JESUH KHRIH LE TANGDORNAK

Baibal Caanghril:

“Nannih cu Pathian ih minung nan si; a lo duhdawt hai ih amah ih hrangah a lo hrilmi nan si. Curuangah zawnruahnak, zaangfah thinpemnak, tangdornak, thinlung nemnak le thinsaunak pawl cu hnipuan bangtuk in hruk uh” (Kolose 3:12).

“Nan zatein tangdornak thawn thuam aw uhla pakhat le pakhat bawm aw uh. Ziangahtile Ca Thianghlim in, “Mi hngal pawl cu Pathian in a dodal ih tangdormi cu mithmai ṭha a pek a si,” tiah a ti. Curuangah a cakmi Pathian ih kut hnuai ah tangdorte in um uhla amah in caan a kim a ti tikah a lo khaisaang leh ding” (1 Piter 5:5-6).

Thuthoknak.

          Christmas ziang a si timi cu zumtu tampi in a tlangpi thu in kan thei cio. Pathian cu a sinak le van sunlawinak zate’n tanta in minung sinak ah a piang ih Jesuh Khrih tiah kawh a si. Cuti ih minung ah a cang tikah tangdor zetin a suak. Christmas ih a thupitnak laimuril pakhat cu tangdornak langternak a si. Jesuh Khrih ih suahnak ih a laimuril cu tangdornak a si. Amah a zumtu pawl nitin kan nunnak hrangah a thupi bikmi cu tangdornak thawn nun ding hi a si. Sikhalsehla zumtu tampi kan nunnak ah tangdor nun a neitu cu hmuh ding a mal nasa. Nitin kan nunnak ah tangdor nun kan ṭulzia Baibal caang hmun tampi ah in sim, in zirh. Jesuh Khrih ih nunnak rori khalin cuih tangdor nun a langter.

          Zumtu pakhat cio ih a thupibik ṭuanvo cu hruaitu pawl ih thu thlun hi a si. Tangdornak thawn nung in, pakhat le pakhat duhdawtnak thawn rem le nel aw zetin um tlang ding a thupi ngaingai mi a si.

1. Pakhat le pakhat tangdornak thawn kom aw ding.

          Zumtu pawl pakhat le pakhat tangdornak thawn kom aw dingmi a si. Tangdornak timi cu kannih zumtu hrangah a thupibik hriamhrei pakhat a si. Tangdor ih a umtu pawl cu a khaisang dingih mi puarthau pawl cu Pathian in a namthlak hngai leh ko ding, timi hi Piter in a simfiangmi a si. Pathian duh sawnmi cu tangdor thinlung a neitu, kawhhran thu a thluntu, thuthangṭha phuan hna a ṭuantu zovek khal Pathian in thluasuah a pek duh a si. Cumi cu zumtu pakhat cio ih nun ah kan thuam awk ding a ṭul ngaingai. Thlah loin kai hnget ringring ding kan ṭul. Tangdornak timi cu Grik ṭongin "tapeinophrosunen" ti a siih 'a hnuaitabik dinhmun ah um aw, fialnak vekin tuah aw' tican a si.

2.  Tangdor nun nei in kan nung ding a ṭul.

          Zumtu pawl hrem le hmuhsuamnak, harsatnak an ton tikah timtuahnak tuah a ṭul. Cumi kan timtuahnak cu Pathian ih huham cahnak hnuai ah tangdor in kan nung dingmi kha a si. Pathian ṭongkam kan ngai ding. A duhnak bangin kan thlun ahcun Pathian in ziangtin kan ṭuan, kan nung, kan cangvai ding ti in zirh ding. Mi ṭha lo pawl cu Pathian in thu a ṭhen leh mai ding a si. Bawi Jesuh zumtu kan si cio ruangah tangdor nun nei in kan nung ding hi a ṭul ih a thupi ngaingai mi a si fawn.

