CCOC KA HMUH DAAN

CCOC (Chins for Christ in One Century) Second Round program thu thawn peh aw in thuhla a phunphun in an ngan cio. CCOC hi Falam mi rori a simi ka pa (Rev. C. Hrang Tin Khum) ih hramthokmi a si tiah theifeltu ka si ruangah ka hmuh daan ka ngan ve ding. A cangsuak le cangsuak lo cu Pathian kutsungah a um (Atu hi a ṭuan daan ding thu ah ziangtin an tawlrel timi netabik thucat cu ka thei ngah ve lo).

1. A hmaisa CCOC hram a thoktu taktak hi kanmah Falam mi kan si. CCOC a thoknak thu kan zingzoi asile ka pa, Rev. Charles Hrang Tin Khum, ih a thokpimi a si tiah thuhla fiang a theitu hmuahhmuah in an rak sim dahmi a um. Ka pa ZBC (2013 March thla ihsin CBC tiah hmin thleng a si zo) General Secretary a ṭuan laiih sunmang a neihmi a siih amai’ GS term cem kum ihsin hram rak thok a si. A thuanthu cabu ngan dingah ka khawlkhwm laiah a hnaṭuanpi tampi in CCOC hrangih sunmang a nei hmaisatu a si zia an sim ciomi cu “A Biography of Rev. C. Hrang Tin Khum” timi cabu sungah a um. Hi cabu a siarduhtu hrangah <http://chinworld.info/Rev_Hrang_Tin_Khum.html>  <http://www.scribd.com/doc/97209677/E-Book-Rev-C-Hrang-Tin-Khum-Thuanthu> ah siar theih a si. ZBC lam in a hramthok daan thu ah ziangtin hminsinnak le ngankhummi an nei ti cu ka theifiang ve lo.

2. Himi a hmaisa CCOC program hi 1999 kum Hakha khuapi ah cawl in 2000 kum ihsin Centenary Mission for Christ (CMC) tiah ZBC in hmindang in an pehzom. Hruaitu thuhla ṭhaṭha a ruat thei pawlin ṭha an timi a si tiah zianghman thuhla ka rel, ka ruat dah tuk lem lo. Cuihtlun ah CMC program an thok tikah pastor ka ṭuan hlan deuh thu a siih thuhla famkim in ka thei ban lo. Cu lawng si loin CCOC program cemnet ruangah kan Laitlang thlanglam ah ziangtiang a thleng ti khal ka thei tuk dah lem lo. Culai ah hna ka ṭuannak LBA hi ZBC sungah kan um lo ruang khalah a si.

3. 2010 kum March thla ah LBA pastor tam nawn cu thlanglam Laitlang a simi Kanpetlet, Mindat le Matupi ah kan tlawng. Matupi ih tuah dingmi ZBC BM meeting kai phah dingah kan feh. ZBC ih program in suaisakmi vekin Kanpetlet (KTBA) minister pawl thawn pawlkomnak nei phah ding khal kan si. Kanpetlet kan thlen tikah thuhla relkhawmnak kan nei. An simmi thu pawlin thuhla tampi in ruat ter. In simmi pawl laksungin ka hminsin ngahmi ṭongfang pakhat cu ‘CCOC program a cem hnu ah kan Laimi zumtu thar tampi pawl hi kilkhawitu an nei nawn lo ruangah zum lotu ah dung an tolh sal thluh. Curuangah kan hnenah mission hna nan ṭuan theisal ahcun kan duh tuk a si. Kanmah in le zianghman kan famkim thei fawn lo”, tiah an hnenah mission hna ṭuan dingah in sawm. ‘A hleice in Kanpetlet peng Kyindwe kiangkap khua 28 lai hi zumtu pakhat hman an um hrih lo’, tiah in sim bet.

4. Kanpetlet, Mindat le Matupi ka thlennak ih mi ka tonmi zumtu mi tampi le Pastor tam nawn in “Na pa, Rev.C. Hrang Tin Khum, in CCOC a thok ruangah kannih pawl khal zumtu ah kan cang. Pastor tiang kan ṭuan thei. Na pa parah kan lungawinak a cem thei lo. Asinain atu ahcun CCOC a um nawn lo ih CMC in kan hnenah hna an ṭuan nawn lo ruangah harsatnak tampi kan tong. Kan unau Laimi pawl zum lotu an tamtuk zo ih an hnenah mission hna nan ṭuan sal ahcun a ṭha zet ding a si”, tiah Thlanglam Lairam ah mission hna tampi ṭuan dingah in sawm nasa.

5. ZBC BM meeting, Matupi khalah rinsanmi Pastor tam nawn thawn tokhawm thunuam titi kan rel tlangnak ah Thlanglam Lairam ih Pathian thuthangṭha simphuan a ṭul zia tampi kan rel tlang ṭheu. Pastor tamnawn ih kan thinlung ah CCOC program kan cemnet ter hi a poizet. Laimi hnenah ṭuan peh hrih in, Kawl le miphun dang hnen ih hnaṭuan khal hi ṭuan thotho ko sehla, a hleice in Thlanglam Lairam ih a ummi Laimi pawl hnenah ṭan lakin ṭuan dinghi si thei sehla a ṭha zet ding nan… tiah kan ruat, an ti. Kei khal hi thu hi a thupi zetmi a si tiah ka ruat ih ka lungkimpi nasa.

