Baibal Canghril:
“Mi
in ziangah so nan hruai, an lo tile, ‘Bawipa in a ṭul
a si,’ va ti uh. Cuticun hmakhatte ah an lo thlah ko ding,” tiah a ti. (Matthai
21:3).
Kan
biakmi Pathian hi kumkhua nung Pathian a si. Ziangzongza tuahtu le sersiamtu
huham nei Pathian khal a si. Leilung le a sungsuak thil hmuahhmuah nei thluhtu
khal a si. Curuangah a hrangah zianghman sammi a nei lo kan ti ahcun kan palh
lo ding. Asinain himi Baibal caang kan siar tikah Bawipa in ṭulmi a nei, ti kan
hmu thei. Hinah ahhin Bawi Jesuh cu minung sinak ih um a si vekin ṭulsammi a
nei ve. Cuih a ṭulsammi cu minung ih hmanmi pawl a si ve. Himi Baibal sung kan
zoh tikah khual a tlawnnak hrangah a bang deuh ih Laak parih to a duh ruangah
tiin ruah a theih. Sikhalsehla hiti’n thil a cangmi hi ṭhate’n kan zoh tikah
Thukam Hlun sanih sim ciami famkimnak a si. Zekhariah 9:9 sung kan zoh tikah,
“Nan lungawi uh, Zion mi pawl, nan lungawi uh! Lungawi in au ciamco uh.
Jerusalem mi pawl! Zoh uh, nan siangpahrang a ra lai! Nehtu a siih nehnak thawn
a ra; Asinain lungnemmi a siih laak parin a ra; Laak note, laakpi ih faate to
in a ra a si” tiah a nganmi kan hmu thei.
Bawipa
in a ṭulmi kimtertu dingah minung le a sersiammi pawl a hmang. Pathian ih ṭulmi
kan si hi a sunglawizetmi a si. A ṭulmi kan si lo pang ding hi phan a um leh
lam. Pathian ih a ṭulmi, a hman duhmi pawl cu ziangvek pawl an si ti hi kan zoh
tlang hnik ding.
1. Bawipa ih ṭulmi cu hman theihmi pawl an si
Pathian
in hman theimi le hman thei lomi a neihnak san kan zoh tikah ṭonṭaih ruangah a
si lo. Pathian cu a dingmi Pathian a si ih a thianghlim fawn. Curuangah Amai’
hman theihmi le hman theih lomi tiah kan rak um deuh a si hmang. Zumtu kan
zate’n Pathian ih hman theihmi si thluh dingah in duh a si. Hman theihmi si
dingah kan nun kan hlan aw ve a ṭul. Kan tiar aw cia a ṭul.
Pathian cu lei hmanrua hmang loin hna a ṭuan thei lo maw? tiah kan ti thei men.
Kan theih cio vekin Pathian cu ziangkim tithei a si ruangah a duhvekin a ṭuan
thei ko. Sikhalsehla hmanrua hmangih cangvaih hi Pathian ih tumtahmi pakhat ah
a tel ve a si. Minung hnenah hnaṭuantu a si ruangah minung theih theimi hmanrua
pawl hmangin hna a ṭuan ṭheu a si. Cutiih a hman dingmi khal hin hman theihmi
si dingah kan on aw a ṭul. Laak note khal cu hman theih dingin a tiar aw cia
ruangah Bawipa in a hmang ngah a si.
Curuangah
zumtu kan nunnak khal hi Bawipa in a ṭul caan ah hman theihmi si dingah kan
timtuah cia a ṭul. Kan pek awk a ṭul. Bawipa ih hman theihmi kan si ve maw?
tiah kanmah le kanmah kan cekfel awk sal pei.
2. Bawipa ih ṭulmi cu a thu thluntu pawl an si
Nu
le pa pawlin kan faate pawl kan thu an thlun tikah kan duh cuang. Thusimmi
vekih a nung ṭheu lotu cu kawk an tuar deuh
cuang. Nu le pa ih duhnak vekih nun ter in duh ṭheu
ruangah a si. Pathian khalin hman dingih a ṭulmi pawl cu a thu thluntu pawl an
si. 1 Samuel 15:22 sungah, “Cutikah Samuel in, Khuimiso Bawipa in a duh sawn?
