(To Live by the Will of GOD)
Baibal Caanghril:
“Khrih
cu a taksa in harsatnak a tuar ruangah nannih khal amah ih thinlung neihmi
bangtuk nei in nan thinlung khohter uh. Ziangahtile taksa harsatnak a tuartu cu
sualnak sungah a tel nawn lo a si. Curuangah a tuih thok ihsin leilung tlun
nunnak caan nan neih sung hmuahhmuah ah minung duhnak si loin Pathian duhnak in
lo uk seh” (1 Piter 4:1-2).
Baibal siarbet: 1 Piter 4:1-6.
Minung pakhat in Khrih hrangah nun
ding timi hi a harsa zetmi a si. Ziangahtile Pathian thu sungah nung in
dingfelzet ih a nungmi mi tampi hi khawvel mi pawl in an hnong ṭheu. Pathian mi le khawvel mi hi hmunkhat ah um tlang
ding a harsazet. Cuih khawvel mi pawl cun anmah vekin duh tawk ih a nung thei
lo pawl hi an hmuhsuam ṭheu. Minung timi cu kanmah
thawn duh daan, ruah daah, hmuh daan a bang-aw tik lawngah kom kan duh. Feh
tlang, ei tlang, it tlang, tlangleng tlang kan duh. Cutikah Khristian pawl le
khawvel mi cu hmunkhat a si thei ding a harsa ngaingai. Curuangah khawvel mi
pawlin zumtu pawlcu nasazet in, a phunphun in harsat an pek, an hrem, an
hmuhsuam. Cuti vek caan ah zumtu hrangih a thupi bik cu Khrih ih lungput vek
nei in A keneh zawh ding hi a si. Cuti ih kan zawh theinak ding ahcun Khrih ih
lungput bangin kan thuam aw ding a ṭul. Khrih
khal cu hremnak nasazet tuar in thahnak tiang a tuar. Sikhalsehla cuih hremnak le
harsat tuarnak pawl a nehsuak thei. Cubangtuk ṭhiamṭhiam in zumtu pawl khal Jesuh Khrih thawngin nehnak
khuan kan nei ve a si. Kan nunnak hi khawvel duhnak bangin nung loin Pathian
duhnak bangin kan nung thei ding hi a thupi ngaingai.
Pathian duhnak in nitin kan nun in uk
theinak dingah a tanglam thupawl hi a thupizetmi pawl an si.
1. Mah le mah el-awk ding
Zumtu pawl hi sankhat hnu sankhat
hremnak a phunphun an rak tuar. Cumi pawl lak ihsin luattheinak ding hrangah an
neihmi hriamhrei thupibik cu “Khrih ih thinlungput thawn thuam aw ding” kha a
si. Culawngah ziangkim ah mah le mah el-awk theih a si ding. Jesuh Khrih cu zumtu
pawl hrangah kan zohṭhim ding umsun a si. A
netnak tiang amah le amah el-aw tahrat in kanmah misual pawl hrangah a thi. Kan
theih cio vekin Jesuh Khrih cu sualnak zianghman a nei lo. A thianghlimmi khal
a si. Sikhalsehla misual kanmah hrangah hremnak, vuak tuarnak le thahnak tiang
a tuar. Khrih minung a sinak cun cuih harsat a tuar duh lo, el a duh a si.
Asinain Pathian fialnak bangin a tuah, thahnak a tuar. Kannih zumtu pawl khal
Khrih bangin tuar theinak thazang in pe. Mah le mah kan el-awk a qul. A duhnak
bangin kan ap awk a ṭul.
1 Piter 1:1 ah, “Khrih cu a taksa in
harsatnak a tuar ruangah nannih khal amah ih thinlung neihmi bangtuk nei in nan
thinlung khohter uh. Ziangahtile taksa harsatnak a tuartu cu sualnak sungah a
tel nawn lo a si” a ti. Taksa harsat tuarnak pawlin sualnak thawn a hlat ter.