6. Kan Kawhhran pumpak in mission hna kan ṭuan thok ding tiah relcatnak ka nei. Cutikah khui ah kan ṭuan ding timi thu a suak. Kei in Kanpetlet ram ah ṭuan thei sehla a ṭha ding tiah ka ruat, tiah kan kawhhran mipi pawl ka relpi. Kan Kawhhran hruaitu upa tamnawn ih thinlung sung khalah cumi cu a ṭha ding, an ti cio ve. Cutikah mi zapi lungkimnak in Kanpetlet ram ah mission field nei in mission hna ṭuan dingah kan relcat. Cuticun mission field zoh dingah 2011 kum October thla sungah kan kawhhran hruaitu upa 2 thawn Kanpetlet ah kan feh ih KTBA hruaitu pawl thawn mission hnaṭuan daan ding thuhla reltlangnak kan nei. Cuticun 2012 kum May thla ihsin palai 2 kan thlah thok. Atu kan Kawhhran in mission hna kan ṭuannak khua pawl cu Kyindwe khua 28 sungih a ummi ‘Phungdwekyin’ le ‘Nga-aw-kyin” timi khua pawl an si.

7. Atu ah kan Siangbawi Rev. Dr. S. Hre Kio ih hohatnak thawn USA ih kan Laimi pawlin CCOC 2^nd round ṭuan ding thu ka thei tikah ka thinlung in ka duh nasa. Amah lawngte cuih program hi Lai miphun dang pawl tel tum lem loin CBCUSA pawlin an ṭuan ding tiah thu kan thei tikah Hakha mi pawl lawng an si ahcun kan sung tuk tiah ka ruat. A hmaisa CCOC hnaṭuannak hi kanmah Falam mi ih thokmi a si ruangah Falam pawlin nasazet thazang pe aw, ṭang tlangin telpi thei sehla tiah duh a va um ve, tiah ka ruat. Laimi zate komkhawm in hmunkhat ah hnaṭuan tlang vialvo thei sehla duh a um zet tiah ka thinlungte’n ka ruat nasa.

8. A hmaisa CCOC hnaṭuan laiah kannih Falam mi pawl hi sumsaw peknak lamah siangzet in kan thawh cio ih pe tambik kan si lo hmanah a pahnihnak lole a pathumnak hrawng kan si ringring in ka thei, ka palh sual lo ahcun.

9. Curuangah atu CCOC veihnihnak thok sal tikah kannih Falam mi zate’n tel thei thluh sehla a ṭha tiah ka ruat (CBANA, FBA, LBA le hmuntin um Falam mi zate in). Kan tel lo khalle kan unau Hakha pawl cun an ṭuan thotho ding, dung an sip cuang lo ding ti cu a fiangzet a si.

Curuangah keimai’ pumpak ruahnak pawl hi a tanglam bangin tarlang ka duh.

(1) CCOC timi hmin rori hi ka duh tuk. Laimi zate Pathian thluasuah tampi kan conak hrampi pakhat a si tiah ka ruat. A hmin lawngte CCOC timi hin in buaipi tuk a si ahcun CCOC ti kher lo khalle Laimi zaten ṭangrual in Pathian thuthangṭha phuannak ah tel tlang ding hi a ṭul tuk tiah ka ruat.

(2) Cun kan mission hna ṭuannak hi Laimi (Chinmi) hnenah ṭuan ding ti hi ka sim zo vekin ka duh tuk. Mah le pumpak le khawbul Kawhhran pawl cun Laimi hnen lo a dang ah an va ṭuan khalle Laimi komkhawm ih ṭuantlangnak hmun cu Laimi hnenah si rori sehla ti hi ka duh.

(3) Himi hnaṭuannak hi USA le ramleng ummi Laimi pawlcun sumsaw lam lawng tawlrel in ZBC ih kaihhruainak hnuaiah ṭuan si sehla ka duh. A ṭulmi hmuahhmuah cu ZBC thawn rontlang in ṭuan tlang thei sehla.

(4) Unau Hakha lawng ṭuanvo lakin tuan ding cu ka siang hrimhrim lo. Curuangah ramsung/ramleng ihsin kan Chinmi zate in ṭan lak thei sehla a ṭha ding tiah ka ruat.

(5) CCOC hmaisa vekin Laimi Khristian zate’n thathozet in ṭuan tlang thluh thei sehla ka duh tuk. Pathian ram karhzainak le a hleice in kan Laimi zate Pathian ih rundamnak ngah thluh in thinlung, taksa le thlarau kilkip ṭhanso pitlin theinak dingih bom le cawmdawl ding hi Pathian ih fialmi hnaṭuan tumpi a si ruangah ṭangkhawm cio thei sehla duh a um zet. Politics le thudang ah kan lungrual lo hmanah Pathian ram karhzainak hnaṭuan ahcun kutkai aw in ṭuan thei ding hi duh a um zet.

