Baibal Caanghril:
“Fimvarte
in um uh! Ralringte in um uh! Nan ral Satan cu deh ding hawl ah a huuk reromi
kiosa bangin a tawi a vak zok rero a si. Nan zumnak ah hngetkhoh uhla Satan cu
do uh, ziangahtile leilung tlun khuazakipih a ummi Khristian unau pawl khal hi
bangtuk in harsatnak hi an tuar rero ve a si ti kha nan thei” (1 Piter 5:8-9).
Baibal Siarbet:
Matthai 24:42-44; 25:13; Efesa 5:15;
Zumtu pawlih kan ral cu khawvelmi zum
lotu pawl an si thluh cuang lo. Cuih zum lotu pawl thawn rualremzet in kan um
thei ko. Kan zumnak hrangih kan ral tumbik cu Satan ih ral ṭihnungza hi a si. Satan
cun zumtu kan nunnak ah nitinte’n a phunphun in in do, in siatsuah ringring. Kan
duhzawng in thlun hmaisa ih kan theih lo le kan tiar aw lo laifangah rin lopi’n
in siatsuah ṭheu a si. Veitampi ah in siatsuah a si ti hman kan thei cuca lem
lo. Remcang zet le nuam zetih kan um lai khalah Satan cun a thupte’n hnaṭuan in
kan zumnak siatsuah thei dingin hna a ṭuan ringring. Satan ih donak cu minung
duhnak thlun in hna a ṭuan theu ruangah in siatsuah lam khal kan thei man lo.
Ziangruangah innsang ah harsatnak, nom lonak tampi a suak ti khal kan ruah ban ṭheu
lo. Kan hnaṭuan ah remcangzet laifangah ruah lopi’n harsatnak kan ton ṭheu khal
hi ziangruangah ti kan thei lo. A tamsawn cu kan ralpa Satan ih hnaṭuannak in a
suahpi mi a si ṭheu. Curuangah ralringtein um kan ṭul. Satan kha fimvar zet in kan
do cio ding a ṭul a si.
Piter in zumtu pawl hnenah tuah dingin
thupizet ih thu a cahmi pathum in kan hmu thei a si (1 Piter 5:8-9). Cu pawl
cu: (1) Fimvarte in um uh, (2) Ralringte in um uh, le (3) Satan cu do uh, timi tla
an si.
(a) Fimvarte in
um uh!
Piter
ih thucah hmaisabik cu “Fimvarte in um uh” ti a si. Efesa 5:15 sungah Paul in
mifim le mi aa ih kekar daan pawl thuṭhimnak in a simmi kan hmu thei. Paul ih
zirh daan ah “mifim” timi cu “tleunak hnuai ih a tlanglengmi” a si. Tleunak
hnuai ahcun ziangkim hi a lang thluh (v. 14), thuhmi le hmu thei lomi zianghman
a um lo. “Mi aa” timi cu leitlun tisa duhnak bangih nungtu an siih ziangkim ah
khuaruahnak nei cuca loih um huahhi men pawl kha a sim duhmi a si. Curuangah
leilung duhnak tuk ah kan nungih lei thilri lawnglawng ruatin nitin nuntu
khawsak in kan um ahcun Paul ih hmuh daan ahcun “mi aa” kan si. Thu ruat mumal
lo ih um hi aat hlawhnak a si.
Vei tampi kan nunnak ah zianghman ruat
loin in kan um huahhi men caan a tampi. Cutin an um huahhi men ruangah ziangtik
hmanah kan ṭhangso thei lo ding. Kan ralpa Satan ih bumhnak hnuai ah kan pilhlo
cingcing ko ding. Pathian faate kan si kan ti ko nain leitlun kan um sung cu
kan nunnak ṭhangsopi dingin a phunphun in tawlrel kan ṭul. Zumtu kan nunnak hi
a phunkim in ṭhang dingmi kan si (Efe. 4:15). Cumi hrangah Pathian in kan ṭulsammi
fimnak, thiamnak ziangkim in pe. Thuruat theinak a phunphun in pe. Fimvarte ih
um ter in duh ruangah a si. Daithlang in aa zetih um ding in duh lo. Thu ṭhate
ruat in kan ralpa Satan ih bumnak tangah hlo ta lo dingin fimvar a ṭul. Cuticun
Paul ih in forhmi bangin “mi aa” si loin “mifim” dinhmun ah kan um thei ding.
Satan in duhtawk in in bum thei nawn lo ding. “Mi aa” timi hnakin “mifim” timi
cu zovek minung khalin kan duh ciomi a si ko. Kan thuruatnak le kan nunnak kan
fimvar ahcun Satan ih bum tuar rero mi kan si nawn lo ding a si.
Curuangah fimvarte in um uh, Piter in a
tinak a si. Daithlang ih um lo ding hi a thupi. Aa zet ih um ding khal kan si
lo. Ziang kan tuahmi kipah ralringzet in, thuhla um daan zohthiam phah in kan
um a ṭul.
