REMDAIHNAK SIANGPAHRANG (Prince of Peace)

Baibal Caanghril:

“Kan hnenah naute a suak zo; Kan hrangah fapa pek a si zo; Amah cu in uktu a si ding. Amah cu ‘Mangbangza Remruattu’, ‘A cakmi Pathian’, ‘Kumkhua ih Pa,’ ‘Daihnak Siangpahrang’ tiah kawh a si ding. A siangpahrang uknak le huham cu a ṭhangso vivo ding; A uknak sungah kumkhua in daihnak a um ding” (Isaiah 9:6-7a).

Baibal Siarbet: Luka 2:8-14.

          Zumtu kan nunnak ah “Remdaihnak” thawn kan khah thei ding hi a thupi zet. Filipi 4:1-9 sung kan siar tikah remdaihnak/daihnak (peace) ngah thei dingin a dotdot kaiso vivo ding a ṭulzia, Pathian hnen ih a ra mi a dikmi remdaihnak ngah theinak dingah dot 6 tiang kai vivo a ṭul zia, himi dot 6 kan kai lo ahcun Pathian parih kan tuah ṭulmi kan pelh, kan tlolh lawng si loin kan hnaṭuanpi le zumtu unau pawl khal kan tuahmawh theimi a si, timi thu hi “Remdaihnak Thuthup” (http://drcjhmung.blogspot.com/2013/01/remdaihnak-ih-thuthup.html) cahram sungah ka ngan dah zo. Zumtu lawng si loin minung zate in “remdaihnak” hi kan duh ciomi a si. Hi leitlun ah remdaihnak a um theinak ding hrangah tiah miphun pakhat le pakhat, ram pakhat le pakhat, pawl pakhat le pakhat kan do aw rero. Sikhalsehla “remdaihnak diktak” kan ngah thei dah lo.

          Kumpi kumkhat sung ih kan nun daan kan zohkir sal tikah kan um daan tlangpi cu hitin a si tiah ka hmu: January ihsin November thla tiang thla 11 sung cu kanmah le tawkte cio in kan nuam aw thluh ko. Asinain December thla a thlen cun kan nom daan hi a phundang cuang. A hleice in December thla kan thlen cun kan thinlung sungah daihnak in a khat deuh ih kan nom daan a danglam deuh ngaingai. December thla a thlen cun hmuntin ramkip ah pangpar pawl khal an mawi hleice cuangih kan zoh tikah kan thinlung a nuam ter cuang. Hla kan sakmi khal hi kan tha a tho deuh cuang. Ceimawinak a phunphun thawn hmuntinkim ah a mawi duh nasa. Curuangah ‘a thlummi December’ (Sweet December) tiah kawh a si. Ziangruangah December ah kan tha a tho cuang ih kan thinlung sungah remdaihnak in a khat thei kan ti asile “Remdaihnak Siangpahrang” suah caan ruangah a si.

         

1. Leitlun ah remdaihnak a um lo.

          Pathian in leilung a sersiam tikah a famkim ih a ṭha tiah a rak ti. Sikhalsehla Pathian hmuihmel kengih sersiammi minung cun amah sersiamtu Pathian duh lozawng tuah in kan ralpa Satan ih bumnak tangah kan pil hlo thluh. Cuticun thinnuam le hnangamte ih um thei dingin sersiammi minung cu thinhar le buainak thawn nitin tlangleng in kan um. Pathian duhnak thlun hnak in Satan duhnak thlun hi a ol sawn ruangah a thluntu kan tam sinsin. Pathian thawn kan hlat aw deuhdeuh, kan thinlung sungah duhdawtnak a kang vivo ih remdaihnak khal a hlo vivo. Sualthim in kan thei aw lo sungah in khuh neh thluh. Cuti ih hloral lan ta ding cu Pathian in in siang hrimhrim lo. Leitlun ah remdaihnak a um thei lo ruangah remdaihnak siangpahrang a simi Jesuh Khrih cu hi leitlun ah minung sinak lakin a suaknak a si. Pathian cu minung ah a cangta a si. Himi hi minung ih ruahnak thawn a ban thei lomi Pathian ih timtuah ciami a kimnak a si.

