Baibal Caanghril:
“Harsatnak cu nan pa ih pekmi nunsimnak a si tiin tuar hram
uh; ziangahtile harsatnak nan tonmi hin Pathian in a faate ah a lo ruat a sit i
a langter. A pa ih nun a sim lomi fa a um dah keel maw? A faate pawl a hrem ih
nannih bul a lo hrem lo ahcun faate ngaingai nan si lo, fasawn nan si ti a sawh
ding” (Hebru 12:7-8).
Baibal
siarbet: Hebru 12:1-11.
Leitlun minung
hmuahhmuah cu harsatnak a tong lomi zohman kan um lo ding. Harsatnak cu a tam
le a mal kan tuar cio mi a si. Kan tuar daan lawngte cu a bang aw lo thei men.
Harsatnak kan tong ṭheunak thu kan zoh
tik khalah pakhat le pakhat an bang aw lo dingih thuhla a phunphun in a um ko
ding. Mi hrekkhat cun nasazet ih a tuartu an um ih, mi hrekkhat hrangah cun
mallai an tuar ṭukṭak
men, mi hrekkhat tla cu zianghman reltlak lem lo khal a um ṭheu.
Ziang a si khalle ziang ruangah harsatnak kan tong ṭheu
timi thu hi ruah ding a tlakzetmi thu pakhat a si, ti’n ka ruat. Harsatnak kan
tong ṭheumi hi thu a phunphun
ruangah a sit i cu kan thei. Khristian nun kan pitlinnak dingah in zirhtu,
dinhmun khoh ih ding hnget theinak dingah in remtu a si, ti hi ka hmuh daan a
si. Hebru cangantu cun harsatnak kan tong ṭheumi
hi nun simnak a si tiah a sim.
Minung kan sualnak ruangah a si:
Minung pawl
harsatnak kan tuar ṭheumi hi kan sualnak
ruangah a si; A dik thluh lo tiah a eltu khal kan um ko ding nain thudik pakhat
cu a si hrimrhim. Pathian ih thupekmi kha ngai loin kanmai’ duhduh in kan nung.
Curuangah a netabik ahcun harsatnak kan tong. David in Uriah nupi Bethsheba a
sualpi ruangah a innsungsaang ah harsatnak a tong (2 Sam. 11:1-26). A fapa
Amnon in a farnu Tamar a sualpi (2 Sam. 13:12-14). A fapa Absalom in a fapa
Amnon a that (2 Sam. 13:26-29). A fapa Absolom in a siangpahrang tohkham a long
ih amah thah ding in a do (2 Sam 15).
David harsatnak hi amai’ sualnak ruangah a si.
Kannih khal sual ruangah vei tampi harsatnak
kan tong ṭheu ding. Sualnak man
cu thihnak a siih cumi cu kan aat a ṭul
hrimhrim mi a si. Kan Baibal ca sung khalah fiangte’n a simmi a si. Hrial a
theih lo (Rom 6:23). Asinain kan tuar dingmi nasatuk lo dingin David vekin siirnak
thinlung thawn Pathian hnen ah ngaihthiam kan dil ding hi a thupizet. Pathian in
ngaithiam thei lomi a nei lo. Mi ngaithiam theitu Pathian a si. Kan sualnak
ziangtluk in a tum, a tam khal le Pathian in a ngaithiam thei thluh. Sualman
harsatnak in tuarter khal asile Amai’ thazang peknak in kan tuar thei ding.
Kan umnak hi leitlun hi harsatnak ram a si.
A laangte’n kum
tawkfang sung kan umnak hi leitlun hi harsatnak ram a si. Pathian sersiammi
minung hi sualnak sungah an tluksia hnu ah Pathian in hi leitlun cu a siatcam
ruangah harsatnak ram ah a cang (Seem. 3:14-20). Leitlun hi Amah (Pathian) thei
ding le a duhzawng ih um thiam theinak ding zirnak ram a si. Curuangah
harsatnak hi a um ringring ding. Khuahlan ihsin a um zo, atu khal a um ih neta
a ralai ding caan khalah a um vivo hrih dingmi a si. Hlan ih zumtu pawl in hi
leitlun hi umtlak in an ruat lo. Pathian in an hrang dingih a sersiammi vanram
lam lawng an thlir ringring (Heb. 11:16, 38).
Mi zovek khal
tlawngta a si hnu hnu cun camipuai tuah ding hi a ṭuanvo
hrimhrim a si vekin leitlun ih kan um cun harsatnak a um tengteng ding. Cumi cu
nitin kan ton dingmi camipuai a si. Hrial theihmi a si hrimhrim lo. Pathian thu
thuksimmi kan theih theinak dingah le kan nunpi theinak dingah in zirh ṭheumi
a si. Kan Bawipa Jesuh Khrih hman harsatnak a phunphun a tuar. Sualnak
zianghman nei lomi a si ko nain kan sual hmuahmuah a phur thluh. Sikhalsehla Bawi
Jesuh in cuih harsatnak hmuahhmuah cu a neh. Kannih zumtu pawl khal Jesuh Khrih
ih pekmi cahnak thawngin nehtheinak thazaang kan nei ve (Filipi 4:13). Tuar
theinak thazaang khal in pe (1 Pit. 1:3-9; 4:12-19).
Pathian in kan dinhmun khaisan in duh.
