MANGBANGZA PATHIAN IH DUHDAWTNAK

Baibal siar dingmi: Mar. 12:1-12; Gal. 3:26; 1 Joh. 4:15-21.

Thuthang timi hi phun tampi a um thei. Asinain a tlangpi thu in thuthang phun hnih kan thei tam bik. Thuthang phun khat cu ‘kan thei ve nan zianghman kan poisa lem lo, zianghman in hnaihnok thei lomi thuthang’ a si thei. Sikhalsehla a dang thuthang phun khat sawn cun kan theih vete’n “kan thinlung sung in khoih thei lawng si loin kan nun pumhlum tiang hman a thleng ter thei” ṭheu. Curuangah thuthang (news) timi hi a thupi ngaingai a si. Tulai san ah le phei cu a thupi sinsin. Bawi Jesuh leitlun a ratnak thuthang cu “Mangbangza Pathian ih Duhdawtnak” timi thuthang a si. Pathian in a sersiammi minung pawl ziangtluk in a duhdawt ih, cuih a duhdawtnak cu ziangtin a langter, timi in theitertu a si. Bawipa Jesuh Khrih a ratnak ding thuthang hi cuih thuthang phun hnih sungah a neta sawn a simi nun pumhlum tiang thlengter theimi thuthang a si ti sehla kan palh lo ding. Asile cutluk ih nun thlengter theimi thuthang cu ziangtluk lawmmam in so hmual a neih? Jesuh Khrih ratnak thuthang hi cutluk a si ngaingai pei maw tiah a titu khal kan um ko ding. A tanglam thuhla pawl hi zohin kan ruat tlang hnik pei.

1. Dodal a hmantu minung pawl hnenah Jesuh Khrih a ra.

Thuthangṭha Marka cabu sungah a ṭha lomi hmuankiltu thuhla hi Jesuh Khrih ih nunnak a netlam ah ngan a si. Asinain hi thu hi Jesuh Khrih suahnak thawn pehzomnak a nei. Cuih hmuan kiltu mi ṭha lo thuhla (Mar. 12:1-12; Mat. 2133-46; Luk. 20:9-19) Bawi Jesuh in a sim tikah a thihnak ding caan a nai thlang. Sihmansehla Jesuh Khrih a ratnak thu hi Pathian a dodaltu himi mi ṭha lo hmuankiltu vek pawl hrangah a si.

Thungaitein kan sim asile Jesuh Khrih hi Pathian a dodal rerotu minung pawl umnak hi leitlun ah a rung ṭum. Leitlun minung pawl hi kan zatein mi dodal a hmangtu pawl kan si. Cumi thei cingin Jesuh Khrih a rung ṭumnak thu kan zoh tikah Pathian ih duhdawtnak ziangtluk in so a tum ih mangbangza a si ti a langnak a si. Sabit hmuan neitu in a hnen-um a thlah tikah cuih hmuankiltu pawlin cuih hnen-um cu nasazet in an thawi. A dang a thlah tik khalah cuti thotho in an tuah. A netnak ah hmuan neitu in a fapa kha a thlah. Asinain an that thotho. A fapa an that ding ti a thei cingin a thlah.

Thungai in kan sim asile hmuan neitu in cuih a ṭha lomi hmuankiltu pawl hi dawihlo in a hrem thei ko. A duh le a that thluh thei ko. Sikhalsehla cutin hrem sawm loin “duhdawtnak thawngin a fapa a thlahnak” a si. Hi leitlun hi Pathian duhnak thlun duh loin a dodaltu lawnglawng umnak a si ko.  Asinain cuih leilungpi cu Pathian in a duhdawt thotho. Pathian ih duhdawtnak hi ziangtluk mangbangza a si ti hi kaa ih simcawk a si lo. Kaa ih sim le rel ding khal a theih lomi a si. Zohman in famkim zetin kan sim cawk thei lo ding.

2. Bawi Jesuh Khrih cu tangdorzet in a ra.

Kan Bawipa Jesuh cu minung ah a rung cang kona’n Pathian sinak a nei ringring ko. Asinain hnen-um (sal) dinhmun lakin hi leitlun ah a rung ṭum (Fil. 2:7). Jesuh Khrih tangdorzet ih a suahnak thuhla hi thupizet ah ret in kan sim ṭheu. A dikzetmi a si ko. Jesuh a suahnak hmun cu cawrawl einak kuang sungah a si. Sikhalsehla Paul in Filipi cakuat sungih a simbang in bawi sinak dinhmun ah piang loin farah zonzai innsang ih a suahnak thuhla a simmi hi sim duhmi a nei. Cumi cu Pathian sinak a nei ringring cingin, amah sungah Pathian sinak um ringring cingin, cuih sinak pawl taanta ih hnen-um le sal vekih a suahnak thu sim duhmi a si.

Himi thuhla kan zoh tikah a sim duhmi kan theifiang ngah thei maw? Jesuh Khrih ih nunnak thuhla kan zoh hnik pei. “Cinghnia in kua a nei, vate in bu an nei, sihmanseh mi fapa cu lu retnak hmun hman a nei lo” a tiih a ṭongmi khal kan thei. Himi hi ziangtlun in retheih zonzaihnak a tuar ti langternak a si. Cuti ih a tuarnak thawngin a langtermi duhdawtnak hi kan hmu cio maw? Cuih duhdawtnak thawn amah a dodal rerotu pawl hawl in nunnak a pek hngai a si kha. Hih hmun ah mangbangza Pathian duhdawtnak kan hmu thei. A dodal rerotu minung pawl kan sinak vekin hremnak le cawhkuan tuar ter loin cuih a dodaltu pawl thawn hmunkhat ah um in anmah vekih retheih zonzai tuar in tangdorzet in a nung a si. Pathian ih duhdawtnak cu ziangtluk mangbangza so a si? A va mak em! Thinlung tak in kan ruat ahcun mak kan ti cio ko ding. Pathian ih mangbangza duhdawtnak a co-ngah tu ih nun ah tangdor nun a nei thei a si.