3. Tangdornak cu Jesuh Khrih ih lungput langternak a si.

          Jesuh Khrih cu misual rundam dingah amai’ sinak hmuahhmuah le a van sunlawinak zatein a taanta. Farah nautabik dinhmun ah tangdor rannung einak kuang sungah a suak. Leitlun ih a tlanlen sung hmuahhmuah ah tangdor zetin A pa’i duhnak zate a thlun. Thinglamtah parah amai’ sualnak tel riai hmansehla harsazet in thihnak tiang tuar in tangdor zetin a nunnak a pek. A suah ihsin hi leitlun ih a nunsung hmuahhmuah le a thih tiang ah tangdornak hlir in caan a hmang vivo. Cumi cu kannih zumtu pawl hrangah a thinlung thiang ten a lungput a langtermi a si. Kannih zumtu a fa le pawl khal in ka Bawipa Jesuh Khrih ih sinak le a nunnak ih langtermi mizia pawl hi nitin kan nunnak ah kan cawn rori dingmi a si. Bawi Jesuh Khrih cu Pathian sinak a nei ringring; Asinain Pathian bang dingah hranhram in a tum dah lo (Filipi 2:5) timi thu hi cing ṭha ringring ding kan ṭul. Tangdornak cu Jesuh Khrih ih lungput langternak a si ti kan fiang cio ding a thupi.

4. Tangdornak cu tuahṭuannak in langter ding kan ṭul a si.

          Tangdornak le tuahṭuannak hi ṭhentheih lo ih a feh tlang ringring dingmi an si. Tangdor ti aw si ih kan tuahṭuannak ah siseh, kan nunnak ih lang ter thei lo cu tangdornak diktak a si lo. Curuangah Jesuh Khrih ih in hmuhsakmi tangdornak cu kan nunnak ah kan tuahṭuannak in langter tengteng thei dingah kan pek awk a ṭul. Kan timtuah awk a ṭul. Kanmah duhnak vekih nung si sawn loin Bawipai’ duhnak bangin midang pawlih duhnak khal kan hmusak thiam ding a thupi ngaingai. Cuticun a can a kim tikah Pathian in in khaisang leh ding a si. Kanmah le kanmah khaisang aw rero ding a ṭul lo, Pathian ih khaisangmi hi a sunglawi sawnmi a si (1 Pit. 5:6).

Thunetnak.

          Pathian in cawisang thei lomi zohman a nei lo timi hi kan cinken ringring ding a thupi.  Kan theih ṭulmi pakhat cu mi hngal pawl le puarthau pawl cu a cawisang dah lo. Zumtu kan zate in kan theih tengteng dingah a ṭulzetmi cu tangdornak hi milai mithmuh lawng a tawk lo Pathian hmai khal ah a ṭul, timi hi a si. Cuvek ṭhiamṭhiam in Pathian hmai lawng ih tangdor a ngah cuang loih kan minung pi pawl khalin tangdor nun kan neihmi hi an hmuh tengteng a ṭul. Kan Bawipa Jesuh Khrih ih a sinak pawl hi kan nitin nun ah kan cinkeng ringring ding a thupi ngaingai.

          “Nan thinlung put daan cu Khrih Jesuh ih thinlung put daan vekin siseh. Khrih cu Pathian sinak a nei ringring; Asinain Pathian bang dingah hranhram in a tum dah lo. Cu ai-ah, Amah ih lungtho tein, a sinak hmuahhmuah a taansan ih, hnen-um sinak la tahratin, Minung ah a cang ih minung pianzia in a piang.Tangdornak thinlung a nei ih, Pathian thu thlun in, Thinglamtah thihnak tiangin a tuar. Curuangah a saang bik hmunah Pathian in a cawisaang ih, Hmin hmuahhmuah lakih cungnung bik hmin a pek. Cuti a si ruangah, Jesuh hmin upatnak pekin, Vancung ih a ummi hmuahhmuah in siseh, Leitlun le leihnuai ih a ummi hmuahhmuah khalin siseh, an khuk an bilh ding ih, Jesuh Khrih cu Bawi a si, tiah Pa Pathian sunlawinak ah an zate in an phuang ding” (Filipi 2:5-11).

Duhdawtnak le duhsaknak thawn,

Rev. CJ Hrang Hmung, DMin., PhD (Dev. Adm).,

Camkhat Yangon.

December 22, 2013.