Philippines ram ih tlawngkainak lam thuhla thawn
pehpar aw in cahram ngan ding hi thil ol a si lo. An ram ka thlennak a rei tuk
hrih fawn lo. An sinak le dinhmun ziangkim khal ka thei famkim ngah thluh hrih
fawn lo. Curuangah duhthusam vekin famkimzet in ka ngan ngah thei lo men ding.
Ka tlinban fawn lo ding. Sikhalsehla a cang theitawk in ka hmuhtonmi le ka
suhhlam ban tawk sungin ka tarlang tum ve hnik ding. A famkim lomi le a dik
lomi a um ahcun cangantu ih famkim lonak le a theih famkim ngah lo ruangah a
si, tiah rak theihthiamsak hram uh.
Philippines ram thuhla tawi.
Philippines
ram ih official hmin cu “the Republic of the Philippines” a siih Asia nisuahnak
thlanglam, Pacific tipithuanthum nitlaknak ih a ummi tikulh ram pakhat a si.
Philippines ram hi Tikulh (islands) 7,107 komkhawmmi ram a siih tikulh tumbik
pawl cu Luzon, Visayas le Mindanao pawl tla an si. An ram a tumnak zate kom in
kilometres thawng zathum kim zikte (300,000 sq kilometres or 115,000 sq miles
tlun) a si. An ram ih khuapi bik cu Manila khua a si. Mipum zate kom 97 million
tlun an um. Asia ram sungah mipum tam lam a pasarihnak a siih leitlun huap in
hleihnihnak a si. Cu lawng si loin ram dangdang ih a ummi Philippines mipum 12
million an um hrih.
Asia
continent sungah Khristian ram ti’n kawh theimi ram pahnih te lawng a um.
Cumi ram pawl cu East Timor le Philippines pawl an si. An ram pahnih te’n
Khristian ram kan ti tikah Catholic tambik umnak ram an si. East Timor ram hi a
ram pumpi in Catholic lawnglawng an si. Philippines ram mipum sungin 93% cu
Khristian an si. Cumi sungah 80.9% cu Catholic an si. Cumi lo 12.1% pawl cu Iglesia ni Cristo, the Philippine
Independent Church, the Seventh-day Adventist Church, United Church of Christ
in the Philippines, United Methodist, Baptist, Presbyterian le Jehovah’s
Witnesses le pawl dangdang an si. Cumi lo a dang 7% zikte cu Muslim (Islam) le
biaknak dang tete pawl an si.
Philippines
ram hi 1946 kum July 4 ni ah American uknak hnuai ihsin zalennak (independence)
an ngah. Himi ni hi official ih theihpimi a si. Asinain Spain kuttang ihsin
anmahte’n independence ni tiah an hmanmi cu June 12 a si. 1898 kum June 12 ni
ih an phuanmi hi an independence ni ah an hmang deuh.
Philippines
mi pawlih Biaknak le khawtlang nun daan
A
tlunih kan tarlang zo vekin Philippines mipum tambik cu Khristian (Roman
Catholic) an si. Biaknak lam ah a tlangpi thu in zalenzet an si. Biaknak lam ih
kapkhattuk ih fehtu (extreme) khal tawkfang an um ve ko. Sikhalsehla mipi tam
sawn cu biaknak lam ah zaran men fang (ordinary) an si. A hrekkhat cu biakinn
lam a thleng dah lo an tamzet tiah an simmi khal ka thei. Asinain mi tampi cu
khawm caan ah felfaite’n an khawm ṭheu ko tiah
an simmi khal ka thei thotho. Mah le zum daan ih zirin Pathian biakkhawmnak
lamah cun an zalen nasa.
