Baibal Caanghril:
“Ton a theihlai ah Bawipa cu hawl uh.
A nai lai ah Amah ko uh. Miṭha lo in an ziaza
tlansan in an ruah daan thleng hai seh. Bawipa kan Pathian hnenah kir hai sehla,
a ngaidam lohli ding. Amah cu mi zaangfahtu a si” (Isaiah 55:6-7).
“Hi ram sungih paam ka tlunter ding ni
a ra thleng cing ding. Mipi pawl cu an ril a rawng ding na’n rawl duh rilrawn a
si lo ding; an ti a haal ding na’n tidai duh tihaal a si lo ding. Bawipa ih ṭongkam theih duh rilrawng le tihaal an si ding.
Cungungbik Bawipa keimah in ka sim zo a si. Mi pawl cu saklam in thlanglam ah,
nisuahnak in nitlaknak ah an vakvai ding. Khuazakip ah Pathian ih ṭongkam an hawl ding na’n an hmu lo ding. Cuih ni ahcun
fala le tlangval harhdamzet pawl hman tihaal in an bah an ril ding” (Amos
8:11-13).
Thuthoknak
Baibal
caanghril Isaiah 55:6-7 kan zoh tikah ton a theihlai ah Bawipa hawl a ṭulzia in
simmi kan hmu thei. Himi thu in a langtermi cu Bawipa hi kan hawl rero ding nain,
kan tong thei nawn lo caan a um leh ding ti a langter a si. Cumi cu Profet Amos
ih sim ciami sungah kan hmu thei (Amos 8:11-13). Tuihsun kan sinak le
thilcangmi pawl kan zoh tikah Bawipai’ ni le caan a nai zia hi kan hmu thei. Tulai
kan leilungpi hmun tinkim ih thilcang pawl kan zoh tikah Bawi Jesuh ih a simmi
thu pawl hi a kim vivo thlang ti hi a fiang ngaingai (Mat. 24:4-14; Mar.
13:3-13; Luk. 21:7-19). Baibal ih a simmi pawl el tum khal sehla a famkim rero
ti cu el theih a si lozia a lang vivo.
Curuangah
ton theih in a um lai ah Bawipa cun kan hawl a ṭul. Ton a theih laiah kan
nunnak in Bawipa cu kan tong taktak zo maw? Atu hi zaangfahnak caan a si lai
ruangah Pathian ih zaangfahnak tumpi kan co hrih lai. Pathian thu hi sim le
phuangtu a um laiah zianghman kan siar duh lo ih kan um ahcun ton theih lo caan,
ngai ding um nawn lo caan a um leh ding timi hi kan theih cia sehla a ṭha ding. Ton a theih lo caan a thlen
ni ah Bawipa cu kan hawl, kan ko rero khal le man a nei leh nawn lo ding. A tu
hi Bawipa ton theinak caan ṭha duhumzet kan neih lai fang a si, ti hi hngilh
hlah uhsi.
1. Ton a theih laiah Bawipa kan hawl ding (Isaiah 55:6-7).
Pathian
in amai’ hmuihmel kengin minung in sersiam. Asinain cuih minung cun Pathian duh
lomi sualnak kan tuah. Curuangah Pathian thawn ṭhen awknak a suak tiah Seemtirnak
3 sungah kan hmu. Isaiah 59:12 sung kan zoh asile kan sualnak a tam tuk ruangah
cuih kan sualnak in in mawhthluknak thu kan hmu thei. Minung kan siih kan
famkim thei lo. Vei tampi kan nunnak ah leitlun sualnak tampi kan tuah ṭheu ih
sualnak sungah kan tlangleng. Cuticun Bawipa thawn hlat awk caan tampi kan nei
ṭheu. Sikhalsehla Bawipa Pathian cun amai’ hmuihmel le pianhmang kengih sersiammi
kan si ruangah hloral tamen ding cu in siang hrimhrim lo. A hnen kirsal dingah
in hngak rinring lai. Ngaidamnak sangka kauzet in ong sak ringring lai. Minung
cun ngaithiam thei lomi kan nei ṭheu nain Pathian cu ngaithiam thei
lomi a nei lo; kan sualnak zate’n in ngaithiam theitu a si. Amah cu mi
zaangfahtu a si, tiah Isaiah cun a sim.