3. Minung nun khaisan dingah a ra.

A hmaisa ih ka sim zomi pawl hi thuthangṭha sungih thuhla pawl an si. “Pathian in leilung hi a duhdawt zet ruangah a Fapa neihsun a pek ih amah a zumtu hmuahhmuah cu thi loin kumkhua nunnak an co ding” (Joh. 3:16) timi thuhla theih hi a ṭha ih ngai a nuamzetmi khal a si fawn. Asinain hi zawnah cawl in, ding ter men dingmi thuthang a si lo. Pathian Fapa kanmah run dingah a ra ti theih tiang lawng a tawk lo ih kan zum ih cohlang ding hi a thupi a si. Cumi cu zumtu pawlin kan nun ah lang ter tengteng a ṭul. Zumtu hrekkhat cun cuih lungawinun ka neih ah a tawk tiah kan um men ṭheu. Riahsiatza ngaingai a si, tiah ka ruat. Pathian in in duhsakmi cu thihnak, siatralnak thleng loin kumkhua nunnak kan ngah theinak dingah a si. Paul in “Sikhalsehla tikcu tinmi a thlen tikah Pathian in a Fapa a run thlah. Nunau sung ihsin a suak ih Judah daan hnuai ah a nung. Cumi cu Daan hnuai ih a ummi pawl tlen dingah le Pathian fa ih kan can theinak dingah a si,” a ti (Gal. 4:4-5). Kan dinhmun hi zaran le niamzet ih kan umnak hmun ihsin Pathian faate pawl can ter in duh. Culawng si loin kan nun khaisang ding a duh hrih. Kan thinlung, taksa, thlarau lam mifamkim si ter in duh ti hi kan fiang cio ko ding.

Izip kut hnuai ah sal a tangmi Israel miphun pawl hnenah Pathian in a duhdawtnak a langtermi kan zoh tikah rethei zonzaizet ih um ringring a siang lo. An nun colhhahdamnak pek lawng si loin sal luatnak tiang a tuahsak thluh. Kan nitin nun khaisang dingah a ra a si. Cuvek ṭhiamṭhiam in Jesuh Khrih a ratnak khal hi a si ve. Jesuh Khrih a ratnak hi a dodal rero tu minung pawl a mawhthluk lo, a hua lo, a hrem lo ih tlunah a duhdawtnak theiter le langter dingah a ra sawn a si. Culawng si loin minung pawl thawn pumkhat sinak lang ter dingah minung vekin a nung, harsat zonzai a tuar, retheihnak a phunphun tuar in a netnak ah thihnak tiang a tuar. Asinain cuih a tuarnak pawl thawngin misual thi ding pawl luatnak in pe. Culawng hman si loin Pathian faate sinak tiang in co ter hrih.

Cumi hnak ih a ṭha mi lungawiza thuthang a um hrih ding maw? Hi ti ih lungawinak kan co theinak hrimhrim hi Pathian ih mangbangza duhdawtnak ruangah a si. Cuih thuthang cun nun ih a congahtu pawl hrangah nun pumhlum a thleng ter thluh thei. Kan thinlung sungah nasazet in hna a ṭuan ih kan thinlung a khoih ter thei.

Thunetnak

Duhdawtmi u le nau, atu kan san hi a ṭha lomi thu le hla thawn a khat hrihmi san a si. Thusia, thuṭha tampi thawn a khat ringring lai. Pathian a dodal rerotu minung tampi kan um vivo. Minung pakhat le pakhat kan that awk rero, ral kan do awk rero hrih thotho. Asinain in duhdawttu kan Bawipa cun kan kutin in kai mi kha a thlah hrih lo, in thlah siang hrih lo. Mangbangza Pathian ih duhdawtnak in a faate sinak co thei dingin lam in on sak rero hrih a si.

Cuih mangbangza Pathian ih duhdawtnak cu ziang siar loin na um thei ding maw? Van sunlawinak tanta in nang le kei misual pawl in hawl dingah hi leitlun ah minung sinak dinhmun lakin a rung ṭum. Rethei zonzai a phunphun tuar in nang le kei misual hi in hawl. Mangbangza Pathian duhdawtnak a si. Pathian ih faate pawl kan si. “Rinnak thawngin nan zatein Pathian ih fa nan si ih Krhih Jesuh thawn nan pehzom aw zo” in ti (Gal. 3:26). Curuangah Johan in, “Pathian cu duhdawtnak a si, cule duhdawtnak thawn a nungmi hmuahhmuah cu Pathian khal an sungah a nung ve… Pathian kan duhdawt cu amah ih in duhdawt hmaisa ruangah a si. Zokhal Pathian ka duhdaw ticing in a unau a huatu cu thuphanper a si. Ziangahtile a mit in a hmuhmi a unau hman a duhdawt lo a si ahcun a hmuh lomi Pathian cu a duhdaw thei hrimhrim lo ding. Khrih ih in pekmi thukham cu hiti in a si: zokhal Pathian a duhdawtu cun a unau khal a duhdaw ve ding” a ti (1 Joh. 4:16-21).

Zumtu kan zate’n, nitin kan nunnak cio ah “Mangbangza Pathian ih Duhdawtnak” cu catbang loin hmun camcin hram seh! Amen.