An mipi
thinlung um daan hi an tluang nasa. A tlangpi thu in kan zoh asile to aw rero,
kawk aw rero an um dah lem lo. An thinheng ih buainak a um ahcun meithal thawn
an kap that men ṭheu, ti a si. A hleice in faate
nunsim ih kawk rero khal an nei lo. Zalennak hi an uar ngaingai. Curuangah an
nuncan ziaza lam thu ka zoh tikah remcang lo tiih ka hmuhmi a tam nasa. Amah
lawngte an thinlung a tluangtlamzet (simple) in a nungtu an tam zet. A tlangpi
thu in kan zoh asile an nun a felzet pam in ka thei. Thuṭhimnak ah Bus fate kan to tikah (a hleice in Jeepney)
to man hi a khongtu (spare) a um lo. A mawngtu (driver) pakhat lawng a um. A to
tu
pawlin mah le fehnak ding hrangih cem dingmi zat cio
an pe mai. Pe loin an um ka thei dah hrih lo. Kan ram ah sisehla pe loin a umtu
kan tampi ding tiah ka ruat rero ṭheu.
Amah
lawngte pakhat le pakhat bom-aw rero ti hi a um tuk lo. Mipi umkhawmnak hmun ah
harsatnak pakhat khat kan tong khalle bom aw ti a um lo, an zoh men, thei lo
vekin an tlansan men. Ziangah mi nan bawm ṭheu
lo, tiah theihthiam rualpi ka sut tikah cuih buainak ka bawm pang asile a dung
ih buainak tampi lakah ka telngah vivo ding hi kan duh lo ruangah a si, in ti.
Cuvek thinlung cu a mak tuk ual, tiah ka thinlungte’n ka ruat rero ṭheu.
Philippines
ram ih tlawng um daan thuhla maltein.
The
National Statistics zung ih 2003 kum thuthannak ah cathiam menmen 93.4% le
hmantheihmi cathiam 84.1% a um. Fimthiamnak hrangah Acozah ih hmanmi cu GDP ih
2.5% a si. 2009-2010 kum Department of Education ih suahmi cazin sungah
Elementary tlawng 44,846 le Secondary tlawng 10,384 a um. Commission on Higher
Education (CHED) ih theihpimi zirsang tlawng 2180 a um. Cumi sungah Acozah
tlawng 607 le Private tlawng 1,573 a um. Rampi huap theihpinak tuahtu pawl cu
Department of Education, Technical Education and Skills Development Authority
(TESDA) le Commission on Higher Education (CHED) tla an si. Department of
Education in Basic Education lam ṭuanvo a lak.
TESDA in technical-vocational le post-secondary middle-level tlawng pawl a
tawlrelpi ih CHED in College, University le zirsang program pawl a tawlrel
hngai a si.
Catholic
tlawngih hmin nei deuh tlawng pawl cu: Adamson University (Vincentian), Anteneo
de Manila University (Jesuit), De La Salle University (Christian Brothers), Don
Bosco Technical College (Salesian), Notre Dame of Dadiangas University (Marist
Brothers of the Schools). Saint Louis University, Baguio City (CICM), San Beda
College (Benedictine), University of San Carlos le Divine Word College of Vigan
(SVD), le University of Santo Tomas tla an si. Catholic a si lomi tlawng hmin
nei deuh pawl cu: Silliman University (Presbyterian), Adventist University of
the Philippines (Seventh-day Adventists), Wesleyan University-Philippines
(Methodist & UCCP), Central Philippine University (Baptist), Philippine
Christian University (Methodist), Trinity University of Asia (Episcopalian),
New Era Universita (Iglesia ni Cristo), Centro Escolar University, Far Eastern
University pawl tla an si.