Curuangah
misual kan si khalle Pathian in caan ṭha sunglawi in pek. Amah kan hawl
theinak dingah le tong thei dingah caan ṭha in pek hrih. Kan thinlung
duhnak taktak thawn kan hawl ding hi a ṭul zetmi a si. Baibal sungah, “Cutawk
ahcun Bawipa nan Pathian cu nan hawl dingih nan thin le nan lung taktein nan
hawl ahcun Amah cu nan tong ding,” tiah kan hmu thei (Daan Peksalnak 4:29). Israel
pawlih nunnak kan zoh tikah sualnak a phunphun le anmai’ duhnak tampi ruangah Bawipa
thawn a hlat aw ringring ṭheunak a si. Asinain cuih sualnak
ihsin Bawipa hnenah an kirsal tikah Bawipa in a ngaithiam ih a cohlang
ringring. Curuangah kan sualnak ziangtluk tam khal hai sehla Bawipa cu ton
theih a si lai ruangah kan sinak, kan umnak hmun ihsin Amah kan hawl cio ding
hi a thupizetmi a si (Isa. 55:6-7). Pathian thudik, thutak tampi theih ding le
siar ding a um laiah ziang siar loin um pang hlah uhsi. Simtu le ngantu an um
nawn lo tikah a poi tuk aw, tiah kan aihram leh pang ding.
2. Pathian kan hnenah a um (Is. 7:14; Mat. 1:23).
Hlanlai
Israel mi pawl cun Pathian hi Israel ram lawngah a um tiah an ruat. Jerusalem
biakinnpi sung lawngah Pathian a um a si, tiah zumnak an nei: “Na umnak Zion
Tlang cu ciing ringring hram aw” an ti (Saam 74:2). Curuangah ramdang, hmundang
an thlen tikah Pathian in in tansan zo a si, tiah an ti ṭheu. “Babilon tiva kap ah kan to
ih kan ṭap. Cutawkah kan ṭap, Zion kan ngai caan ahcun,”
tiah Jerusalem cuan in Saam hla tiang an sakmi kan hmu (Saam 137:1). Daniel
khal nikhat veithum thla a cam tikah Jerusalem lam hoi in thla a cam ṭheu (Daniel 6:10).
Gnostic
timi zirhnak sual phunkhat pawl ih thuzirhnak khalah Pathian cu hmun hlapi ah a
um. Ziangahtile a thianghlimmi Pathian cu a borhhlawhmi minung hnenah a um thei
lo. A thianghlimmi le a borhhlawhmi cu hmunkhat ah a um thei lo a si, tiah an
ruat. Cuih an ruahnak cu mipi hnenah an zirh ṭheu. Sikhalsehla Baibal in fiangzetih
in simmi cu Pathian kan hnenah a um (Immanuel), ti hi a si (Isa. 7:14; Mat.
1:21). Saam cangantu khalin, “Bawipa cu ka hnenah a um; zianghman ka ṭih lo ding” a ti (Saam 118:6).
Curuangah
tuini zumtu diktak pawl cun Pathian kan hnenah, kan nun sungah a um taktak a
si, ti hi kan thei cio. Kan nunnak in kan tep cio. Pathian cu kan hnenah a um
ruangah Amah ton ding a har lo. A hrangah kan thinlung sangka kan ong le ong lo
thu lawng a si. Cutin asile kan hnenah a um ringringtu Pathian cu tong loin maw
kan um? Innsang pakhat sung um ringring cingin tong aw lo ih kan um ahcun kan
innsang ih pehzom awknak ah sammi a nei ti a lang ter. Cuvekin Pathian kan
hnenah a um cingin amah kan tong ngah lo ahcun Pathian thawn kan pehzom awknak
ah sammi a nei thei. Kan pehzom awknak kha ṭhatein kan cekfel sal a ṭul.
3. Pathian thu ih paamnak (Amos 8:11-13)
Pathian
thu hi kan ke hrangah mei-inn a siih kan lamzin hrangah tleunak a si, tiah Saam
cangantu in a simmi kha hngilh hlah uhsi (Saam 119:105). Zumtu pawl kan nunnak
ah Pathian thu tel loin kan nung pang ding hi ṭih a nungtukmi a si. Pathian thu cu kan nun in hruaitu a si.
