭha a tuahmi hnakin Pathian in amai’ thu pekmi thlun hi a
duhsawn. Saul in a tuah lo ruangah Pathian in a tansan thu kan hmu (1 Sam 15:22-23).
Pathian sunloihnak pek lo tu cu tansan tonnak a siih a netnak ah thihnak a
suahpi.
c. Ananias le Safira
Zumtu hmaisa
pawl in Khristian nun mawizet an nei. Cumi cu thinlung le ruahnak rual aw zetin
an umtlang kha a si. Zohman in a neihmi thilri kha, ka bulta a si, a ti lo. An
neimhi hmuahhmuah kha pakhat le pakhat an ṭawm
aw. Sikhalsehla Anianias le Sapfira tei’ nupa cun an neih thilri an zuarmi lak
ihsin an nupa lungkim in an thup. Cumi cu milai bum a si lo, Pathian an bum a
si (Tirh. 5:1-11). Curuangah an nupa in caan dang veve ah hmakhat te ah an tlu
veve ih an thi. Pathian sunloihnak pe duh loin mai’ hlawknak ruatih hna ṭuan hi zianghman ṭhathnemnak a um lo zia kan hmu thei.
Thunetnak.
Anmah le
nunnak rori ih Pathian a sunloihtu pawl cu Pathian in a sunloih ih a khaisang.
Bawipa Pathian ih sunloihmi pawl cu minung khalin an sunloih ve. Pathian a
sunloih taktaktu pawl hnenah kan Pathian a ummen lo. A phungsuak aw ih
mangbangza a kutcak hmangin thiltitheinak a langter ṭheu. Pathian a sunloihtu pawl cu ziangvek
hmun an thleng ih ziangvek dinhmun an tong khalle Pathian lawng an sunloih.
Josef, Daniel, Shadrak, Meshak, Abednego, Paul le Silas te pawlin anmah le
sinak vekin Pathian an sunloih. Sikhalsehla Pathian hnakin mai’ duhnak thupi
sawnih rettu pawl cun Pathian sunloih hnakin anmah duhnak an thlun sawn.
Curuangah a thokah Pathian ih umpimi, hrilmi an si nain a netnak ah Pathian in
a tansan hngai.
Paul in,“Man
peki ih leimi nan si. Curuangah nan taksa cu Pathian sunlawinak ah hmang uh” (1 Cor 6:20), a ti. Cuihtlunah,“Nan ei ah
siseh, nan in ah siseh, ziang thil nan tuahmi kipah Pathian sunlawinak hrangah
tuah uh” (1 Cor 10:31), a tibet.
Sunloihnak hmuahhmuah cu kan biakmi a
nung PATHIAN ih ta a si.
Duhdawtnak le duhsaknak
thawn,
Rev. CJ Hrang Hmung, D.Min.,
PhD.,
Manila, Philippines.
23.03.2014|11:39 am.
No comments:
Post a Comment