“Thungaite in ka lo sim: Keimah i zumtu cun ka
tuahmi hi a tuah ve ding; a si, ka Pa hnenih ka feh ding ruangah hi hnakih thil
mak sawn hman a tuah ding. Cule ka Pa ih sunlawinak cu Fapa sung ihsin a
langnak dingah ka hmin in nan dilmi hmuahhmuah cu ka lo tuahsak ding,” (Joh.
14:12-13).
Pathian in a duhzawng kan tuah theinak dingah in
duhsak ih kan thiamnak dingah laksawng tla in pe. Pathian cun in tansan men
dingin thil pakhat khat tuah dingah in ko, in hruai dah lo. A duhmi kan
famkimter theinak dingah ziangkim in pe ih a hlaan aw thluh a si. Curuangah
Bawipa Jesuh in, amah a zumtu pawl cu a tuahmi tuah thei ve dingah a khuan in
pe. Culawng si loin hi hnakih thil maksawn hman tuah thei dingah in hruai vivo
a si. Amah a rinsan taktaktu pawl cu thil mak sawn tuah theinak dingah
thluasuah in pe. Baibal
sungah Pathian in thil a cang thei lo ding tin a bangmi le thil remcang lozet a
bangmi pawl tuah dingah atu le tu midang a kawhnak thu kan hmu thei.
1. Joshua kotu
cu rinsantlak a si.
Joshua
cu Pathian siahhlawh a siih hruaitu si dingah mi ralhruutzet a si (Josh. 1:2).
Sikhalsehla amah a kotu Pathian cu rinsantlak a si. Cakzet le ralṭhazet in um dingah le a fehnak kipah ka lo umpi ding
a si tiah Pathian in thu a tiam (Josh. 1:9). Joshua in amah a kotu cu
rinsantlak a si ti a thei vekin Pathian in ziangkim a tuahsak thluh hngai a si
(Josh. 24:12-13).
2. Nehemiah kotu
cu rinsantlak a si.
Nehemiah
cu sabit tii petu menmen a siih khuapi kulhnak sak dahtu khal a si lo (Neh.
2:1; 2:5). Asinain a biakmi Pathian cu a maksak ih ṭihzah
tlak a sizia, rinsantlak a si ih amah duhdawtu le thupek a thluntu pawl parah a
thukam kimter ringringtu a sizia fiangtein a thei (Neh. 1:5). Cuticun Pathian
hnenah thla a cammi vekin Pathian khalin sabit tii petu menmen Nehemiah cu
Jerusalem khuapi kulhnak phar dawltu ah ṭuanvo a
pek a si.
3. David kotu cu
rinsantlak a si.
David
cu Pathian ih siahhlawh men a siih tuukhal tlangval te a si (Saam 78:70). A
unauza sungah ṭawnṭai
bik a si ko nain a netnak ah siangpahrang dingih hriakthih a si (1 Sam.
16:12-13). David a kotu cu rinsantlak a si vekin tuukhal tlangval te ihsin
Isarael rampi dinsuahtu dingah Pathian in a hmang a si.
4.
Piter kotu cu rinsantlak a si.
Simon Piter cu nga kaitu a si (Mar.
1:16) ih thuthangṭha simlam ah hmuhtonmi nei dah
lo a si. A thlun reromi a Bawipa Jesuh Khrih hman a hnong tariai. Sikhalsehla
Piter a kotu cu rinsantlak a si. Cuticun Pathian in nasa zetin a hmang ih
Pathian hrangah rinsantlak le ral ṭhazetin a
nunnak tiang pek ngamtu ah a cang (Tirh. 2:14-42).
5. In kotu cu
rinsan tlak a si.
Leitlun ah rinsan tlak lomi thil tampi a
um. Cumi pawl dung kan thlun ahcun kan hrangah ṭhatnak
zianghman a um lo ding. Sikhalsehla zumtu pawl in kotu cu mi menmen a si
hrimhrim lo, rinsan tlak a si tiah Paul in fiangtein a sim: “Nannih a lo kotu
cu rinsan tlak a si ruangah cumi cu a tuah ding a si” (1 Thess. 5:24).
Thunetnak.
Minung pawl hi
zohman rinsantlak kan um lo. Bawi Jesuh tel lo nun cu zianghman san a tlai lo.
Bawi Jesuh zum ih amah ring mai ding kan ṭul. Ziangahtile kan zovek minung khal hmanrua ṭha ih a hmang theitu Pathian cu rinsantlak a si. Curuangah,“Thungaite in
ka lo sim: Keimah i zumtu cun ka tuahmi hi a tuah ve ding; a si, ka Pa hnenih
ka feh ding ruangah hi hnakih thil mak sawn hman a tuah ding. Cule ka Pa ih
sunlawinak cu Fapa sung ihsin a langnak dingah ka hmin in nan dilmi hmuahhmuah
cu ka lo tuahsak ding,” timi thu cing ringring in thil mak sawn a tuahtu kan si
theinak dingah Pathian in thluasuah in pek cio hram seh.
~Rev. Dr. Hrang Hmung, D.Min., Ph.D.,
Toungphila, Kalaymyo.
March 11, 2017|Saturday|11:00pm.
No comments:
Post a Comment