Nunnak lamzin dik kan zawh theinak dingah in zirh, in simtu a si. Cuih Pathian
thutak cu kan hrangah sim le phuang in, ngankhum in a um lai. Cumi cu ziangsiar
loin kan um san men ding maw?
Profet
Amos ih simmi kan siar tikah Pathian in kan ram sungah paam a tlunter ding ni a
ra thleng cing ding, ti a si. Cuih thu cu zumtu diktak hrangah cun rapthlakza
ngaingai a si. Mi hrekkhat in cuvek cu a cang thei lo tiin tla kan ruat men
thei. Minung ih ṭongkam men sisehla zum dingah a har thei men ding.
Sikhalsehla himi hi Pathian thawkhummi Baibal sungih ngankhummi Pathian ṭongkam a si, ti hi hngilh hlah
uhsi. Cuih paam a tlunter dingmi khal hi a mak zet. Rilrawng paamnak a si lo
ding. Ti in ding um lomi tihaal paamnak khal a si fawn lo ding. Cuih paam cu
Pathian ih ṭongkam theih duh rilrawng le tihaal an si ding, tiah
Baibal in a sim (Amos 8:12). Cuih paam a tlun tikah Pathian thu ngai duhah mi pawl cu
saklam in thlanglam ah, nisuahnak in nitlaknak ah an vakvai ding. Khuazakip ah
Pathian ih ṭongkam an hawl ding na’n an hmu lo
ding. Cuih ni ahcun fala le tlangval harhdamzet pawl hman tihaal in an bah an
ril ding” tiah Baibal in fiangte’n in si (Amos 8:11-13).
Curuangah duhdawtmi zumtu u le nau,
tuini ah Pathian thu ngai ding kan neih hi Pathian kan thangṭhat ding a si. Pathian thu siar ding kan neih hi
lungawi ding kan si. Pathian ṭongkam theih duh
paam a tlun taktak ahcun rilrawng le tihaal paam hnakin a besia sawn ding.
Rilrawng le tihaal paam a tlun tikah ziangtluk a harsa ti cu Baibal sungah
siseh, kan kiangkap ih kan theih, kan hmuhmi in siseh ka theifiang cio ko ding.
Thunetnak
Duhdawtmi
zumtu u le nau pawl, tuini hi nang le kei hrangah Bawpa thawn tong-aw thei
dingin caan ṭha duh umzet kan nei lai. Bawipa thawn hlatnak hmun ah
kan um pang ahcun atu hi Amah kan hawl caan cu a si. Ton theih laiah Bawipa cu
hawl cio uhsi. Kan biakmi a nung Pathian cu ton theih dingin kan hnenah a um
ringring lai a si. Pathian thu thei dingah simphuangtu an um lai ah thinlung
takte’n ngai duhnak thinlung thawn ngai cio uhsi. Pathian thu le hla ṭhaṭha siar ding a um laiah zaangzel
loin duhnak taktak thawn siar uhsi. Hebru cangantu cun, “Ziangahtile Pathian a
pantu in Pathian a um, ti le amah a hawltu hnenah hawlman laksawng a pe ti an
zum a ṭul a si” (Heb. 11:6) a ti. Kan Pathian cun amah a hawltu pawl a cohlang lawng
si loin hawlman laksawng khal a pek theitu a si. Cutin a si lo ahcun ton theih lo
caan a thleng lai dingih cuih caan ahcun siirman a um nawn lo ding. Pathian thu
ih paamnak a tlun hlanah Patian thu theih ding a um, siar ding a um laiah le
ton theih a si laiah Amah hawltu kan si cio ding hi a thupizetmi a si.
Hi
thu hi Pathian in Amai’ hmin sunglawinak hrangah thluasuah pe ko seh! Amen.
Duhdawtnak
le duhsaknak thawn,
Rev.
CJ Hrang Hmung, DMin., PhD (Dev. Adm student).
PCU,
Manila.
September
7, 2013/1:40pm.
No comments:
Post a Comment