Khrih tuarnak ah kan tuar ve. Khrih a nehnak ah kan neh ve. Dingfelnak thawn in
nung ter. “Curuangah a tuih thok ihsin leilung tlun nunnak caan nan neih sung
hmuahhmuah ah minung duhnak si loin Pathian duhnak in lo uk seh” tiah thazaang
pek phah in a tarlang theinak a si. Kanmah le kan mah kan el-awk ding hi a
thupi ngaingai.
2. Sualnak huat ding
“Pathian awi lo khawvel pawlih tuah an
duhmi thil kha tikcu tawkfgang nan rak duh ve zo. Nan nunnak cu zoh mawi lo
nunnak, taksa diriamnak, zuritnak, nun nuamin nupa sualnak, ei le in in puai
tuah nomnak, le fihnungza milem biaknak ah nan hmang zo” (v. 3) a ti bangin a
liamcia ih kan nunnak ih a balhzia, kan borhhlawhzia kha theifiang-awin a dikmi
siirnak thinlung neih ding kan ṭul ngaingai a
si. Kan sualnak a tam tuk zo. Tawk thlang seh. Hmailam ah ka tuah nawn lo ding
tiah ṭhencat thei ding kan ṭul.
Sualnak thu thawn peh-awin zumtu
hrekkhat cu thupte sualnak a phunphun tuahmi kan nei ṭheu.
Cubang kan sualnak pawl hi mi nih in thei pang ding ti kan phangzet. Asinain
Pathian in in thei ding ti cu kan ṭih lo, poi
kan ti lo. Cuti ih kan nun hi khawvelmi nun daan a si ti hi kan thei aw lo.
Tisa hiarnak thlunin kan feh, sui le ngun kan duh tuk. A qha lomi thil ziangkim
kan tuah. Nomnak men a sisi, zianghman a poi lo kan ti. Rit thei a phunphun kan
hmang khalle poi kan ti lem lo. Kawhhran hruaitu lamin ziangtluk sim ṭheu khalle thei lo vekin kan um san men. Mi hmaiah ṭha zet vekih um cingin khatlam ah mi theih lote’n a
phunphun in sualnak kan tuah rero ṭheu.
Zumtu diktak cun sualnak huat neknek
dingin kan thinlung kan zirh a ṭul. Kan sualnak
kan huat ngaingai lo ruangah sualnak sungih tlangleng hi poi kan ti lem theu
lo. Curuangah thinlung pitling takin thu kan ruat dingih sualnak kan huat a ṭul. Cutik lawngah kan nun a dik thei ding. Retheih
harsat kan tong tik khalah kan tuar thei ding a si.
3. Hniksaknak tuar thei ding
Veikhat lai ah khawvel mi pawl thawn
hmunkhat ah duhtawk ih a tlangleng ve mi zumtu pawl cu a nun thleng-awin a ṭhangphawkmi zumtu ih an can tikah sualnak an duh nawn
lo. Khawvel mi daan vekin nun an duh nawn lo, a dangte in an um thlang. Cutikah
khawvelmi pawl in an zum thei lo. Curuangah anmah thawn nuamzet ih tlangleng
sal dingah an va thlem, an va hniksak. Zumtu pawlin an el tikah a phunphun in
mawh an puh, an hrem, an siatsuah duh zet. Cubang minung pawl cu thuṭhennak an co tengteng leh ding. An nung sung ah maw,
a si lo le an thih hnu khalah maw an tong tengteng dingih hrial theih a si lo
ding.
