KHRIH IH PEKMI CAHNAK IN

Baibal caanghril: “Cahnak i petu Khrih sungin ziangkim ka ti thei” (Filipi 4:13).

Baibal siarbet: Filipi 2:1-5.

Himi Baibal caang hi zumtu tampi hrangah thazaang kan ngahnak a si. Himi Baibal caang hmangin zumtu pawl pakhat le pakhat thazaang kan pe aw ṭheu. Kanmah le nunnak cio ah thazaang laknak ih kan siar ringring mi khal a si. Himi Baibal caang hi zumtu kan nunnak hrangah sullam a neizetmi pakhat a si.

Paul in Filipi kawhhran hi a duhdawt ngaingai. Cutin a thinlung in a ruat tukmi hi Europe ramah a din hmaisabikmi kawhhran a si ruangah a si thei men. Minung sinak in kan zoh tikah kan tuah hmaisabikmi, kan hmu hmaisabikmi, kan ton hmaisabikmi le kan duh hmaisabikmi tipawl hi thinlung sungah a caam duh ngaingai ṭheu. Paul in Filipi kawhhran hi a seherh ringring ih an zawn khal a ruatzetmi a si timi hi a cakuat sungah fiangtein kan hmu thei a si. Paul cakuat kan siar tikah Paul ih thinlung sungah a thupizet in a langmi thil pathum kan hmu thei.

1. Pitling sinak a langter. (Maturity)

Thungaite’n kan sim a sile Paul hi thawnginn sungih a um lai caan ah minung lam ruah daan ahcun amah hrangah thazang pek ṭulmi le thlacamsak ṭulmi a si. Thinnau laifang ah hnemnak pek ṭulmi a si. Sikhalsehla Paul hi pitling a sinak a langmi cu hnem ṭulmi dinhmun ih a um lai caan ah hnem ṭul dingin a um lo. Hnemhmi si loin hnemtu sawn a si riangri. Thlacamsak ṭulmi si loin midang hrangah thlaza camsaktu a si sawn. Zirh ṭulmi si sawn loin mi zirhtu a si fawn. Himi a dinhmun pawl kan zoh tikah mi pitling a sinak a langter ngaingai a si.

2. Sinak taktak a langter theitu a si (Sincerity)

Paul ih cakuat pawl kan siar tikah thuhla ṭukṭak men a si dah lo. Thubuai hlabuai a um ruangah siseh, thazaang pek ṭulmi a um ruangah siseh, a thinlung sungih a um taktak mi le a nunnak ih a um taktak mi pawl a sinak vek cekci in a langter ṭheu. A thinlung le a nunnak thawn a simmi thu a si ruangah a siartu hrangah le a ngaitu hrang ah sullam a nei ngaingai. Hmual khal a nei zet. Thinlung le nunnak ih a um lem lomi, kaa lawng in kan simmi thu pawl hi a theitu hrangah ngai nuam men fang a si ṭheu. Thinlung le nunnak sungah hnaṭuan in hmual a nei thei dah lo. Thinlung le nunnak in simmi thu in minung nun ah hna a ṭuan ih minung nun a sersiam. Cahhnak hmual a nei zet. Paul cakuat hi kan siar tikah sullam a nei ih cahnak hmual a nei ṭheunak cu a thinlung le a nunnak in a simmi a si ruangah a si. Ti-awternak zianghman um loin a thinlung ih seherh taktakmi pawl kha a sinak vekin a simih a langter ruangah hmual a nei theizet a si. 

3. Mah le mah rinsan theinak (Self confidence )

Paul cakuat hi kan zoh tikah a thu parah amah le amah rinsannak a neihzia a lang nasa. “Cahnak i petu Khrih sungin ziangkim ka ti thei” a ti. Amai’ fimnak le thiamnak in ziangzongza a tuah ngam a ti lo. “Cahnak i petu Khrih sungin” a timi in Pathian ziangtluk a rinsan ti hi a langter fawn. Pathian thawn cun ziang hmuahhmuah a si thei timi hi a sim duhmi a si. Pathian pekmi cahnak thawngin harsatnak le lungawinak, farahnak le lennak, ziang thil poh ton ding khal a ṭih nawn lo. Hlawhtlinnak kan duh vekin sunralnak khal kan ton ngam ve ding a ṭul. Zumtu pawl kan nunnak ah Paul vekin Khrih ruangah ka cak tiin mah le mah rinsan thei ding a ṭul zet.

          Paul in Filipi kawhhran hnenah thusuhnak a tuahmi pawl kan zoh tikah sullam a neizetmi thusuhnak pawl an si (Fil. 2:1-5). Cuih thusuhnak pawl a tawinak in a tanglam bangin kan zoh hrih ding.

a. Khrih thawn nan pehzom awknak ruangah nan nunnak a hnget cuang maw?

Himi thusuhnak phenah a ummi cu Jesuh Khrih sungah nan nung taktak ahcun nan cak ding a si. Amah nih a lo cakter ding a si. Nan cak lo ahcun Khrih sungah nan nung taktak lo tiah a sim duhmi a si. Cahnak le nehnak kan timi hi hmunkhat ih fehtlang ringring mi an si. Jesuh Khrih sungah kan nung taktak ahcun harnak le sualforhnak khal in in neh thei lo dingih nehtu kan sinak a lang ringring dingmi a si.

b. A duhdawtnak in nan hna a lo ngamter maw?