(b) Ralringte in
um uh (5:8).
Piter ih thucah a pahnihnak cu
“Ralringte in um uh” ti a si. “Ralringte in um uh” timi ṭongfang hi Piter ih
hman thokmi a si lo, Bawipa Jesuh in a rak hmang zomi a si. Bawi Jesuh in a ratsalnak
ding thu ah a simmi a si. A ratsal caan ding hi zohman theih lo le tiar aw lo
laifang ah a si ding. Curuangah “ralring in um uh” tiah thupizet in zumtu pawl
hnenah a cah hngaimi a si (Mat. 24:42-44; 25:13).
Satan in Pathian a hua ruangah Pathian
ih duhmi minung pawl khal a hua zet. Curuangah siatsuah dingah a phunphun in a
tawlrel. Hnaihnok thei dingin a phunphun in thu a ruat. Zumtu pawl ziangtin ka
siatsuah thei pei, tiah cat loin thu a ruat ih a tawlrel ringring. Curuangah
zumtu pawlin ralring zetin um thiam ding kan ṭul. Ziangtinkim ah timtuah in um
ringring ding kan ṭul. Nitin kan nunnak ah ti luala ih um men ding kan si lo.
Ziang ruat lem lo le daithlangin kan um ahcun Satan duhnak thang sungah kan tla
pang thei. Satan ih thlemnak dungah olte’n kan tla pang thei. Cuticun Satan in
kan thinlung a luahsuak pang ahcun a duhduh in in fehpi thlang ding. Duhhiarnak
a phunphun, thlemnak a phunphun thawn in lem ding. A netnak ah kan thlarau lam
nun tiang a siatsuah thei ding a si.
(c) Satan cu do
uh (5:9)
Piter ih thucah netabik cu “Satan cu
do uh” ti a si. Satan cun a thokpek ihsin Pathian a dodal rero zo. Pathian ih
ral a si ruangah kannih zumtu pawl ih ral khal a si. Satan cu deh ding hawl ah
a huuk dumdo mi kiosa vekin a tawivak rero, tiah ralrinnak in pek. Satan cun a
thlennak kip ih ummi zumtu pawl siatsuah ding lawng hi a ruat. A bum theimi
pawl cu Pathian dodal ve dingah a sawm tengteng ding. A sawm ngahmni le a
hmanrua tampi an um zo ko ding. Zumtu pawl kha Pathian thawn hlat theinak
dingah a phunphun in a zuam rero. Tleunak sungin thimnak sungah kirter a duh
ngaingai. Curuangah zumtu diktak cun nitin kan nunnak ah fimkhur in, ralringzet
in um ringring ding kan ṭul a si.
Satan cu ‘kiosa vek a si’ ti a si
ruangah zumnak thazang a malmi cu a deh tengteng ding. Zum lotu pawlih ‘pa’ hi ‘Satan
a si’, tiah Jesuh Khrih in ralrinnak in pek cia zomi kha cingkeng ringring uhsi
(Joh. 8:44). Satan ih mi thlem daan phun (4) a um. Cu pawl cu: (1) Tisa duhhiarnak,
(2) Mi nunnak that, (3) Thudik eelnak, le (4) Thuphan per le mi bum tla an si.
Thunetnak.
Asile zumtu pawl ih kan ṭuanvo cu
ziang a si? Nitin kan nunnak ah fimvarzet in nung in, ralringte in nung in, kan
zumnak hngetkhoh dingin ṭuanvo tumpi kan nei a si. Cumi pawl lak ah a hleice in
tuah dingmi ṭuanvo tumpi (2) kan nei.
(1) Satan caan kan pek lo ding. Mal te tal khal
can kan pe pang lo dingah ralring le fimkhur kan ṭul (Efe. 4:27). Curuangah Satan
kha cat loin kan do ding (Jeim 4:7). Zumnak thazaang kan cak tikah ziang tinkim
ah Pathian duhzawng in kan nung thei. Satan ih mi bum daan kan thei ngah thei.
Cutikah fimkhur zet le ralring zet in do neh ding kan ṭul. Satan ih bumnak
sungah kan tla pang ahcun kan cem ta mai ding a si.
(2) Leitlun khuaza ramkip ih a ummi zumtu pawl
hmuahhmuah Satan ih hniksaknak an tuar thluh. Nangmah lawngin na tuar lo.
Curuangah zumtu zate in Jesuh Khrih ah kan hngat, kan ṭhum awk ringring ahcun Satan
cu nehcia a si. Ziangahtile Bawi Jesuh in Satan ih huham cahnak le thuneihnak a
neh thluh zoih luatnak lamzin in sial sak thluh zo a si (1 Kor. 10:13; Efe.
4:26-27).
Duhdawtnak
le duhsaknak thawn,
Rev. CJ
Hrang Hmung, DMin., PhD (Dev.Adm.)
Manila,
Philippines
July
13, 2013 at 2:55 pm.
No comments:
Post a Comment