Amah ih thu thlun maw? a si lo le saserh peknak le thawinak so? Tuu a ṭha bikmi
thawn a hnenih raithawi hnakin ‘amah ih thu thlun cu a ṭha
sawn’ a si” tiah a thu thlunnak a thupit zia kan hmu thei. Siangpahrang Saul hi
Pathian in a hnonnakcu Pathian thupek vekin a thlun duh lo ruangah a si. Saul
siangpahrang ih ruahnak cu a ṭha zetmi a si ko. Asinain Pathianih thuthlun ding
hi a ṭul sawn. Pathian ih thupek vekih tuah ding hi a thupi sawn. Pathian thu
cu hna ih theih lawng in a tawk lo. Kan nunnak ah tuahnak in langter ding a ṭul
a si (Jeim 1:25).
Zumtu
mi tampi cun Pathian thu hi kan thei tuk ko. A thei lotu cu kan mal nasa thlang
ko. Sikhalsehla a thlun lawngte kan paih lo. Kan nun in ciahneh taktak thei lo.
Ziangahtile theihnak lawngah tawk kan ti deuh a si hmang. Kaa ih piangthar cu
kan tam nasa. Sikhalsehla kiang le kap ih a ummi zum lotu pawl lakah kan
piantharnak kan lang ter thei dah lo. A thupek thluntu si cu kan tum nawn lo.
Pathian cun a thu theitu men lawng hi a duh lamlam lo. A thluntu hi a duh in a ṭulmi
a si. Kanmah le pumpak ciar in khal a thu theitu men maw kan si? a si lo le
nunpi roritu kan si ti hi zohfel-awk sal uhsi.
3. Bawipa in a ṭulmi
cu luatnak a pek.
Bawipa
in a hman dingmi laak faate cu hri thawn hrenmi a si. Hri thawn a hrenmi cu
ziangtin a hmang thei ding? Zalennak khal a um lo ih ṭawnṭeem ringringmi a si. Bawipai’ hman thei ding ahcun
hrenmi kha phoih hmaisa a ṭul. Cuih laak faate khal cu an phoih ṭheh hnu lawngah Bawipa ih hman thei dingin a um a si.
Kannih
zumtu pawl cu Bawi Jesuh Khrih thiisen thawngin luatnak kan ngah zo. Kanmai’
tuahṭhatnak in a si lo, a zaangfahnak liolio in
luatnak cotu kan si (Efe. 2:8). Satan ih hri thawn hrenmi kan si nawn lo.
Bawipa ih hman thei dingah Amai’ nunnak liam in in runsuak zo. Cuih laak faate
khal hren a si lai ah hman theih a si lo, an phoih hnu ah, ṭawnṭeemnak ihsin a
luat hnu ah hman theih dinhmun ah a um. Cuvekin kannih zumtu pawl khal Pathian
ih hman theih dingah satan thawng inn sung ihsin in luat ter zo. Miluat ka si
ti thei loin satan thawnginn sungah kan tang ringring ahcun ziangtik khalah
hman theih kan si dah lo ding. Bawipai’ hman theih si dingin kan nun kan hlan
awk a ṭul. Luatnak sunglawi co zomi ka si ti kan theihfiang awk a ṭul.
Thunetnak
Zumtu
kan nunnak ah Pathian thu kan thlun ruangih donak kan ton ahcun phan ding a um
lo. Kan Pathian a lungawi. Kan lam ah Pathian a ṭang.
Pathian in thazang cahnak thawn in khatter ringring. Pathian thu kan thlun
ruangih sunnak kan tong asile phan ding zianghman a um lo. Ziangahtile Bawipai’
in timtuahsakmi vanah lawm man ngah ding tampi kan nei. Kan nunnak hi Bawipai’ ṭulmi
kan si maw? Hman theihmi teh kan si maw? Bawipa ih hman duhmi the kan si maw?
ti hi kanmah le kan nunnak cio ah cekfel aw dingmi kan si. Bawipai’ hman
theihmi si in, nitin kan nunnak ah A thu vekin nungtu le luatnak a ngahmi kan
si zia theifiang aw thlang uhsi. Kan nunnak hmangin Pathian hmin sunglawi tertu kan si cio
theinak dingah Pathian in thluasuah in pe cio hram seh! Amen.
Duhdawtnak
le duhsaknak thawn,
Rev.
Dr. CJ Hrang Hmung
PCU,
Manila, Philippines.
March 10, 2013
No comments:
Post a Comment