Philippines
ram ih tlawng hminthang deuh pawl
Philippines
ram hi fimzirnak lam ah South East Asia ahhin a ṭhangso
hmaisa bik ram pakhat ih tel ban ve mi asi. Hiti ih an tel theinak hi khatlam
ahcun kum reipi sung Spain le American pawlih uknak hnuaiih an um ruangah a si
hmang ding. Asia ih zirsang tlawng University hmaisabik a simi University of
Santo Tomas (UST) hi Philippines ramah a um. University of Santo Tomas hi
zirnak lam ah leitlun ih theihbanmi tlawng a si. Hi tlawng hi 1611 kum April 28
ah Miguel de Benavides (Archbishop of Manila) le Dominican missionary pawlih
dinmi a si. Leitlun Catholic university pawl lakah hmunkhat ih tlawngta tambik
kainak tlawng tumbik a si. Cuihtlunah Manila khuapi sungih university pawl lak
khalah tlawng tumbik a si. Himi UST tlawngah Pope pahnih in an ra tlawng dah:
Paul VI (Nov. 28, 1970) le Pope John Paul II (Feb. 18, 1981 le Jan. 13, 1995)
tla an si. Cu lo leitlun theihbanmi University pawl cu Ateneo De Manila
University (1859 – Jesuit), Silliman University (1901 – Presbyterian), Central
Philippine University (1905 – Baptist), University of the Philippines (1908
-UP), De La Salle University (1911 – Catholic), Adventist University of the
Philippines (1917- Seventh-Day Adventist), Adamson University (1932 –
Catholic), Xavier University (1933 – Catholic), Philippine Christian University
(1946 – UCCP & Methodist), ti pawl tla ansi. Cumi lo tlawng ṭha tampi an um hrih na’n kan tarlang cawk lo ding.
Himi tlawng pawl a tam sawn ahhin leitlun lam (Secular) le biaknak lam
(Theology) fimthiamnak phunhnih in zir a theih cih.
2007
kum PRC le CHED ih report pekmi (1994-1998) kum 5 sung hrangih tlawng ṭhabik an timi pawl cu: (1) Xavier University, (2) nak
University of the Philippines, Diliman le Silliman University, (4) University
of Santo Tomas, (5) Ateneo de Davao University, (6) University of the City of Manila, (7) Mapua Institute of Technology, (8) Central
Philippine University, (9) Saint Louis University le (10) Mindanao State Univestity tla an si.
Philippines
ram sung Kawlram mi pawl kainak tlawng
Kawlram
mi a tam sawn cu Protestant le Evangelical tlawng pawl ah an kai. An kai tamnak
tlawng pawl ahcun Secular le Theology zirnak a kom aw-mi tlawng hnak in
Theology tlawng an si deuh. Kawlram ihsin a hleice in Laimi pawl kai tamnak le
tlawng lar deuh pawl cu: Manila ah a ummi Philippine Christian University (PCU)
le Union Theological Seminary (UTS), Asian Theological Seminary (ATS), Manila
Theological Seminary (MTC), Alliance Graduate School (AGS), Asia Pacific
Nazarene Theological Seminary (APNTS), Adventist University of the Philippines
(AUP) le Adventist International Institute of Advanced Studies (AIIAS), Baguio
city ah a ummi Philippine Baptist Theological Seminary (PBTS), Asia Pacific
Theological Seminary (APTS) pawl an si. Doctorate program hrang ahcun PCU-UTS,
AIIAS le AGST (Asian Graduate School of Theology) tlawng pawl hi hmin nei ih
lar deuh pawl an si. Cumi lo tlawng dang khalah a kaitu tlawngta an um phahphah
nain ka tarlang nawn lo.
Philippines
tlawngkaitu pawl theihṭulmi le Visa thuhla
Philippines
ram tlawng pawl ih cazirh daan cu a phundang deuh a bang. Philippines ram ih
fimthiamnak lam an fehpi daan cu United State of America thawn an nai zet.
Philippines pawl cu zalennak hi an thupitter ngaingai. Curuangah Saya le
Tlawngta pawl karlak ah rualpi sinak neih ding hi an uar zet. A tlangpi in,
Saya pawl in thuzirhtu hnak in thuruah thiamnak mi simtu dinhmun ah an um.