“Hniksaknak”
cu Pathian hnenin kan hnenah a ra ṭheumi a si. Hniksak
ih kan ummi hi Pathian in thilsual a tuah ruangah a si lo. Kan nun pitlinnak
dingah le hlawknak kan ngah theinak dingah in bawmtu a si sawn. Jeim 1:2-3 sungah,
“U le nau pawl, nan hnenah hniksak harsatnak a thlen tikah mi vannei kan si
tiah ruat aw uh; ziangahtile nan zumnak in cubangtuk hniksak harsatnak nan neh
tikah tuar theinak a ra ti nan thei”, ti ah in ti (cf. 1 Piter 1:6-7). Vei
tampi ah hniksaknak timi hi kan hrangah duh um lo le harsa zet vekin a ra lang
ko. Sikhalsehla kan hrangih kan hmuh thei lonak hmunah thilṭha thup aw in a um
ringring a si.
1 Piter 4:12 sungah, “Ka duhdawtmi ka
rualle uh, a harsazet hniksankan nan tuar ruangah hin mangbangin um hlah uh;
zohman ih an ton dah lomi harsatnak kan parah a thlengce tiin ruat hlah uh.
Khrih ih tuarnak a hlawmawmi nan si ruangah nan lungawi sawn uh. Cutiin nan ti
asile a sunlawinak a lang tikah nannih cu lungawinak in nan khat ding,” a ti.
Pathian faate cu a lem kan um lo ruangah hniksaknak hin kan nunnak diktak a
sizia a langter ṭheu. Cuih nunnak
diktak cu zum lotu pawl hmai ah kan langtger dingmi a siih Pathian sunglawinak
kan langternak khal a si.
Hniksaknak kan ton tikah Pathian in
tumtahmi a nei ringring ti hi kan hngilh lo a ṭul. Pathian
in in hniksak tikih tumtah a neihmi cu kan sinak taktak langter a duh ruangah a
si (cf. Job 23:13-14). Tuar theinak kan neih ding a duh. Cuticun hman tlak zumtu
ah kan cang thluh thei ding a si.
4. Pathian duhnak phuan ding
Jesuh Khrih thinlung kan neih
ngahding hi a thupi bik. Hlanlai zumtu paralṭha
pawl ih nun zohṭhim ding tampi a um. Pathian in
leilungpi hi nasazet in thu a ṭhen leh tengteng
ding. Jesuh Khrih a cohlang duh lotu pawl cu hell meisa sung thawnginn ah thlak
an si thluh ding. Curuangah Khrih ih thuthangṭha
phuang le tettikhan ding hi a thupizet tiah ralrin in pek. A thicia zomi zumtu
pawl hman thuthangṭha an theihnak thawngin
rundam co theinak khuan an ngah zo (v. 6). Pathian hmaika ah thinlung thlarau
ih nun theinak an ngah zo. Jesuh Khrih cu minung hmuahhmuah hnenah zirhnak (teaching), vancung uknak thu thawn peh-aw
mi thuthangṭha phuangnak (preaching), damcahnak ding hrangih damternak (healing) pawl a ṭuan bangtukin zumtu
pawl khal Khrih ih tanta mi vekin cohlang ding, tuah ding, ṭuan dingmi kan si.
Thunetnak.
Zumtu piangthar kan si cio vekin nitin
kan nunnak ah kanmah le kanmah kan cekfel aw sal ding hi a thupi ngaingai. Ziang
ruat loin um huahho men ding kan si lo. Leitlun khawvel duhnak thlun dingah kanmai’
duhnak le thlemnak tampi kan tong ko ding. Cuih duhnak dungah kan thlun pang lo
ding hi a thupi ngaingai. Pathian duhnak in kan nun in uk ding a thupzetmi a si.
Curuangah kanmai’ duhnak kha el in, sualnak kan huat a ṭul.
Cuihsin hniksaknak kan tonmi pawl khal thei thiam in Pathian duhnak kan phuang
ding a ṭul. Pathian duhnak lawngin kan nun in uk
thlang hramseh. Cuticun kan nunnak hmangin Pathian a sunglawi sinsin thei ding
a si.
Duhdawtnak
le duhsaknak thawn,
Rev.
CJ Hrang Hmung, DMin., PhD (Dev. Adm student)
PCU,
Manila, Philippines.
21092013/2322hrs
No comments:
Post a Comment