Himi CCOC thu thawn peh aw in Dr. Lai Sum, Rev. Hre Mang le a dang pawlin group mail sung ihsin kan si daan ding ṭha zetzet in hlawmmi kan siar cio zo. Minung pumpak ih do le ṭhuat kan hman hi bansan a ṭha. Kanmah in himi mission hnaṭuan cu kan tel duh lo khalle midang cun an ṭuan thotho ding. Curuangah kannih in kan ṭuan duh lo khalle soisel le relsiat rero ding a um in ka ruat lo. Mi pumpak parih duh lonak thu khal tarlang ciamco in relsia a ṭul lo tiah ka ruat. Thudang ah kan thinlung a bang aw thei lo hmanah Pathian ih sersiammi minung ciocio kan siih Pathian a thei ngah hrih lomi kan unau LAIMI pawl hrangah ṭuankhawm ding tal ahcun kan lung a rual ding hi a thupi a si, tiah ka ruat. Ziangahtile mission hnaṭuan hi Pathian thupek a si. Mission hram a thoktu hi kan biakmi A NUNG PATHIAN a si. Zumtu pawl kan ṭuan dingah Fapa Jesuh ih ṭuanvo tumpi in peksinmi a si. Curuangah Laimi zaten peng le ram, phun le hnam thleidan awknak um loten ṭuan tlang cio theinak ding lamzin hawl sawn ding hi a thupizet tiah ka ruat. Kan Laimi zaten Pathian thluasuah kan donnak ding hrangah a si. Pathian hmin sunlawinak ding hrangah a si. Pathian ramkarhzainak ding hrangah a si.

Cun GCCF thu thawn peh aw in malte sim duhmi ka nei bet hrih. GCCF a thoktu lakah a telmi Rev. Pa Ni Maung hi Falam mi a si. Laizo khua mi a si. A ṭhangliannak hmun hi Thantlang peng a si ruangah ṭhanlennak ih zir in a feh. A nupi khal Falam mi Zanniat cithlah Dar Thang hrin a siih Hakha unau lakih ṭhanglian mi a si ve. Cuihtlunah GCCF ah kei le Dr. R. Thawng Hlei lawng si loin Falam hruaitu tam nawn kan rak tel. Kei khal LBA EC ih lungkimpinak in ka tel ve mi a si. GCCF sungah ṭuanvo kan zem awk tikah kei hi Kawlram Regional Secretary ṭuanvo ka lak. Atu Philippines ram ah PhD kai dingin ka pok hlan tiang Regional Secretary ka si. Tlawngkai pok loin ka um ta sehla atu khalah ṭuanvo pakhat khat ah in pe hrih dingah ruat cia mi a si ko. Cule Kawlram Regional Treasurer cu Rev. Cin Za Dal a siih Tidim-Siyin a si. Ka sim duhmi cu unau Hakha pawl in anmah lawng ṭuanvo an lak thluh lo, a remcang daan in ṭuanvo zemkhawm in kan ṭuantlang a si, ti hi ka sim duhmi sawn a si. Curuangah CCOC hnaṭuannak ah politics an telh ahcun Rev. Hre Mang ih a sim zo vekin anmah le Pathian thu a si ding. Kannih cun kan tel theinak hmun ah LAIMI zaten ṭang tlangin ṭuankhawm thei sehla ti hi ka saduhthah tumbik cu a si.

CCOC ka hmuh daan thuhla ka nganmi hi a hmaisa CCOC hramṭohtu Rev. Hrang Tin Khum ih fapa ka si ruangah mi hrekkhat in na hmuh daan na ngan ve ahcun a ṭha ding tiah in sawm ruangah ka hmuhmi pawl ka rak tarlang venak a si. CCOC thoktu ka pa ih hmin a hlota ding ka siang hrimhrim lo tiah mah duhnak te vun rel mai ko ning. Midang in ziangtin in ruat, ti cu nanmah thuthu a si ko. Ka pa, Rev. Chrales Hrang Tin Khum, hi leitlun ah a um nawn lo ruangah fa le pawlin ṭuanvo tumpi kan nei ve tiah ka ruat aw. Amah belte mah lawng ih tuah theih a si lo ruangah ruahnak thawn lawng ka tel thei lai a si. Ka pa, Rev. C. Hrang Tin Khum, a nun lai ih tumtahmi bikmi khal cu kan Laimi zate’n zumtu kan si thluh ding hi a si dah ih tutiang khal cumi cu ka duh bikmi a si hrimrhim ko.

Kan LAIMI (CHIN MI) zate hmunkhat ah Pathian sunlawinak hrangah kutongzom in ṭuan tlang thei cio nak dingah thlaza cam phah in… seherhnak tumpi thawn…

Palhnak le ngansualmi a um ahcun keimai’ famkim lo thu a si.

Rev. CJ Hrang Hmung, DMin., PhD Dev. Adm. student.

Manila, Philippines

Nov. 10, 2012.
(Revised on Sept. 5, 2013).