Baibal Caanghril:
“Ka hmin in kawhmi ka minung pawl in
ka hnenah lungsiir in thla an cam ih ka mithmai an hawl ih an thil ṭha
lo tuahnak ihsin an kirsal a si ahcun van in an thlacamnak ka thei dingih an
sualnak ka ngaithiam ding ih an ram cu ka damter ding.” (2 Sansiarnak 7:14).
Baibal
siarbert: Seemtirnak 19; Hosea 4:1-3.
Tulai kan leitlun dinhmun kan zoh
tikah a him nawn lo. Duh a um lozet. Ral awknak a tam. Ram pakhat le pakhat,
miphun pakhat le pakhat do-awk le to-awknak hlir in a khat. Hmun tinkim ah thil
a phunphun kan theih dah lomi a cang. Atu le atu ling a hnin. Harsatnak a
phunphun in a khat ti cu kan theih cio mi a si. Kan theih dah lomi natnak a
phunphun a suak vivo. Biaknak lam thu khalah Pathian thu kan duhzet vek a bang
na’n a hmin men ih zumtu kan tam vivo. Zirhsualnak khal a tam deuhdeuh. Pathian
thutak hnakin ṭongthiam, simthiam zet pawlih ṭongkam nal zutzo ih an sim, an phungmi thuphan le
phuahcop thu pawl kan uar sawn a bang. Kan khawm ding caan khalah Pathian thu
hnakin Korea movie pawl nih in thlem ih khawm thei loin kan um vivo. Mipa le
mipa, nunau le nunau ṭhit awknak tiang a pung
vivo. Online le groupmail pawl khalah Pathian thutak hnakin leitlun khawvel thu
ah kan buaipi paih sawn. Pathian thu a ngan ringring pawl cu mi bang lo vek an
si vivo. Kan dinhmun kan zoh tikah Noah san ih thil cang bangin kan um vivo ti
hi el theih loin a fiang nasa.
Tuisun kan dinhmun hi Pathian thu in
siseh, kan leilung sinak le thilcangmi pawl in siseh ṭihnungza
dinhmun ah kan thleng vivo ti a faingzet a si. Curuangah kan leilungpi a dam
nawn lo timi hi thei cio in Bawipa Pathian hnenah napi’n thlacam kan ṭul a si (2
San. 7:14).
Kan caanghril 2 Sansiarnak 7:14 kan
zoh asile kan leilungpi a dam nawn lo ruangih Solomon ih thlacammi kan hmu. Cuih thlacammi parah Pathian ih a simmi thu 4 tuah dingah a dilmi le tuahsak dingih thu a kammi khal kan hmu.
(1) Lungsiir Tangdornak
nei ding.
Mi zovek khal tangdor ih nung thei
ding hi kan harzet. Thiamnak, theihnak, lennak le sinak pawl kan neih tikah
cuih kan sinak pawl parah kan uar aw ṭheu.
Biaknak lam ih kan lut deuhdeuh, Pathian thu kan thei deuhdeuh tikah kan
puarthau deuhdeuh a bang. Hlan kan pipu pawl cu Pathian thu an theihmi a malzet
na’n an theihmi vekin an nunpi. Tusan zumtu pawl cu kan theihmi tamtuk zo na’n
khat lam hna in a lut ih khat lam hna in a suak thluh sal. Kan thinlung sungah
a tuhlut thei lo. Luka 18:9-14 sung kan siar asile Farasi le Siahkhongpa ih
thlacamnak thu kan hmu. Farasi pa cu amah le amah Pathian mi tiah a ruat aw ih
a puarthau zet. Siahkhong pa cu a tuahmi pawl a thei aw tikah a sualnak a hmu
aw ih Pathian hmaiah thinnau le lungsiir le tangdor in a um. A netah ah Jesuh
Khrih in hi te pahnih thlacamnak thu thawn peh aw in, “Fiangtein ka lo sim:
Farasi mi pa si loin siahkhongtu pa sawn kha inn ih a tlun tikah Pathian hmaiah
thu ding cotu a si. Ziangahtile zokhal amah le amah a khaisang awtu cu namthlak
a si ding ih tangdortu cu khaisan a si ding,” tiah a ti” (Luk. 18:14). Piter
khalin tangdornak ih a thupitzia hiti’n a sim ve: “Nan zate’n tangdornak thawn
thuam aw uhla pakhat le pakhat bawm aw uh. Ziangahtile Ca Thianghlim in, ‘Mi
hngal pawl cu Pathian in a dodal ih tangdormi cu mithmai ṭha a pek a si,’ tiah a ti. Curuangah a cakmi Pathian
ih kut hnuai ah tangdorte in um uhla amah in caan a kim tikah a lo khaisaang
leh ding.” (1 Pit. 5:5-6).