A hmaisa ah Josef
cu a u le pawl in an that tum. Asinain an that ngam ngaingai sal lo ih a netnak
ahcun sal ah an zuar. Izip ram ih a um lai ah Potifar nupi in a uar ih amah sualpi dingin a sawm nan a duh
lo ruangah thawng thlaknak khal a tuar. Josef ih nun kan zoh tikah a tuarmi
harsatnak pawl cu amai’ sual ruangah a si lo. Pathian in a cawisang duh ruangah
a si. Izip ram ah a u le pawl in zuar lo ta sehla ziangtin Izip ram
siangpahrang sangtu ah a cang thei ding? Cuih tlunah thawngtla lo ta bang sehla
teh ziangtinso Faro ih mang cu a let thei ding? Faro ih mang manmi cu a thei
ngah lo ding. Josef in cuih harsatnak pawl cu phunzai lo le thanau lote’n a
tuar thei ruangah a netnak ahcun Faro sangtu bawibik ah a cang a si kha! (Seem.
37-41)
Kannih zumtu pawl khal Pathian in in cawisang duh tikah harsatnak
kan tong ṭheu men ding. Cutikah
thinsau lo le thinheng in midang parah lole Pathian kan mawhthluk asile
ziangtinso Pathian in cawisang thei ding? A siat theimi sui hman khi meisa in
hniksak a si ṭheu (1 Pit. 1:7).
Cuticun sui ṭha ah a rak cang.
Tlawngta pakhat cu camipuai tuahnak khaan sungah camipuai tuah duh loin Saya
pawl sawn kan va kawk, kan va to ciamco le ziangtinso camipuai kan tuah thei
ding? Camipuai tuah loin ziangtinso camipuai kan ong thei ding? Camipuai ong
loin ziangtinso Saya pawlin in cawisaang thei ding?
Curuangah atu ihsin
harsatnak kan tong tinte’n camipuai ka tuah a si. Pathian in in cawisang tum
thlang a si tiin kan ruat asile lungawizet le thinnuamzet in kan tuar thei ding
a si. Harsatnak tong loin pitlinnak ah kan thleng thei lo ding. Harsatnak tel
loin Pathian ih kutcak le mangbangza a lang thei lo. Jesuh Khrih ih mangbangza
a tuahmi pohpoh khal hi harsatnak a um hmaisa ruangah a si. Mithi a thawhter
theinak dingah mithi um hmaisa a ṭul.
Tisuar a daiter theinak dingah thlisia a hraang hmaisa a ṭul.
Curuangah Pathian ih kutcak a lang theinak dingah harsatnak kan tong hmaisa a ṭul
hrimhrim ti hi cing ṭha ringring uhsi.
Satan ih iksiknak ruangah a si.
Harsatnak kan tonmi
hi Satan ih iksiknak ruangah khal a si ṭheu. Pathian in Job thu ah a zumhnget zia thu a
sim tikah satan ih iksiknak thu kan hmu thei. Job cu a sual lo nan Pathian
hnenah a heek ih Pathian in a salpa Job
dinhmun a rin ruangah Satan hnenah harsatnak pe ding in khuan a pek hngai (Job
1:1-22; 2).
Cuvekin kannih khal Pathian in in rin ruangah Satan hnenah
hnaihnok thei dingin khuan a pek ṭheu
caan a um thei a si. Asinain beidong ding zianghman a um lo. Job ih thuanthu kan
siar asile a netnak ah Pathian in Job cu thluasuah tampi a pek sal ti kan hmu
thei. Cuvekin kannih khal harsatnak tampi kan ton hnu ah Pathian in kan ruah
ban lomi thluasuahnak sim le relcawk lo in pe ve ding.
Curuangah kannih zumtu pawl
hrangah cun Pathian in harsatnak um lonak hmun vanram in sersiam sak cia a si.
Cuih ram kan thlen hlan ah a hmaisa in hi leitlun harsatnak ram ah a laangte’n
kum ziangmaw zat sung kan um lawk. Hi leilungpi hi atu ahcun Satan ram a si ti
sehla kan palh lo ding. Himi Satan ramah nuam tuk in kan um pang asile kan
umnak ding hmun ngaingai vancung ram kan ngai lo pang thei. Mi tamsawn cu hi
lei Satan ram ah nuam kan duh tuk. Curuangah vanram lam an thlir duh lo, hi leitlun
nun ah nuam kan ti tuk. Thih ding hman kan paih lo, kan ngam lo, kan duh lo.
Asinain in duhdawttu kan Pathian in harsatnak hmangin leitlun kan hua theinak
dingah a tuah ih vancung ram kan ngai theinak dingah in timtuah sak a si.
Thunetnak
Curuangah harsatnak
kan tong tinte’n hi leitlun ta kan si lo. Vanlam lam zoh le hoi dingmi kan si
ti kha ciing sal ṭheu uhsi. Asinain
leilung ah um hrihmi kan si timi thudik cu kan hngilh hram lo pei. Harsatnak
kan ton tinte’n ruahsannak in nei thar sal ṭheu.
Pa in a duhdawtmi faate pawl hi nun a sim ṭheu.
Cumi cu a faate ṭhatnak ding hrangah a
si. Baibal caanghril ih kan tarlangmi hi kan nun in zirhtu a si. Jesuh Khrih
thawngin nehnak kan neihmi kha thei ringring in, Pathian in thlangamnak le tuar
theinak le ruahsannak in pe ringring hram seh! Amen.
Duhdawtnak
le duhsaknak thawn,
Rev.
CJ Hrang Hmung, DMin., PhD (Dev. Adm student)
PCU, Manila,
Philippines.
Edited 3/11/2013.
No comments:
Post a Comment