Program dang pawlah ziang an bang ti cu ka thei thluh lo. Sikhalsehla doctoral
level ahcun class sungah Saya le Tlawngta kan zate’n mah le theihmi cio hlawm
aw le reltlangnak neih a si ṭheu. Saya lawngin
zirh rero ti hi a tam tuk lo.
Tutiang
dinhmun ahcun Philippines ram kan luh vete’n a tlangpi thu in ni 21 sung
hrangah Tourist visa pek a si ṭheu. Tlawngkai
duhtu pawlcun cuih caan sungah luhnak ding tlawng zamrangzetin tawlrel lohli a ṭul. Tlawng luh ngah hnu ah a malbik veikhat tal cu
visa extension tuah a ṭul. Cuhnu ah Student visa
ngah theinak dingah tawlrel a ṭul. A si lo le
Missionary visa ngah theinak dingah tawlrel a ṭul.
Cun,
Philippines ram ih tlawng pawl lakah CHED ih theihpi mi tlawng le an theih pi
lomi tlawng tiah phunhnih in ṭhen a theih (CHED
ih quanvo pawl cu hmaisa lam ah mallei ka tarlang zo). CHED ih theihpimi cu an
acozah ih theihpimi tlawng an si. CHED theihpi lomi tlawng ih kaitu pawl cun
Student Visa dil a theih lo. Curuangah Philippines ram sungih tlawngkai dingah
cun CHED theihpimi a si maw, si lo timi theih hmaisa a ṭha.
A cang thei ahcun CHED ih theihpimi tlawng ah kai thei cio a ṭha. CHED theihpimi a si lo ahcun Missionary Visa
thawn khal tlawng kai a theih. Sikhalsehla Missionary Visa cu Baibal tlawngta
le an ram ih kawhhran thawn pehzomnak a neitu pawl hrang lawngah a si, tuah le
tawlrel daan a tam deuh. Missionary visa hrangah cun acozah ih theihpimi
pawlkom, kawhhran pakhat khat thawn pehzomnak nei a ṭul.
A tuah daan ding hi thil ol a si deuh lo in ka ruat. A tlangpi thu in Student
visa hi a hmaisabik kum ahcun kumkhat hrangah pek a siih neta ahcun thla 6
tinte’n tuahbet sal a ṭul. Cutin neta khalah
thla 6 tinte’n tuahbet vivo a si ko. Missionary visa cu kum khat ihsin kum thum
sung hrangah ngah theih a si. Khatlam ahcun missionary visa thawn um thei ahcun
tlawngkai sung hmuahhmuah a remcang deuh ih visa thuhla ah sumpai cem khal a
mal deuh. Philippines ram sung umtu hrangih harsatnak bik pakhat cu visa thuhla
ruangah a si ṭheu. Visa hi an ram ih sumlutnak
bik pakhat khal a si. Visa man hi a tam theizet ih visa policy khal Immigration
lamin atu le atu an thleng cingcing ṭheu.
Philippines ram sungih Tlawngta hrang Nuntu khawsaknak
Philippine
ram sungih tlawngta hrang nuntu khawsaknak lam kan zoh tikah nun man a khung
ngaingai. Kan Kawlram thawn tahqhim ding cu a um hrimhrim lo. Mi pakhat in
thlakhat ah rawl ei man tenren aw zet in a malbik US $ 100 hrawng a ṭul. Cumi
lo cu mai’ rawl ei duh daan ih zir in a si. Cun, umnak ding innsan man ah
khuasung deuh hmun remcang le tlawng kainak nai ahcun thlakhat hrangah US $ 120
kiangkap hrawng a ṭul. Cumi cu inn khan kau tawkfang pakhat san man a si.
Tlawng hrekkhat ahcun umnak ding Hostel remcang a um. Cuvek ih um ngahtu
hrangah cun thlakhat ah US $ 60 hrawng in um theih a si. Tlawng hrekkhat lala
ahcun an umnak inn (hostel/family housing) ah thilri kimte’n um cia thluh a
siih a sanman khal a khung ve thung.