(2) Pathian mithmai
hawl ding.
Pathian mithmai hawl ti tikah amah
Pathian rori a hmel kan hmu thei lo ding. Hinah sim duh sawnmi cu Pathian ih
duhnak kan hawl cio ding kha a si. Asile Pathian duhnak cu ziangtin kan hawl
ding? Bawi Jesuh cun Matthai sungah hiti’n fiangtein in sim: “Cuhnakin Pathian
Uknak le a felnak hawl hmaisa sawn uhla thil dang hmuahhmuah cu a lo pebeet
ding a si” (Mat. 6:33). Pathian thu sungah kan um ih Baibal ca ih in zirhmi
bangin nitin Baibal siar, thlacamnak nei in kan kiangkap ih ummi kan innhnen
pawl kan duhdawt ding. Kan zate’n Pathian hmuihmel keng ih sersiammi kan si
timi cingkeng cio in kan minungpi pawl ih siatnak tuah sawn loin ṭhatnak hrangah a tuahtu kan si cio ding hi a thupi
ngaingai. Cuticun Pathian mithmai kan hmu ngah thei ding a si.
(3) Thlacam ding.
Zumtu le thlacamnak cu ṭhen theih lomi a si. Thlacam thu cu kan nun ih kan
hman ciomi a si ruangah tampi ka sim bet nawn lo ding. Hinah hmun ih thlacam
ding thu thawn peh awin a simmi cu thlacam menmen kha si loin Bawipa hmaiah
lungsiir in thlacam ding kha a si. Bawi Jesuh hmin in thinlung tak le lungsiir
in kan ram damnak ding hrangah thla kan cam ahcun Pathian in a kim ter tengteng
ding. Jesuh Khrih in, “Cuih ni a thlen tikah cun zianghman in sut nawn lo ding.
Thungai in ka lo sim: ka hmin in nan dilmi hmuahhmuah cu ka Pa in a lo pe ding.
Atu tiangah ka hmin in zianghman nan dil dah lo. Dil uh nan ngah ding; cuticun
nan lungawinak cu a kim ding” (Joh. 16:23-24) tiah a simmi kan hmu thei.
(4) Thil ṭha lo tuahnak ihsin kirsal ding.
Minung hi thilṭha
tuah hnakin thil ṭha lo tuah hi kan duh deuh ṭheu. Mi ṭha mi famkim ah kan ruat
aw thluh nain kan famkim lonak thu hi Baibal sungah fiangte’n in sim. “Ca
Thianghlim in: ‘A dingmi zohman an um lo, A fimmi pakhat hman an um lo, Pathian
biatu khal an um lo. An zatein Pathian hnen ihsin an pial thluh ih, zinpeng an
zawh ṭheh zo. Zohman thildik a tuahtu an um lo.
Pakhatte hman an um lo. An ṭongkam cu thihpi
tlakmi bumnak hlir a si; An lei ihsin ṭihnungza
thuphan pernak a suak; An hmur ihsin thihsii, rul tur bangtuk a suak. An ṭong cu mi camsiatnak hlir in a khat” (Rom 3:10-14). Ziang a va si khalle kan tuah palhmi kan theih ahcun kirsal
thiam ding hi a thupi. Kan kirsalnak ding lamzin khal Bawi Jesuh in in onsak
cia zo. Bawi Jesuh in, “Keimah cu lamzin le thutak le nunnak ka si.