2. Remdaihnak kengtu.

          Vei tampi ah minung tampi in remdaihnak kan duh ruangah cuih remdaihnak kan ngah theinak dingah tiin pakhat le pakhat tongkhawm aw in, thu rel tlang in caan kan hmang ṭheu. Sikhalsehla vei tamsawn cu tonkhawm le reltlang lawngin a cemliam ih remdaihnak taktak a suahpi thei dah lo. Kanmah lala ah remdaihnak taktak a um lo ruangah a si. Bawipa Jesuh Khrih cu remdaihnak duhtu men a si lo. Amah rori hi remdaihnak kengtu a si. Amah rori hi remdaihnak a si. Remdaihnak hrangah hnaṭuantu khal a si. Amai’ nunnak rori hi remdaihnak hrangah a nunnak a pe. Minung le Pathian karlak ah le, minung le minung karlak ah remdaihnak a um theinak dingah minung sinak dinhmun la in a rung ṭum a si.

3. Remdaihnak  Siangpahrang.

          Remdaihnak a um theinak dingah mai’ nunnak rori ah remdaihnak a um a ṭul. Mai’ nun ih um lomi hrangah ṭuan ding timi hi ziangtik khalah a famkim thei lo. Hlawhtlinnak khal a um thei lo. Jesuh Khrih cu ziangtik khalah midang thawn buainak a suahpi dah lo, buainak a tuah dah lo. Midang pawlin a parah sual puh in, buainak tuahin an um sawn. Bawi Jesuh suah caan kan zoh tikah Israel miphun hrangah remdaihnak an ṭulzet laifang caan a si. Palestine ram cu Rom pawlin an uk ih Grik pawlih nunphung in a ciah neh laifang caan a si. Rampi dinhmun le nuntu khawsanak ziangkim in remdaihnak an hal laifang caan a si, an ṭulzet laifang caan a si. Remdaihnak ziangtin a um thei ding tiah an lungthlitum saduhthah laifang caan a si.

          Hi caan laifang ah Isaiah in a simmi cu, “Kan hnenah naute a suak zo; Kan hrangah fapa pek a si zo; Amah cu in uktu a si ding. Amah cu ‘Mangbangza Remruattu’, ‘A cakmi Pathian’, ‘Kumkhua ih Pa,’ ‘Daihnak Siangpahrang’ tiah kawh a si ding. A siangpahrang uknak le huham cu a ṭhangso vivo ding; A uknak sungah kumkhua in daihnak a um ding” (Isaiah 9:6-7a). Minung sual tlen dingah le rundam dingih a ratu Jesuh Khrih sinak pawl famkim in a tarlang ciami kan hmu thei. A uknak le huham cu a ṭhangso vivo dingih a umnak sungah cun kumkhua in daihnak a um ding, timi hi a thupitnak bik a si. Kannih minung pawl hrangah kan ṭulbikmi a si fawn.

Thunetnak.

          Vancungmi in hramlakih a ummi tuukhal pawl hnenah a lang tikah “ṭihhlah uh” tiah a ti. Cuihhnu ah vancungmi burpi in, “A duhdawtmi minung pawl umnak leilungah hin remnak leeng ko seh,” tiah an ti (Luk. 2:10, 14). Remdaihnak umnak hmun ahcun ṭihphannak timi a um lo. Ziangahtile minung rundam dingih a rung ṭumtu Bawi Jesuh cu “Remdaihnak Siangpahrang” a si ruangah. Remdaihnak Siangpahrang a simi Bawi Jesuh ih uknak hmun tinkim ahcun buainak, ṭihphannak, huat awknak, do awknak, tvp. a um thei lo. Cuih remdaihnak timi cu sumsaw ih lei theihmi a si lo. Minung ih tuah theihmi khal a si lo. Pathian in a duhdawtmi minung pawl hnenih a pekmi zaangfahnak laksawng a si. Christmas timi cu zu ri phah, buainak tuah phah, to aw phah, huat awknak tuah phahnak ding caan a si lo. Christmas timi cu leitlun sual tlentu “Remdaihnak Siangpahrang” suah caan a si vekin “remdaihnak” a ṭunghmun theinak ding hrangah a si. A siangpahrang uknak le huham cu a ṭhangso vivo ding; A uknak sungah kumkhua in daihnak a um ding. “Remdaihnak Siangpahrang” a simi Bawi Jesuh in kan nunnak cio ah “remdaihnak” thawn cat loin in uk camcin hram seh. Amen.

Duhdawtnak le duhsaknak thawn,

Rev. CJ Hrang Hmung, DMin., PhD (Dev. Adm.)

PCU, Manila, Philippines.

14/12/2013|10:59 pm.