Pathian ih duhdawtnak in nan hna a lo ngamter maw? Jesuh Khrih sungah nan nung taktak ahcun nan hna a ngam ding, ti sim duhnak a si. Hnangamnak le daihnak kan timi hi nu le pa vekin ṭhen theih lomi an si. Daihnak a um lawngah hnangamnak a um ve. Cuih daihnak cu a lenglam daihnak le a sunglam daihnak tiin phunhnih in ṭhen theih a si hrih. Lenglam daihnak kan timi cu thawi awknak, tawng-awknak le thubuai zianghman um lomi khi a si.

Sunglam daihnak hi mit ih hmuh theih lomi sunglam thinlung daihnak le hnangamnak kha a sawh duhmi a si. Curuangah daihnak kan timi in a huap duhmi cu a lenglam le a sunglam a pahnih in a daih lawngah daihnak a um ti theih a si. Daihnak kan timi in sunglam daihnak le thinlung hnangamnak hi a sawh duhmi a si vekin ziangtluk a lenglam zohnak in a daih kan ti khalle a sunglam thinlung sungah thinlung retheih le thinphannak in a khat ahcun a dai kan ti thei lo ding. Thinlung retheihnak hi taksa pum retheihnak hnakin a har deuhmi a si. Thinlung retheinak ruangah ram ṭha, ram nuam le milian ram tampi ah mah le mah thah-awknak a tam ṭheu. Cumi cu thinlung lam retheihnak ruangah a si.

Cumi cu ziangruangah a si kan ti tikah hnaṭuan le a dang ah an buai tuk ih Pathian an biak thei lo. Cutikah an thlarau nun ah a car ruahro. An ruahsannak a hlo cuahco. Cutikah Pathian in in duhdawt a si timi an thei ban nawn lo. Cuticun an thinlung retheih tukih an tuar thei nawn lo tikah nung ding khal an paih nawn lo. Zumtu diktak hrang ahcun kan lung rethei tuk caan, kan duhdawtmi nu le pa, rualpi le pawl ih in theihpi ban lo hman sehla Pathian nih in hmu, in umpi ih in theisak ko tiah kan thei thei. Cumi in kan thinlung cahnak le hnangamnak in pek sal ih an duhdawtnak pawl kan ruat sal tikah kan hna a ngamter sal ṭheu a si. Kan thilrit kha Pathian hnenah ṭhum theinak kan neih hi zumtu pawl hrangah a sunglawi hleice a si.

c. Thlarau thawn pawlkomnak nan nei maw?

Himi thusuhnak ih sim duhmi cu Pathian thawn pehzomnak le pawlkomnak nan neih ringring a ṭul tinak a si. Jesuh Khrih khal cu leitlun a um laiah Pa (Pathian) thawn pehzomnak an nei ringring. Ziangvek a tuah khalle Pa hnenah thla a cam hmaisa ringring. Pathian thawn pawlkomnak thupibik a simi thlacam nun a nei vekin Thlarau (Pathian) thawn pehzom pawlkomnak neih ringring uh, tiah Paul in a sim duhmi a si. Pathian thawn pawlkom pehzomnak thuk deuh kan neih tikah Pathian hnen ihsin a rami Thlarau cahnak thawn kan khat thei. Kan thazaang a tlung sal thei. A zumtu pawl hrangah thlarau thawn pawlkomnak neih hi a thupizetmi a si. Thlacam nun neih hi nehnak nun hrangah a thupi zetmi a si. Pathian ih huham cahnak um daan kan theifiang a ṭul.

Himi thu thawn pehzom in Mipum Siarnak 13:1-14:38 sungah Kanaan ram thlingthlatu minung 12 sungah mi 10 cu a cang thei lo ding lam thlirin a hmu tu an si. Pathian ih cahnak an hmu ban lo. Curuangah Kanaan ram an thleng thei ve lo. A dang 2 a simi Joshua le Kaleb cun a ṭhatnak lamin (Thlarau cahnak hmangin) a si theinak an hmufiang ngah. Pathian ih cahnak an nun in an tep ngah. Curuangah Kanaan ram ah tluangte’n an lut thei, tiah kan hmu. Thlarau thawn pawlkomnak neitu kan si ringring ding a thupizet.

Thufunnak.

Paul ih nunnak ah a neihmi sinak pathum a simi pitling sinak, a sinak vekin langter theinak le mah le mah rinsan-aw in thinlung khohnak a neihmi pawl hi zumtu kan nunnak ah kan neih ṭulzetmi an si. Cumi cu kanmai’ cahnak ruangah a si lo. Jesuh Khrih ih pekmi cahnak thawngin a siih ziangvek thil kan tuahmi poh ah ralṭhatnak in petu, tuah theinak in petu a si timi hi Paul ih nunnak le cakuat ih in zirh duhmi a si. Kanmai’ cahnak rinsan aw ding kan si lo. Cuhnak in “Cahnak i petu Khrih sungin ziangkim ka ti thei” timi Paul ih ṭongkam vekin Jesuh Khrih thawngin a cak ringring mi kan si sawn.

Duhdawtnak le duhsaknak thawn,

Rev. CJ Hrang Hmung, D.Min., PhD.,

Manila, Philippines.

30.03.2014|00:21 am.