Keimah hnenin siar lo zohman ka Pa hnenah an thleng thei lo” a ti (Joh. 14:6).
(5) An ram cu ka
damter sal ding.
Himi ṭongkam
hi a thupizet ih a thukzetmi a si fawm. Pathian cu lei le van le ziangkim
sersiamtu a si ti cu kan theih cio mi a si. Pathian in a sersiammi pawl pakhat
hnu pakhat a zoh tikah a ṭha a tiih a lungkimzetmi a si (Seem. 1). Jeim khalin,
“A ṭhamile a famkimmi laksawng hmuahhmuah cu vancung ihsin a rami an si.
Vancung tleunak a tuahtu Pathian hnen ihsin a rami an si”, tiah a ti (Jeim
1:17). Sikhalsehla minung ih kan duhhamnak le ṭhat lonak ruangah kan ram hi a
siat ṭheh thlang. Hosea cabu sungah, “Maw Israel, a simmi hi ngai hnik:
‘Hiram sungah hin duhdawtnak a um lo ih rintlak sinak khal a um lo. Minung pawl
in an Pathian ah in ruat lo. Mi an camsiat, thuphan an per, mi an that, ruk an
ru, nupi le pasal pawl in midang an ngai san. Thiisen luannak a karh vivo ih mi
thahnak pakhat hnu pakhat a um. Curuangah hi ram cu a caar dingih ram sungih
nunnak a neimi hmuahhmuah an cau ṭheh ding.
Ramsa le vate hmuahhmuah le nga hman an thi ṭheh
ding,’ a ti” tiah kan hmu (Hosea 4:1-3).
Cutiih a siat zomi kan ram cu a ṭhat theisalnak dingah Solomon in thla a cam. Cutikah Bawipa
cu Solomon hnenah a langih, “Ka hmin in kawhmi ka
minung pawl in ka hnenah lungsiir in thla an cam ih ka mithmai an hawl ih an
thil ṭha lo
tuahnak ihsin an kirsal a si ahcun van in an thlacamnak ka thei dingih an
sualnak ka ngaithiam ding ih an ram cu ka damter ding,” a ti (2 Sansiarnak 7:14).
Thunetnak
Duhdawtmi zumtu u le nau pawl, tuni ah
a siat cuahco mi kan ram tungding sal dingah le a dam sal theinak dingah zumtu kan
zatein ṭuanvo tumpi kan nei. Pathian
thu hi ziang siar lo in, leitlun duhnak le hiarnak ah kan caan ṭha
pawl kan hman liam thluh ahcun a poi nasa ding. Caan ṭha
kanneihmi pawl hi pamhmai a um tuk ruangah man neizet ih hmang thiam ding kan ṭul.
Kan ram damnak ding hrangah kan nunnak rem aw in, kan thinlungput daan pawl remṭhat
sal in, Bawipai’ remruat vekin a mihman kan si theinak dingah kan nun kan hlan
awk a ṭul. Kan ap awk a ṭul.
Thinlungtak in kan sinak hmuah phorh thluh in Pathian hmaiah kan pankir sal a ṭul.
Cutin cu Pathian ih ngaithiamnak kan co dingih kan ram a dam sal ding. Kan duh
lozetmi biaknak dang, sakhua dang khal kan ram sungah a lut thei lo ding. Pathian
lawng rinsan in kan umnak hmun cio ihsin ṭangrual
cio ding kan ṭul. Duhsaknak tumpi
thawn thazang lakin kan ṭangrual
a ṭul.
Kan ram damnak dingah Pathian in a thu
humhim in thluasuah in pe cio hram seh! Amen.
Duhdawtnak
le duhsaknak thawn,
Rev. CJ Hrang
Hmung, D.Min., PhD (Dev. Adm student)
PCU, Manila.
Aug 31, 2013/23:40.
No comments:
Post a Comment