Thlakhat ah US $ 300 lai cem a ṭul ih sponsor ṭhate’n neitu pawl hrangah a remcangzet. Amah lawngte
sponsor nei lo hrangah cun ruah ban dingmi a si lo.
Kannih
Kawlrammi pawl, a hleice in Chin mi tamsawn pawl cu harsatnak ruangah a tlun ih
ka tarlangmi tlawng pawlah kan lut a tam deuh. Tlawng fees khal a ol deuh, ih
luh ding khal a ol deuh ah a cang. Scholarship peknak tlawng an um vekin pek
lonak tlawng khal tampi a um ve. Hmun dang ihsin bawmtu nei cia lo ahcun
tlawngkai ding hi thil ol lo tak a si. Mai’ tlawng kai duhnak ah scholarship
thawn remcang cia in tlawngkai ding timi cu Philippines biaknak tlawng dinhmun
kan zoh tikah a harsa zetmi a si. Scholarship thawn tlawngkaitu khal cu an um
phah ve ko nain a tlangpi thu cu unau sungkhat, rualpi le pawlkom pawlih bomnak
thawn tlawngkaitu kan tam deuh ding tiah ka ruat.
Thunetnak:
Philippines
ram hi democracy ram an si vekin zalennak thawn a khat ih a nuamzet. Sumsaw
neih ahcun duhtawk ih tlanlen theinak ram a si. Kan tarlang zo vekin
fimthiamnak zirnak ding hrang khalah a rak ṭhazet
dah. Amah lawngte atu an dinhmun kan zoh tikah academic level lamin kan tah
tikah an tla niam vivo tiah ka ruat. Ziangahtile anmai’ ṭong le nunphung hi thupizet ah an ret ih zirnak lamah
hlan deuh vekin English hmannak hi a mal deuhdeuh. Mai’ ṭong le nunphung kilkhawi in khaisan cu a ṭha ko. Sikhalsehla miphun dang pawl fimthiamnak
zirnak ding ruah ahcun a ṭha lo deuh men ding.
Midang pawl an ram ih fimthiamnak zir dingih rat ter an duh taktak ahcun
English hi leitlun huap hmanmi a si ruangah thupi ah ret a ṭul ringring ko ding. Curuangah hmailam kum 5-10
hrawng ahcun English ṭhanso duh ruangah
fimthiamnak ka zir peh ding tiih tumtahnak thawn pan dingah a tlak nawn lo men
thei tiah ruahnak ka nei. Amah lawngte ziangvek tlawngṭha
ih kan kai khalle kanmah (personal) ah a ṭhum
aw. Kanmai’ sinak in kan thiam ahcun ziangvek tlawngah kan kai khalle kan
thiam, kan ṭhangso ko ding. Kanmai’ sinak ih
tlin lo ahcun ziangvek tlawngṭha timi ah va kai
hmansehla kan thiam thei cuang lo ding. Kanmah le zuamnak parah a um a si, tiah
ka ruat. Ziang a va si khalle kanmah le pumpak ciar ih kan zuam, kan duhnak ih
zirin fimthiamnak kan zirmi ah ṭhathnemnak le
hlawhtlinak kan co ngah cio ko ding, tiah ka hmuh daan cu a si.
Duhdawtnak le duhsaknak thawn,
Rev. Dr. CJ Hrang Hmung
July 22, 2013, 9:51pm.
References:
http://en.wikipedia.org/wiki/Commission_on_Higher_Education_%28Philippines%29
http://en.wikipedia.org/wiki/Philippines
http://en.wikipedia.org/wiki/University_of_Santo_Tomas
http://en.wikipedia.org/wiki/Higher_education_in_the_Philippines
http://en.wikipedia.org/wiki/Silliman_University
https://en.wikipedia.org/wiki/Xavier_University_%E2%80%93_Ateneo_de_Cagayan
https://en.wikipedia.org/wiki/Central_Philippine_University
No comments:
Post a Comment